طول عمري ساكن في منطقة شعبية عادية، فيها كل أنواع البشر البياعين والصنايعية والشحاتين والموظفين والناس اللي من غير شغل وأصحاب المحلات والأغنياء. منطقتنا كانت مشهورة بأكثر من شيء لكن علي مستوي عيني انا كنت اعرفها من عم ابو سعيد.. إحنا مانعرفش أسمه الحقيقي ايه ولا حتي نعرف اسم ابنه سعيد، لكن احنا طلعنا لقيناه ساكن عندنا في المنطقة. عم ابو سعيد راجل شكله طيب، شعره تقيل أسود وهو راجل رفيع شوية وشنبه زي مابيقولوا بريمة كده دايما ظابطه لما بيحلق وكنا بنقول عليه بينا وبين بعض أبو سعيد المتقيف علي طول. وبصراحة هو كان راجل شغول مش هقول مش بتاع شغل لانه اشتغل تقريبا كل الشغلانا اللي نعرفها في الدنيا. مرة نلاقيه بيسحب عربية فول وبيبيع فول وكمان بليلة، ومرة نلاقيه واقف علي الناصية وبيبيع برضه فول بس ساندويتشات، مرة يبيع جرايد، ومرة يغطس ويظهر فجأة، ولما نسأله ياعم ابو سعيد كنت فين الفترة دي؟ يقول كنت بقلب عيشي في بورسعيد. طب بتشتغل ايه في بورسعيد ياعم ابو سعيد؟ يضحك ويقول مهرب اد الدنيا.. وبعد فترة استقر علي الشغلانة التمام وده من كلامه ومن عظمة لسانه اشتغل بواب اد الدنيا.. جاب دكة بيضا وحطها قدام أكبر عمارة في المنطقة واتفق مع صاحبها انه هيحرسها ومن غير ماياخد مرتب بس هو هيقلب عيشه من السكان واهو يبقي حس بردو بعد المشاكل اللي حصلت بعد الثورة. والشهادة لله عم ابو سعيد كان في حالة يعني لا بيروح ولا يجي لكن لاحظنا انه بدا يغطس كل فترة وشفناه مرة طالع في مظاهرة، ده غير اننا سمعناه بيحكي مرة لواحد قاعد جنبه علي الدكة علي اللي حصل في التحرير يوم الجمعة والخيم اللي هناك وناس ياما يسدوا عين الشمس والكلام اللي بيتقال والمنشورات اللي بتتوزع. بجد لاحظنا انه بدا يلطن كلام غريب مش كلامه لانه باين عليه كلام كبير عن مناهضة الظلم والتقدم ومشروعات النهضة وكلام من ده كتير. وفي يوم من الايام هل علينا عم ابو سعيد بشكل جديد فعلا نيو لوك جامد . لابس بدلة كل حتة من شكل وقلع الجلابية المحلاوي المالمة وحاطط علي شعره فوزلين ومسرحه علي الجنب بصراحة شدني عم أبو سعيد وقلت لالا مش هسيبك ياعم أبو سعيد لحد ما أجيب قرارك.. قابلته في الشارع وقلت: ايه الشياكة دي؟ قالي : ايه رايك مش بردو زي الناس اللي بيطلعوا في التليفزيون ويتكلموا في السياسة؟؟ قلت : الشهادة لله اجدع واروش كمان.. بس قولي جاي منين ياباشا؟ قال: جاي من اجتماع الحزب. مسكت نفسي وقلت : حزب ايه ياعم ابو سعيد؟ قال: الحزب اللي كونها بعد الثورة اللي اديتنا الحق اننا نعبر عن كل اللي عاوزينه ونعمل وقفات احتجاجية ونطالب بالمطالب اللي شايفين من وجهة نظرنا اننا نستحقها بعد ماا انظلمنا سنين طويلة في ظل استعباد وقهر سياسي واجتماعي وطمس لمصريتنا ودفن للحريات . هنا ماقدرتش امنع نفسي من اني اشهق وافتح فمي وعيني تبرق من الكلام وسالته : حزب ايه؟؟ قال : حزب البوابين الاحرار. ده اسم حزبنا اللي بيعبر عننا وده حقنا اللي كفلته لينا الدولة بعد الثورة واحنا مش اقل من اي حد في البلد ومن حقنا نعبر عن ايدولوجيتنا واننا نكون ترس في عجلة التطوير والنهوض بالبلد وبيني وبينك كمان يكون لينا نصيب في التورتة. قلت اشوف اخره ايه عم ابو سعيد: تورته ايه بقي؟ قالك التورته.. هفهمك شكلك كده نايم والبلد حواليك بتتغير يابني مصر داخلة علي منعطف خطير واللي هينزل دلوقتي الشارع اسمه هيتقال في الجرايد والقنوات وكمان هنقدر نطلع في التليفزيونات انت ماشوفتنيش النهاردة وانا بتكلم في القناة اياها قلت : بصراحة ماسمعتش. قال : ازاي؟؟ انت ماسمعتش المذيع وهو بيقول من ميدان التحرير معنا الناشط السياسي ابو سعيد؟ وبتاخد فلوس ياعم ابو سعيد في الحزب ده؟ قال : لالالا فلوس ايه؟ والله انا دافع لحد النهاردة 500 جند. ولا اقولك بلاش جند دي علشان المجلس العسكري واحنا بينا وبينه مشاكل ياما 500 جنيه كل جنيه ينطح جنيه وبناخد وصل . اهم حاجة ان الحزب يقف ع لي رجليه وننافس احزاب المناطق التانية قلت : هو في احزاب تانية تعرفهم؟ قال: يوه أحزاب كتير ده بس في المنطقة اللي جنبنا 15 حزب فيهم اصحابنا واحبابنا . احنا اجتمعنا معاهم النهاردة وهنطلع بيان يندد بالاحداث اللي بتحصل في البلد وكمان البيان فيه اننا هنطلع في وقفة احتجاجية ومسيرة هنرفع فيها هتافات تندد بالفلول وكمان يافطات بتقول علي اهمية البوابين في البلد ودوهم في اعمار البلد الفترة القادمة قلت: ومين هيطلع البيان ده او مين هيقراه؟ قال: انت عارف بنت عم كمال اللي بيبيع جرايد علي القمة ؟ البنت اللي لسه في اولي كليه هي المتحدثة الرسمية لمجلس ائتلاف حزب وردة البوتس بالاشتراك مع حزب الكساء الشعبي الاشتراكي التقدمي المناهض للفكر الشيوعي.. ماهي برضه ناشطة سياسية علي كيف كيفك. من كلام عم ابو سعيد لقيت ان الحمد لله اصبحت البلد كلها نشطاء سياسين وقلت عليه العوض وربنا يستر علي بلدنا لما كل من هب ودب اصبح بيطلع بيان وبيهدد بمظاهرة وبوقفة ولك الله يامصر.
