إحم إحم

في حب (كنبة) مصر !

مكالمة من امي في البلد
- ألو ألو ألوووووو
- أيوه يامه مش سامعك كويس.
- معلش أصلي باكلمك من وسط دوشة !
- دوشة إيه يامه دي هو انتي بتكلميني من لجنة الانتخابات ولا إيه؟
- وهي اللجنة فيها دوشة برضه ياولا؟دي أهدي مكان في العالم دلوقتي يعني لو كنت في اللجنة كان زمانك سمعتني كويس!
- اومال دوشة إيه دي يامه؟
- دي دوشة إخواتك البنات وعيالهم جايين يشقروا عليا أنا وأبوك.
- وهو ابويا عامل ايه يامه صحيح؟
- أبوك محبط علي الآخر ورجع يقعد طول اليوم علي الكنبة زي الأول وأكتر.
- ليه يامه، كل ده علشان سما المصري مش هتقدر تترشح ومفيش رقص؟
- لا ياولدي احنا من الناحية دي مطمنين قوي ولو سما المصري مش موجودة في البرلمان فاللي هيرقصوا بدالها كتير!
- طب اومال مال أبويا .. متاخديه كده وقومي انتي وهو غيروا جو وانزلوا اللجان.
- ماهو أنا بعد ماكنت خلاص اقنعته يقوم ياخد دش ونروح أنا وهو نصوت في الانتخابات قام فتح التليفزيون من هنا وراسه وألف سيف مايتعتع من مكانه
- ليه يامه التليفزيون كان فيه ايه؟
- كان فيه واحد بيقول ان الانتخابات فيها مال سلاسل بيلعب،ماتبعتلنا يابني شوية من المال السلاسل ده!
- ههههههه الله يحظك يامه اسمه مال سياسي مش سلاسل!
- مش فارقة المهم بس ندوقه.
- لا يامه دي فلوس رشاوي للناخب.
- وهو المنتخب محتاج فلوس يابني ده واكلها والعة وياريته كان فلح في حاجة !
- منتخب مين بس باقولك الناخب يامه يعني إللي بيدي صوته في الانتخابات مش المنتخب بتاع الكورة، لكن أبويا محبط ليه؟
- ازاي بقي ياولدي عايزهم يتهموا أبوك الناخب وامك الناخبة اننا بناخد فلوس؟
- قطع لسان اللي يقول كده أنا بس كان قصدي إن المشاركة نوع من الايجابية
- صحيح بمناسبة الجلابية فين ياولا التوب اللي قلت هتبعتهولي علشان افصل جلابية جديدة،باين مصر نستك وعودك.
- يامه مقدرش انساكي بس الجلابية حاجة والايجابية دي حاجة تانية،الايجابية يامه يعني تشاركوا في التخطيط للبلد.
- بتتكلم كده زي بتوع التليفزيون، أهم كانوا بيقولولنا كده ولما جينا نشارك شتمونا.
- مين ده إللي يستجري يشتمكم؟
- زمايلك يابني عمّالين يشتمونا ليل نهار وبيهددونا كمان بالغرامة والبهدلة لو منزلناش نصوت قام أبوك قال طب والله منا متعتع من مكاني وخلي أي كبير من كبارات البلد يهوب ناحيتي ولا يقولي ادفع غرامة.
- معلش يامه مش كل الاعلاميين زي بعض،حاولي تاني مع أبويا.
- حاولت يابني وبعد ماخلاص رايحين قام سمع كلام من وزير العدل بيقول اللي ماراحش الانتخابات مايستحقش يكون انسان قام رجع تاني قعد مكانه!
- برضه يامه مش كل الوزرا زي بعض ولازم تتحملوا وتكونوا ايجابيين اكتر من كده دي بلدنا كلنا ومش بلدهم وحدهم.
- خلاص يبقي تساعدنا نأسس حزن جديد وابوك يبقي رئيسه
- اسمه حزب يامه مش حزن.
- مش فارقه كتير،وعلي فكرة ابوك اختار اسم حلو قوي للحزب الجديد وهيبعتلك الورق بكره تقدمه للمسئولين في مصر.
- بس إوعي يكون أبويا اختار إسم في حب مصر؟
- لا اسم حزب أبوك في حب(كنبة) مصر!