إحم إحم

باريس..رايح..جاي !

ودي يامه محتاجة سؤال طبعا بينبت
- أهو ده إللي حصل مع أبوك بالظبط واضح ان التراب اتكوم عليه وأول ما جات عليه الميه قام نبت علي طول.
مكالمة من أمي في البلد
طمني ياولدي وصلت باريس بالسلامة؟
وصلت يامه الحمدلله طمنيني عليكي وعلي ابويا عاملين إيه؟
بنكح تراب ياولدي
وإيه الجديد يامه ماطول عمرنا بنكح تراب
لا مش قصدي التراب ده أنا قصدي تراب بجد تراب طين يعني
ياساتر يارب طين إيه بس وتراب إيه إللي بتتكلمي عنه
طبعا ماهو أصلك قاعد عندك في بلاد النعيم النضيفة ومشوفتش زعابيب أمشير عاملة فينا إيه هنا..وكله كوم وإللي حصل لأبوك كوم تاني
خير يامه قلقتيني ماله أبويا
- التراب فضل يتكوم علي جسمه قام قال ادخل اخدلي دش انزل التراب لكن الميه معملتش حاجة من كتر التراب قام أبوك طلع من الحمام زي مادخله ومن الغيظ دخل تحت البطانية نام ولما بنصحيه الصبح لقينا زرع منبت في جسمه
زرع؟ كلام ايه ده يامه؟
- وغلاوة الشانزليزيه وبرج ايفل إللي عمري ماحلف بيهم كدب زيمبؤلك كده..زرع وشكله كده ملوخية كمان
يامثبت العقل والدين يارب..يامه اعملي معروف راعي اني في غربة ومش مستحمل الخزعبلات دي..هو انتي رجعتي تاني تتفرجي علي ريهام سعيد؟
- خزعبلات ياعديم الأدب؟ هي دي آخرتها انت فاكرني خرفت ولا ايه؟
لا يامه لاسمح الله بس يعني كلامك ده غريب شوية
- أديك في فرنسا بلد العلم والعلماء اخطف رجلك لغاية معهد لويس بشكير واسألهم
ههههه الله يحفظك يامه قصدك لويس باستير باستير مش بشكير..أسألهم عن ايه بقي؟
- اسألهم لما التراب الكتير ييجي عليه ميه مش بينبت زرع علي طول؟
ودي يامه محتاجة سؤال طبعا بينبت
- أهو ده إللي حصل مع أبوك بالظبط واضح ان التراب اتكوم عليه وأول ما جات عليه الميه قام نبت علي طول..الظاهر ياولدي بقي ان احنا البني آدمين من كتر التراب هنتحول لتربة خصبة للزراعة
طب اشمعني أبويا يعني..مش التراب ده جه عليكم كلكم؟
- أيوه فعلا بس أبوك هو إللي عمل شجاع وقال ادخل استحمي
يامه ده سد بارليف نفسه وقع بالميه ولا هو يعني التراب إللي جه علي أبوياأكتر من تراب خط بارليف؟
- يابني أيام خط بارليف كانت الميه قوية وقدرت توقع التراب لكن فينها الميه دلوقتي..مقطوعة طول النهار ولما بتيجي يادوب سرسوب ميعملش حاجة في التراب.ثم لو المشروع نجح وابوك نبت ملوخية احنا كده ممكن نكسب دهب من التراب ده لأن ممكن بقي تلاقيني أنا مثلا انبت بامية ولا كوسة!
طب بصي علشان منزعلش من بعضينا أجلي الحكاية دي لغاية لما أرجع وقوليلي فيه ايه أخبار تانيه في البلد
- اسكت صحيح معرفتش اللي حصل؟
اوعي يامه اعملي معروف لحسن لما كنت في باريس المرة اللي فاتت نكدتي عليا بخبر براءة مبارك
- طب خد عندك..احمد عز هيترشح في الانتخابات
لا يامه خلينا احسن نتكلم في التراب..وعلي كده تفتكري أبويا ممكن ينتج كام طن ملوخية في السنة؟