خارج الخدمة دائما.. حتى لو ردينا

(1945)
(شاب مصرى):
ألو.. مصر معايا؟
( مصر ): مين بيتكلم؟
_: أنا المصرى.. وكنت عاوز أشتكى لجلالتكم من ال...
_: بتقول المصرى!! اخرس كلب خرسيس.. أدب يوك.. أخلاق يوك.. أنت عايز تتكلم معانا كدة بكل بساطة أنت أكيد مجنون..
_: أصل جلالتكم الحكاية إنى كنت بشتغل عند الباشا فى أرضة، وبعدين فجأة رمانى أنا وعيالى من العشة وقالى ماشوفش وشك تانى لاقتلك أنا وعشرين فلاح كانوا بيشتغلوا عنده.. كل ده على شان طلبنا منه زيادة فى اليومية خمس قروش.. سامعنى يا باشا.. ياباشا .. ياباشا.._: تيت.. تيت.. تيت..تيت!!!!
****
( 1953 )
(شاب مصرى):
ألو.. مصر معايا؟
( مصر ): مين بيتكلم؟
_: أنا ابن المصرى..
_: أهلا بالرفيق.. طلباتك؟
_: بصراحة أنا أبويا أخد حتة أرض من اللى كنتم بتوزعوها على الفلاحين، لغاية كده وكويس أوى، إنما بعد كام شهر لقيت واحد من البشوات بتوعكم الظاهر الأرض حليت فى عينية، فقام طاردنا كلنا منها، وقالنا إن الأرض دى بقت من حقه بعد كل التعب اللى عمله علشان اللى زينا يعرف يعيش.. ولو واحد ولا اتنين تضرر إيه المشكلة يعنى.. المهم مصر تعيش..
_: وأنت بقى يا رفيق زعلان إن مصر تعيش كويس؟
_: لا لا يا باشا ما قصدش ربنا يخليكوا لينا.. إنما يعنى أنا بس عايز أقول..
_: خلاص خلاص.. عموما مصر مايرضيهاش ده أبدا.. وأوعى تنسى يا أخى أن ترفع رأسك عاليا فلقد انتهى عهد الاستعباد.. ارفع رأسك يا رفيق..
_ ( المصرى رافعا رأسة ويديه عاليا):
ربنا يخليكى لينا يا مصر.. بس يعنى يا باشا أقدر دلوقتى أروح أستلم أرضى تانى.... باشا.. يا باشا.. ياباشا؟!!!
_: تيت.. تيت .. تيت.. تيت..
****
( 1971 )
( شاب مصرى ): ألو .. مصر؟
( مصر ): أيوة.. مين بيتكلم؟
_: أنا يا باشا أبويا وجدى كانوا اتكلموا قبل كدة والخط قطع..
_ ( مقاطعة): قبل ما تكمل لازم تعرف ان مصر بعد 70 ما تغيرتش عن قبل 70 وإننا على النهج سائرون.. وأن الفراغ الذى تخلف عن السابق، لا يستطيع بأى حال من الأحوال أن يملؤه رجل واحد..
_: ماشى يا باشا وماله .. أنا بس كنت عايز .. ألو ألو ؟!!
_: تيت.. تيت.. تيت.. تيت..!!
****
( بعد 1973)...
_: ألو .. مصر معايا؟
_: أيوة يابنى.. مين معايا؟
_: أنا كنت اتكلمت قبل كده.. فاكرنى ياباشا؟
_: لأ مش فاكر.. أنت عارف يا بنى الحرب وبلاويها، جابت للواحد زهايمر....
_: لا يا باشا ألف سلامة لمعاليك..
_: اتكلم يا بنى بحريتك خالص.. أنا زى أبوك وعايز أسمعك.. اتكلم من غير خوف..
_: ربنا يخليك لينا ويزود إيمانك كمان وكمان.. الحكاية ياوالدى إن أنا سبت شغلانة الفلاحة دى خالص ورحت اشتغلت فى مصنع من المصانع اللى عملهلنا اللى قبلك.. إنما الأيام دى لقيتهم بيخصموا منى عمال على بطال زى ما يكونوا عايزين يطفشونى منها..
_: مصنع إيه يا بنى وقرف إيه.. دى موضه قديمة وراحت.. العصر ده عصر انفتاح.. ولازم تقلب عيشك هنا وهناك فى الأعمال الحرة.. وخدها منى كلمة يا بنى (اللى مش هايتغنى فى عهدى مش هايتغنى أبدا) وهاتشوف بعينك الأيام السودة اللى هاتعيشوها..
_: فجأة كده يا باشا؟!! طب أروح فين واجى منين أنا وعيالى؟! طب دلنى على السكة ووجهنى أعمل إيه .. ألو ألو ألو!!!!!!
_: تيت.. تيت.. تيت.. تيت..
****
( 1981 )
_: ألو.. مصر معايا؟
_: تمام.. خير؟
_: أيوة يا باشا ..أنا واالى خلفونى اتكلمنا قبل كدة كتير ومافهمناش ولا استفدنا حاجة.. وكل مانقول خلاص عرفنا طريقنا.. لقيناه فجأة بيتغير ونروح سكة تانية خالص...
_:
أول حاجة لازم تعرفها إن أنا مش باشا.. أنا عهد جديد خالص خالص.. جديد وفريد ومتفرد..
_: وماله يا باشا.. المهم نعرف نعيش والسلام..
_: طبعا طبعا.. بس عايزك تعرف إننا خارجين من حرب كبيرة مع الأعداء.. وسلام كانت نتيجتة حرب أكبر مع الاشقاء.. وبصراحة كده أنا عايز أكبر دماغى من كل دة واهتم بنفس... آه.. أقصد بيكم أنتم..
_: تكبر دماغك؟!!! طيب وماله المهم إيه البداية يعنى بعد المؤتمر الاقتصادى؟
_: (البنية التحتية)... البنية التحتية يا مواطن هى أهم حاجة دلوقتى.. وأنا حافضل وراها انشالة 30 سنة..
_: ماشى ياباشا حلو برضة.. بس مشكلتى أنا إنى ورثت محل صغير من أبويا اللى أخد بالنصيحة واشتغل فى الأعمال الحرة.. ودلوقتى المحل عايزين ياخدوة منى على شان الضرايب اللى زادت علية وبيقولولى إنها زادت على شان المساهمة فى البنية التحتية.. أنا بصراحة سبتهلهم وقلت أكبر دماغى أنا كمان.. وقلت أكلم سيادتك تشوفلى وظيفة فى أى مصلحة حكومية.. برضه يا باشا إن فاتك الميرى اتمرمغ فى ترابة.. مش كده برضهيا باشا .. يا باشا... يا باشا....
*****
2010
_ (مصرى شاب): ألو... أكلم مصر لو سمحتم؟
_: (هذا الرقم مرفوع دائما من الخدمة_ أنت ما زهقتش _ ولو حبيت تكلم مصر _ وبرضة ماحدش حايعبرك _ الرجاء الاطلاع على موقعنا الإلكترونى _ ده لو عندك كمبيوتر أصلا _
www.masr marfou3a da2ma mn al5dma.com