أزاي أعمل "C.V.".. وأعرف أشتغل بيه ؟

مفيش شاب دلوقتي مش بيدور على فرصة عمل مناسبة ليه، ولو لقى الفرصة دي بيبقى محتاج يكون مؤهل ليها عشان ما تروحش منه، ولأن "كلمتنا من الشباب وللشباب" ويهمنا انكم تلاقوا الفرص المناسبة في شغلكم،هنقدم لكم بالتعاون مع خبيرة الموارد البشرية "رشا خليفة"، وصاحبة جروب "نصايح رشا" على الفيس بوك.. كل النصايح اللي انتم محتاجينها، وكمان "رشا" هترد على كل استفساراتكم وهتقول لكم على كل اللي انتم محتاجينه عشان تلاقوا فرص العمل المناسبة
أنا اسمى محمد صلاح خريج كلية السياحة والفنادق 2010 يعنى السنة دى .
ثانياً : أنا عملت "C.V." طبعاً بعد عناء بحث كتير على الانترنت ونصايح أصحابى بس و كنت عايز من حضرتك تشوفيه، علشان أنا قدمت فى شركات كتير منها سياحة ومنها customer Services و Call Center بس للأسف ال"C.V." بتاعى مكنش بيتقبل مع انى كنت بروح أنا وأصحابى، وكانوا بياخدوا ال"C.V." بتاع أصحابى وأنا لأ.. أنا بس عايزك تشوفى هو شكلاً كده كويس وهل ممكن أكتبه بشكل أحسن من كده.
وكنت عايز اعرف الناس اللى بتكب فى ال"C.V." بتاعها حاجة هى معملتهاش دول يبقوا ايه .! انا بجد مش عارف ؟
ويا ترى ال"C.V." اللي بيتقدم في أي شركة بيترمي، ولا فعلاً بيتم ترتيبه مع غيره، وتبقى قاعدة بيانات عند الشركات ولما بيحتاجوا حد يطلبوا منها ؟
أخر حاجة كنت عايز اقولها.. لو فيه ملتقى توظيفى اعمل ايه؟، انا الانجليزي بتاعي مش قد كده، بس بقول لنفسى ادخل وأجرب أنا مش هخسر حاجة صح كده .. انتي رأيك إيه ..؟
حط هدفك وحاول توصل له
تعالى نجاوب على الاسئلة بتاعتك واحد واحد يا محمد..
أولا : بالنسبة لل"C.V." .علشان تكتب "C.V." لازم كده تحط شوية اعتبارات قدامك كالتالي :
• الأمانة والصدق في المعلومات المذكورة يعني مبقاش مش بعرف أتكلم إيطالي وكاتب إني أتحدث الإيطالية بطلاقة، لا مش هينفع خالص، أو إني عندي خبرة 20 سنة وأنا أصلا ما اشتغلتش غير10 .
مش لازم تحط الصورة الشخصية إلا لو كان مطلوب وضعها، وفي الحالة دي اختار صورة مناسبة، يعني ما ينفعش تحط صورتك في رحلة مثلا، كحط صورة زي بتاعة جواز السفر كده هادية ومريحة ومش مبهرجة.
• السيرة الذاتية بتتكتب على ورق أبيض يا جماعة مش ألوان، لو تفتكروا معايا فيلم legally blonde لما البطلة ادّت السيرة الذاتية بتاعتها على ورق روز المشرف عليها بصلها باستغراب، وقال لها إيه ده؟!
الخط لازم يكون واضح، والفونت واحد غالبا 12، لكن العناوين ممكن نكتبها بخط أثقل وما ننساش المراجعة بعد الكتابة، ومراجعة قواعد اللغة كمان.. دي أهم حاجة علشان الأخطاء الإملائية.
• مهم جدا أتكلم عن هواياتي، الأنشطة اللي كنت بقوم بيها في الجامعة، لو مشترك في أنشطة مجتمعية، الحاجات دي بتفرق جدا في السيرة الذاتية، لأن في الأول وفي الآخر الشركة عايزة تشغل إنسان مش ألة.
• أرجوكم يا جماعة بلاش نبتدي الصفحة بعنوان كبير في النص Curriculum Vitae مش محتاجين هي الشركة اللي إنت متقدم لها عارفة علي فكرة إن دي سيرة ذاتية.
• أنا مصري ومولود في مصر وعايش في مصر!! تفتكروا لغتي الأولى تكون إيه؟ أكيد مش صيني، طبعا عربي طب باكتبها ليه؟ خلينا نركز علي اللغات الثانية.
هتلاحظ ا ن اول حاجه هي الامانه ...يعني مينفعش نكتب معلومه غلط ... اوحاجه متقدرش تقوم بيها
بالنسبة للسؤال الثاني و هو ال"C.V." بيتحط في الشركات ولا بيترمي؟
ده بيحصل فعلا لكن ميمنعش كل مده اعمل متابعة، او لو عدلت اي حاجه في ال"C.V." بتاعي ابعتها للشركة و اقول في الخطاب اللي برفقة بال "C.V." اني عدلته ودا اخر تعديل.. ميمنعش برضه كل مده اسأل هل في فرص جديده كده يعني.. ودا المبدأ الي كنت بتكلم فيه دايما اني لما ابعت ال"C.V." بتاعتي لاي شركة انشيء علاقات عامة مع الناس الي بعتلهم ال"C.V."
ودا مش صعب علي فكره.. مثلا انت متعرفنيش و متقابلناش قبل كده لكن انت بعتلي وسألتني..
يعني انت دلوقت عملت علاقات عامه معايا من غير ما تاخد بالك .... دا نفس الشيء مع الشركات .
انا انصحك انك تدخل علي جوجل وتبحث عن نمذاج ال"C.V." المعروضه علي الانترنت وبكده تتعلم من خلالها ازاي تعمل ال"C.V." بتاعتك ..
بالنسبة للإنجليزي..
الموضوع محتاج شوية صبر، واقلب حياتك انجليزي يعني اقرأ الجرايد والمجلات الانجليزية، اسمع اغاني إنجليزي كتير جدا... عارف بتوع نازلة السمان.. مش متعلمين اصلا، والواحد فيهم بيتكلم 3 او 4 لغات ... عارف ليه لإنه عارف ان أكل عيشه مرتبط باللغة وعلشان كده بيركز علي إنه يتعلمها.. تفتكر الي دخل مدارس واتعلم و اتخرج من الجامعة ... هيكون الوضع بالنسبة له إيه... اكيد أسهل كتير.. إنت بس محتاج تحط هدف وتحاول توصله .
تحياتي..وأتمنى لك كل الخير إن شاء الله