كرامتها أم حسن

يمكن ما تصدقش.. لو قلت لك.. ان تاني »خبر« سعدت بيه لما سمعته.. بعد سقوط دولة جمال مبارك طبعا.. كان حكم المحكمة بفتح الشوارع وازالة الحواجز اللي حوالين السفارتين الأمريكية والبريطانية بالقاهرة..يا أخي.. الحكاية دي كانت واقفة في زوري و»حازة في نفسي« كنت حاسس ان الموافقة لهم علي قفل الشوارع بيمثل .. قمة الغطرسة والتعالي في تعاملهم معانا.. وأنا »موتي وسمي« ان حد يتعالي »عليّ« فشوف بقي.. لما ده يحصل لك »جوه« بلدك.. وانت مش قادر تفتح »بقك«.. ولا قادر تنطق، ويبقي »متحرم« عليك انك »تعدي« من جنبهم.. وإلا تتسحب علي أمن الدولة.. كنت با اعزي نفسي واقول ان العالم دي.. بتتعامل معانا بالأسلوب المهين ده.. علشان بيدونا معونة.. لكن لقيت انهم مابيعملوش كده مع دول تانية.. بتاخد معونة.. برضه، واساسا ماكانوش يقدروا يعملوا معانا كده.. أو يتصرفوا بالعنطظة دي لو كان رئيس الدولة له موقف.. وهو ما اكد ان تصرفهم ده.. كان بموافقة ومباركة من الرئيس »المخلوع«.. فمبارك.. لم يكن عنده أي مانع ان تداس كرامة المصريين وتتعجن كمان في أي حتة وأي دولة.. فما بالك بقي »بدولة« بتديله فلوس.. والحكاية دي عند الريس من زمان.. مش جديدة.. فأنا أذكر انه في بدايات حكمه.. تم الاعتداء جنسيا علي ابن احد المصريين العاملين بدولة »خليجية« ونشرت القصة في الصحف، وتم تداولها.. فماذا فعل الرئيس؟.. بدلا من ان يثأر لكرامة مواطنه ويلعن سنسفيل ابو الدولة ويطالبهم بأقصي عقوبة لمرتكب الواقعة مش حتصدق.. عمل مؤتمر صحفي »مخصوص« أعلن فيه ان علاقتنا بهذه الدولة علي أحسن ما يرام وستظل كذلك إلي الأبد.. تخيل لما »ده« موقف رئيس تجاه ابناء وطنه.. يومها اصابني القرف والكمد علي كرامة المصريين التي اهدرت عيني عينك.. وعلي موقف رئيس الدولة اللي ادي لهؤلاء الحق في ضربنا »بالنعال« وعرفت يومها.. كيف ينظر الرئيس »إلينا« وما هي قيمتنا عنده.. ولم يكن هذا هو الموقف الوحيد للرئيس.. فقد كانت تعليماته »الصريحة والدائمة« إن أي دولة.. تهزأ المصريين أو تعمل فيهم أي حاجة.. الموضوع.. يعدي .. وكان بيقول تفسيرا لموقفه »العظيم« ولنخوته وغيرته علي أبناء بلده.. ح أجيب لهم أكل منين لو »رجعوهم«.. - يقصد المصريين طبعا - وما طبقه مبارك في الخارج طبقه وأكثر في الداخل.. انت عمرك سمعت علي مدي 30 سنة من حكمه.. انه »انتفض« لانتهاك كرامة مواطن.. او لاهانته أو سجنه بدون حق أو لانه مش لاقي ياكل.. فهل بعد ده كله نسأل .. هل كان مبارك مشاركا في قتل الثوار؟ ياأستاذ من لا يهتم بكرامة مواطنيه لا يهتم بأرواحهم.

من الجماعات للثوار.. تعالوا التحرير مش حنضربكم
»أفضل تسمية لجمعة الأمس«