ضغطة زر ...تحل الموضوع

مفيش شاب دلوقتي مش بيدور على فرصة عمل مناسبة ليه، ولو لقى الفرصة دي بيبقى محتاج يكون مؤهل ليها عشان ما تروحش منه، ولأن "كلمتنا من الشباب وللشباب" ويهمنا انكم تلاقوا الفرص المناسبة في شغلكم،هنقدم لكم بالتعاون مع خبيرة الموارد البشرية "رشا خليفة"، وصاحبة جروب "نصايح رشا" على الفيس بوك.. كل النصايح اللي انتم محتاجينها، وكمان "رشا" هترد على كل استفساراتكم وهتقول لكم على كل اللي انتم محتاجينه عشان تلاقوا فرص العمل المناسبة، ابعت انت بس واسأل عن اللي انت عايزه على..
shoghlana@kelmetnamag.com
السلام عليكم ورحمة الله وبركاته ..
أولاً أحب أحييكى وأشكرك شكر خاص على مجهوداتك ونصائحك الغالية التي تقدميها للشباب وكرم أخلاقك واهتمامك بتزودينا بالمعلومات المفيدة لنا وربنا يكرمك ويجعله فى ميزان حسناتك.
أنا دعاء حاصله على بكالوريوس حاسب الي سنة 2005 وبكالوريوس تجارة سنة 2007 .
أنا عاملة سي في "C.V." وطبعاً اشتغلت حاجات كتير كلها بحبها بس مش فيها تطور لان الشركات اللي كنت بشتغل فيها كانت شركات محليه local وعلشان أشتغل في شركة انترناشيونال أو حتى شركة كبيرة ليها اسمها وعملائها كان بيطلب مني لغات وأنا ضعيفة جداً في الانجليش على الرغم إني أخدت فيه كورسات كتير وبكون كويسة جداً أثناء الكورس لكن بعد نهايته وعدم ممارسته فبرجع تاني معرفش حاجة ويمكن ده اللي بيأخرني في إني ألاقي وظيفة كويسة.
أنا طالبه من حضرتك تطلعي على السي في بتاعي ولو في أي تعديلات عارفة إنك مش هتبخلي عليه بيها.
وكمان ياريت تقترحي عليه إيه الوظيفة اللي تناسبني وأنا معنديش لغة على الرغم إني الحمد لله كويسة في الكمبيوتر وازاي أبحث عن الوظيفة دي وأقدم فيها .
في انتظار اقتراحاتك ونصايحك ليه
وجزاكي الله خير
ميرسي علي كلامك و أشكرك جداً عليه .... بالنسبة للCV الموضوع دا قٌتل بحثاً .... أنا شفت ال CV بتاعك هو كويس بس عايز مراجعة اللغة الإنجليزية فيها بعض الأخطاء اللغوية .
أنتي باعته واحد عربي ، مفيش CV عربي غير نادر جداً فأرجو الإهتمام بالنسخة الإنجليزية ... و حاولي تقرأي الموضوعات الي إتكلمنا عنها في موضوع السيرة الذاتية و الحاجات دي.
بالنسبة لمقترح الوظيفة .... أسفة جدا :)
لأن مفيش حد بيطلب غير معرفة جيدة للغة حتي الشركات الصغيرة بتطلب تعلم اللغات و الموضوع مش صعب ... اللي بيعوز حاجه بيقدر يوصلها المهم إنه يكون عايز و عنده عزيمة و إصرار انه يوصل لهدفه .
الممارسة مش صعبة مارسي أون لاين ادخلي علي الانترنت اسمعي و اتكلمي .,.. كل يوم نصف ساعة بكده مش هتنسي وهتمارسي اللغة بشكل دوري مش مهم تكوني عايشة في أمريكا عشان تمارس اللغة ، مش عارفة تروحي أمريكا .... أمريكا هتيجي لحد عندك بضغطة زر .... الانترنت مخلتش حد نفسه في حاجه .
أفتكر بالشكل دا هتعرفي تشتغلي في شركة انترناشيونال