قالت لي أمي : اوعي تقولي استني تاني ده انتوا كاتبين ان الفلوس نزلت علي مصر زي النطرة وكل واحد هيطلعله بقرشين كويسين. من امي في البلد - مبروك ياولدي نجاح المؤتمر الاقتصادي.. أظن دلوقتي ملكش حجة ؟ - مش فاهم يامه ! - انت هتعمل فيها من بنها ولا ايه ؟ - يامه بلاش الروشنة دي اللي اتعلمتيها من الفيس وخشي في الموضوع ! - أهو انتوا كده يا اعلاميين لما يكون الكلام مش عاجبكم تقولوا للضيف اختصر علشان وقت الحلقة ولما يكون علي هواكم تقعدوا تسمعوا الضيف للصبح ! - هههههه يامه انتي فاكراني الابراشي ولا لميس الحديدي انا صحفي علي قدي ومليش دعوة بالتوك شو ومع ذلك أنا عندي استعداد أسمعك عمري كله ومازهقش ! - ايوه أيوه لطف الحوار شوية زي مابتعمل مني الشاذلي وطوني خليفة لما الموضوع يسخن منهم ! - يامه ياحبيبتي مليون مرة أقولك الفرجة علي البرامج دي مش كويس لصحتك عموما انا تحت امرك. - معقولة كده قعدتك في مصر تنسيك تجيبلي هدية عيد الأم. - ان جيتي للحق قعدتي في مصر نستني اسمي كمان لكن طبعا ياست الكل مش ممكن أنسي عيدك ابدا ده انا حتي لسه اهو كنت هبدأ اكتبلك مقال بالمناسبة دي. - المقال ده اكتبه لمراتك في عيد الحب ولا عيد جوازكم أنا خلاص شبعت مقالات وبعدين آدي المؤتمر الاقتصادي نجح أهو ! - يا امي انا وكل ما أملك ليكي بس ده ايه دخله ياحبيبتي بنجاح المؤتمر الاقتصادي؟ - انت هترجع تستعبط تاني؟ مش كل ماقولك تجيبلي الآي فون سكس تقولي استني لما احوال البلد تتعدل؟ - طب بس متأخذينيش يعني يامه هتعملي ايه بالآي فون سكس؟ - عايزة ادخل علي الفيس وتويتر واتشات مع خالاتك وعماتك وكمان كده عايزة أتصور سيلفي مع ابوك علشان تنشرهالنا في الجرنان ولا هم يعني اللي بيتصوروا سيلفي احسن من امك؟ - لا ياست الكل محدش أحسن منك طبعا.. استني بس عليا شوية. - اوعي تقولي استني تاني ده انتوا كاتبين ان الفلوس نزلت علي مصر زي النطرة وكل واحد هيطلعله بقرشين كويسين. - يامه الفلوس دي هيتعمل بيها مشروعات مش هتتفرق علي الناس وبعدين دي لسه في مرحلة مذكرات التفاهم. - أيوه أيوه اعمل بقي زي خيري وعمرو اديب لما الضيف يزنقهم يقوموا يقولوله كلام صعب يفهمه! - ولا صعب ولا حاجة يامه افهمالك ببساطة مش انتي مثلا قبل ماتتجوزي ابويا قعدتوا مع بعض قعدة تفاهم؟ - إن جيت للحق أنا وابوك مافهمناش بعض لغاية دلوقتي ! - خلاص ليكي عليا اشتريهولك من أول محل موبايلات يفتح في العاصمة الجديدة.. .قوليلي انتي بقي.. أمتي هتبيعي غويشتين زي ماوعدتيني علشان افك الزنقة اللي انا فيها اليومين دول؟ - اسكت مش رحت لجورج السايغ اللي باتعامل معاه لقيته باع المحل علشان بيستعد يفتح فرع جديد؟ ليك عليا أول مايفتح الفرع أبيع الغوايش علي طول. - يافرج الله..وعلي كده هيفتح الفرع الجديد فين؟ - في العاصمة الجديدة..لزق في محل بتاع الموبايلات!
