اقرأ الحلقات الأولى و الثانية والثالثة والرابعة من هنا " هل يؤلمك العقاب ؟ هل لا تزال تتألم ؟ هل أُرهقت من الأمر ؟ " بهذه الأسئلة كانت بداية حوار "زيوس" مع "بروميثيوس" في حضور الجمع الإلهي المقدس من جماعته وعشيرته، ورفع "بروميثيوس" عيناه وهما تفعمان بالسخرية الشديدة وقال: أنت فاكر إن عقابك ده عقاب؟ بالعكس أنا مستمتع جدا بعقابك اللي يثبت مقدار ذكائك دون المتوسط ( ما تقول إنه غبي منه فيه يا عم وخلاص ) "زيوس" متباهيًا بقوته : بص يا بروميثيوس ، أنت هنا وسط الأهل والعشيرة ، انضم لينا هتلاقي الخير والهنا والسعادة وسيبك من البشر الفانيين دول ولا هيساعدوك .. ضحكة مجلجلة من "بروميثيوس" : مش بقولك دون المتوسط، أنت عارف شعلة المعرفة ممكن تعمل إيه للبشر، هتخليهم يفكروا، هيجردوا الأمور، هينظروا ليك نظرة عادية أنت وآلهتك، هتتكشفوا على حقيقتكم، لن تكونوا بالنسبة لهم آلهة أو رموز دينية، هترجعوا لحقيقتكم، مجرد أفاقين استغليتم جهل البشر وتعاطفهم معاكم عشان تبقوا آلهة وحكام ( يعني عصابة وماسكة الحكم !! ) يتدخل "بوزيدون" في الحوار ومعه "هيديس" : أنت مجنون يا بروميثيوس بجد ، أنت فاكر إن البشر هيقدروا يبصوا لينا على إننا لا نحكم، أو إننا لا نمثل لهم ما يتمنوه وإننا لا نستطيع تلبية طلباتهم .. أنت غبي ، البشر بيحبوا نظرية الحاكم الأوحد، الأب الإلهي، ولو سقط "زيوس" هيطلبوا "زيوس" جديد .. نظر "بروميثيوس" وبعد فترة قال : تصدق يا بوزيدون عندك حق، كورونس خد الحكم من أورانوس وحكم بنفس الطريقة ويمكن أنيل، والموكوس ده خد الحكم من كورونس وحكم بنفس الطريقة ويمكن أنيل لكن عايز أقولك حاجة… ( وبتلف الدنيا بينا .. وبتعصر ليمون علينا) أخذ نفسه ( وليس نفس سيجارة ) وأكمل : أنتم فاكرين إنكم إنتم اللي بتحكموا ؟ لا أبدا، أنتم مجرد عرائس من الماريونت، أنتم جميعا عرائس ماريونت، كما كان "كورونس" عروسة ماريونت، كلكم عرائس هناك مَن يوجهها، وحين يفرغ منكم كما فرغ من "كورونس" سيقطع أحبالكم وخيوطكم ويلقيكم لمصيركم المحتوم كما فعل مع السابق عليكم ( يعني الآلهة المقدسة طلعت مجرد عرائس !! يا حلاوة يا ولاد ) " زيوس " بسخط كبير : أنت ايه يا عم ، مش مصدق إنها سنة الحكم ، كلنا بنحكم بنفس الطريقة ما بتتغيرش ، والبشري من دول متعود على كده ، " أورانوس ، كورونس ، زيوس " كلها مسميات ولكن المهم هو النظام .. النظاااااااام .. ( النظام يا بهايم .. الريس برايز ) " بروميثيوس " ضاحكا " : أيوة ما قليل من البشر عارفين ، ومع بشعلة المعرفة عددهم هيكون كبير ، ومع الوقت هيكبر أكتر لدرجة إنهم هيسقطوا عبادتك ، وعبادة أهلك وعشيرتك كلها ، والمبررين لأهلك وهتلاقي نفسك ومعاك أهلك وعشيرتك وكل اللي معاك مش قادرين تهربوا من قضاء البشر المحتوم .. ( عابوكو كلكو ) انتفضت " هيرا " في مكانها وتبادلت نظرة مع " هيرميس " ، وتنحنح " زيوس " وزمجر " هيديس " وصرخ " بوزيدون " : أنت بتقول إن البشر الفانين دول قادرون على الاطاحة بينا ، إحنا معشر الآلهة ؟ أنت مجنون رسمي ، البشر دول كلمة توديهم وكلمة تجيبهم ، إحنا أصحاب كل ما يحدث الآن ، هذا يساعد وجودنا ، حتى من يموت على باب معابدنا نحن نعلم بهم ونحن أدرى بما حدث لهم ، لا تكن أحمقًا سننشر إنهم ما يريدون إلا النيل من دين الآلهة وطريقة العبادة وهدم المعابد وسيثور عليهم باقي البشر مع الترويج ونشر بعض الأكاذيب ثم نبطلها وسيتعاطفون معنا وسنثبت إننا نحن الأصح لأنه حتى مَن حصلوا على شعلة المعرفة س…. قاطعه " بروميثيوس " بأسف : ستروجون إنهم حمقى وإنهم كفار بشريعتكم لكي تستمروا بالحكم ، هتستمروا بالكذب عشان السلطة ، أنتم آلهة ؟ أنتم تجار ، لا بل التجار أشرف منكم ، إنكم مدلسين ، تريدون الحكم المطلق باسم العبادة والمعابد ، ستلاحقكم لعنة البشر تأكدوا من هذا .. ( التجارة لا دين لها يا بروميثيوس ) " هيرا " بصوت ناعم : لعنة إيه يا بروميث يا اخويا ، مفيش لعنات تلاحق السادة ، نحن السادة وسنظل السادة .. وأكد " هيرميس " على كلامها ، ومعه " زيوس " و " بوزيدون " ، وبقية الشلة ، فجلجلت ضحكة " بروميثيوس " : سادة !! ما معنى السادة ؟ هل تعتقدون إنه لولا البشر أكنتم ستصبحون سادة ؟ أنت يا زيوس أين كان مصيرك قبل أن يساعدك الفانون ومعهم معارضوك ؟ كنت ستكون مجرد سجين في معدة كورونس ، وأنت يا بوزيدون وهيديس وهيرميس كنتم مجرد قطع لحوم في بطن كورونس وكنتم تتعبدون به هل نسيتم تاريخكم ؟ ( وإن كنتوا نسيتوا اللي جرا هاتوا الدفاتر تنقرا ) زمجر "زيوس" قائلا : ولكننا الآن السادة يا بروميثيوس .. رد "بروميثيوس" : لستم سادة يا زيوس ، بل مجرد حكام عند السادة الحقيقيين ، السادة الذين جعلوكم آلهة ، إن السادة هم البشر الفانون ، أيوة ما تبصش ليا بصة العته دي يا زيوس، البشر هم السادة ، ولو في دماغك إنهم هيقبلوا بزيوس دلوقتي ، فبكرة يرفضوه ويسقطوه عن الأوليمب وقصره الإتحادي الأوليمبي ، لو كنت فاكر إنهم زي ما جابوا زيوس يحكم بنفس مبدأ كورونس وهيجيبوا زيوس جديد أو أي مسمى جديد يحكم بنفس النظام فشعلة المعرفة لو انتشرت بين جموع البشر ، هتلاقي أمثال كورونس وزيوس وبوزيدون وهيرميس مصيرهم مكان واحد …. أنت عارفه كويس ( يسلم فمك ياض يا بروميثيوس ) انتفضت الآلهة في أمكانهم ووقف " زيوس " وقال : على العموم عشان تعرف مستقبلك عقابك هينتهي والبشر اللي فرحان بيهم هنخليهم يلعنوك، هنلبسك كل التهم دي ، الناس هتكرهك هتبقى مجرد ملعون وما أكثر الشائعات بين البشر، هنغير لك تاريخك، هنخلي تاريخك أسود وإحنا معانا كل الوسائل اللي تخليه كده ، هنرحمك من عذابك ده لكن بقية عذابك هيكون ألعن بكل تأكيد .. ( هاااار مدوحس ع الغل يا جدعان ) ضحك " بروميثيوس " ضحكة عالية وقال : صدقتني لما قلت لك مفيش أحمق منك انت وجماعتك الحاكمة ، افعل ما تشاء ، انثرني فوق الجبال إن أردت ، اجعلني في مصير مظلم مع أي كائن تريد ، قلت لك إنك أحمق مهما تم تزييف الواقع والتاريخ سيأتي من يصححه ، العلم أيها الأحمق سيجد طريقه بين البشر وسيسقطون وهمك الإلهي المزعوم ، من سيسجل لك أساطيرك سيكون بشري ومن يفند وجودك سيكون أيضا بشري.. لا تستخف بالسادة الحقيقيين يا زيوس ، إنهم سيفتكون بك .. ( يا سيدي يا سيدي على الرسايل والمضمون ) " هيرا " ، " هيديس " ، " هيرميس " ، " بوزيدون " ، " زيوس " ، كل الأهل والعشيرة في نفس واحد : سنستمر للأبد .. ضحكة " بروميثيوس " : ده يتوقف على مدى فهمكم لمعنى كلمة الأبد .. ما تتعشموش أوي .. أفعالكم ستسقط هيمنتكم والبشر هيسقطوا خرافتكم . وتستمر الضحكة المجلجلة ، وتسستمر الأسطورة .. ليست الأسطورة القديمة بل .. الأسطورة الجديدة .. ولم يعد للحديث بقية .. فالبقية ليست في الأسطورة ولكن في .. الواقع ________________________________ الأسطورة جزء من الواقع والواقع جزء من الأسطورة، الأسطورة من الممكن أن تتحول لواقع ربما .. لكن المطلوب منك أن تحول واقعك لكي يتحدث عنه التاريخ كأنه أسطورة