تسلم الأيادى..!!!!

- ما بحبوش يابابا
- حب إيه ياهبلة ؟!! الحب ييجى بعدين.!
- بعدين إزاى بس يابابا ؟؟!!
- زى الناس ياروح بابا
- أيوه بقى يابابا... مش بحبه.. مش هاتجوزه.. سامعنى يابابا ؟!! مش هاتجوزه..!!
- سمعتى الرعد ف ودانك يابعيدة، طول عمرك وش فقر زى امك، انا قولت هتتجوزيه يعنى هتتجوزيه، إيه رأيك بقى ؟!!
- أفهم من كده انك هتغصب عليا يابابا ؟!!
- عادى أنا ابوكى واعرف مصلحتك، ومن هنا ورايح كلمتى انا اللى هتمشى في البيت ده. فاهمانى..؟!!
- قصدك إيه يابابا ؟!!
- انتى فاهمانى كويس وعارفة قصدى، مش كفاية سمعت كلامك انتى وأمك في الجوازة اللى فاتت، أخدنا إيه بقى ؟!!
- وأنا ذنبى ايه بس يابابا ؟! ما انا اتخدعت فيه زيكم بالظبط.
- أنا م الأول قولت لك بلاش ده، مش هينفع معاكى، إنما انتى بقى سمعتى كلام امك، اشربى بقى..!!!
- يوووه.... ياماما... ياماما... إلحقينى ياماما
- فيه إيه يابت ؟ مالك مسروعة كده..؟!! كفى الله الشر.!!
- بابا ياستى..!!
- ماله بابا يابت ؟!!
- جايبلى عريس
- عريس ؟! ياندامة يادى الراجل.!.. وهى شهور العدة لحقت تخلص ؟!!!
- تخلص براحتها ياستى، وبعدين انتى شوفتينى هاجوزها له بكره الصبح ؟!!!
- طب واللى ف بطنها ياراجل ؟!!
- ماتتهدى شوية ياولية الله يهدك، انتى هتكدبى الكدبة وتصدقيها ؟!، وبعدين ولا يهمك انا هاخدك على قد عقلك واستنى 9 شهور عشان ترتاحى، طالت ولا قصرت برضه كلامى هيمشى، ارتاحى بقى واسكتى..!!
- أرتاح ؟!! وانا مالى ياخويا، دى بنتك وانت حر فيها، إنما ما قولتليش مين العريس ده اللى انت طاير بيه السما ؟!!!
- لا طاير ولا مش طاير..!!! نادي على بنتك تعمل لى كوباية شاى، عشان صدعت منك.!!!
- ألف سلامة ياخويا، يابت يانورا.. اعملى كوباية شاى لابوكى
- حاضر ياماما... عشان خاطرك انتى بس..!!
- شوفتى البت بتقول ايه ؟!!
- ياخويا بتهزر معاك.. وهى ليها مين غيرك.. ماتقولى بقى مين العريس؟!
- ياوليه اصطبرى شوية، هاقولك لما يبقى الكلام رسمى
- رسمى إزاى ياراجل ؟! هو مش طلب إيدها منك ؟!
- لسه.... لسه ياولية !
- لسه إزاى يعنى ؟!! وانت شوفته في الحلم جاى يطلب إيدها ؟!
- لا ياخفيفة، دول ناس من معارفه لمحولى بكده، وكمان شوية من صحابه.!
- تلميح..؟!!
- أيوه تلميح يا هانم، واسكتى بقى قلبتى دماغى
- وانت شكلك كده موافق عليه.!
- دا انا من ساعتها وانا مش عارف لو اتقدم بجد أوافق ولا أرفض.!
- طب ما تقولى هو مين ياراجل وريحنى.!
- طب قربى شوية أوشوشك، أحسن حد يسمعنا
- أهو ياخويا، وشوش براحتك، وحشتنى الوشوشة
- اطمنى، من هنا ورايح هنتوشوش كتير
- وشوش ياخويا وشوش
- العريس ياستى (....................... ) ارتحتى بقى ؟!
- أيوه واحنا فديك ام الساعة ياراجل ؟!
- طب وطى صوتك البت جاية
- اتفضل الشاى يابابا، بس يارب ترضى عليا..!
- تسلم الأيادى ياروح بابا..!!