أشكال تستحق الحرق على الفيس بوك؟!

بنقابل في العالم الافتراضي اللي هو الفيس يعني، شخصيات عجيبة، بيبقوا غالبا عندهم نقص في حياتهم فبيحاولوا يعوضوه ع الفيس أو يطلعوه ع الناس، يعني مثلا بيدج فيلم مشيرة صورة للجمهور وهو داخل الفيلم بتاعها مما يدل على نجاح الفيلم، فتلاقي واحد داخل كاتبلهم مثلا "عارفين لو صلاة الجمعة مش هتلاقوا الناس كده"، يا سخيف إيه دخل ده في ده متفهمش، بس هو لازم يكتب حاجة يخنق بها ع الناس وخلاص.. واحدة منزلة صورتها وهي مش محجبة فتلاقي واحدة داخلة كاتبلها الكومنت اللي فعلا بقي مبتذل وسخيف "عارفة بس انتي شكلك بالحجاب أحلي"، قال يعني طريقة دعوة جديدة وغير مباشرة وكده، يا رخمة هي أكيد عارفة هي أحلي بالحجاب أو من غيره، مش مستنية كومنت بتاعك عشان تقوليلها إنها كده أحلي يعني.
تكتب إنت بوست عن أي حاجة في بروفايلك اللي يخصك فتلاقي واحد أو واحدة كاتبين لك: "آه البوست ده عشان تلم بيه لايكات".. يعني هو أنا كل ما ألم لايكات هاخد فلوس أكتر مثلا يا أستاذ..
تكتب إنك خطبت تلاقي واحد كاتبلك: "هو إنت خطبت ليه؟.. تبقي هاين عليك تقوله: "معلش أصلي زهقت م المشي في الحرام قلت أجرب الحلال يمكن ألاقي حاجة جديدة"
الشخص اللي بيكتب: "الحمد لله إنا لله وإنا إليه راجعون".. ده بيبقي عايز يعمل نحوه إثارة وهيصة وكومنتات كتير بتسأله "ميييييييين اللي مااااااااات؟.. ما إنت يا تكتب تقول فلان مات يا متوجعش دماغ الناس إنما تكتب في الهوا وتسيب الناس تسأل مين؟ وياريتك بترد ده إنت كمان مبتردش"
الناس اللي عايزين يحسوا إنهم أحرار ومفيش عليهم قيود وبيعملوا اللي على مزاجهم وكل واحد فيهم عميق وجرئ فحت ومبيهموش حاجة، وهو في حياته الفعلية ملوش سيطرة على حياته وجبان ومبيعرفش ياخد قرار في حياته وواخد الفيس بس عشان يعمل لنفسه شكل واستايل.
ودول شوية نماذج وفي غيرهم كتير.