أحمد عفيفي يكتب: حوار ع الماشي مع « 2013 »!!

· استني استني .. مستعجلة ليه
- ماشية عايزين مني ايه ؟

· ده انتي كنتي سنة عسل .. احلى سنة مرت علينا
- شكرا .. بس عسل ليه؟

· خلصّتينا من مرسي والاخوان .. فكرك دي شوية؟
- انا اللي خلصتكم من مرسي والاخوان .. وانا مالي .. انتوا اللي عملتوا مش انا .. انا مجرد زمن .. ولحظة محددة أجىء وأرحل وارصد ما حدث ليس أكثر

· ازاى بقى .. ده انتي الخير والبركة .. واحسن الف مرة من 2012 اللي جابت مرسي
- برضه .. يابني افهم .. مال أم 2012 واللي حصل فيها .. هى كانت راحت بنفسها وانتخبت المدعوق مرسي؟

· بتقولي " المدعوق " .. ده انتي قرفانة منه اكتر ماحنا قرفانين
- أيوه قرفانة وان شاء الله تكون 2014 سنة سودا عليه وعلى كل اهله وعشيرته

· ايوه كده الله يكرمك طمنينا .. حكم روحنا بقت في مناخيرنا .. سجناه صحيح وسجنا الرؤوس الكبيرة .. لكن طلع اللي بره اوسخ من اللي جوه
- بس الحقيقة انتوا ناس جدعان وشعب ستاته ورجالته فلة شمعة منورة

· البركة في ربنا ثم فيكي
- يابني ياحبيبي افهم .. البركة في ربنا ده اكيد .. انما انا ماليش دعوة .. انتوا ليه مش عايزين تصدقوا ان انتم اللي بتقرروا وانتم اللي بتعملوا .. لا 2012 جابت مرسي .. ولا انا 2013 عزلته وسجنته .. انتم .. السر فيكم انتم .. عايزين تغيّروا وتتغيّروا ؟ .. حتقدروا .. مش عايزين ؟ .. اللي بيشيل إربة مخرومة بتخر على دماغ اهله.

· عندك حق .. بس افهم من كده انك ماشية مبسوطة مننا كشعب زي مابتقولي ستاته ورجالته جدعان
- ايوه .. بس لازم تكملوا .. اسوأ شىء انك تقف في نص الطريق .. حتلاقي كل اللي عملته انقلب عليك قلبة سودا

· ياساتر يارب .. ايه يا 2013 .. الملافظ سعد .. وحياة ابوكي احنا مش ناقصين قلق .. اللي فينا مكفينا
- بلاش نبرة اليأس والارهاق دي .. انتوا عملتوا اللي شعوب العالم مقدرتش تعمله .. ودي لوحدها تخلي راسكم مرفوعة في السما والكل يعمل لكم الف حساب.

· لكن اللي حصل بعد ثورة 30 يونيو مكناش نتخيل انه حيبقى بالاجرام ده
- يا اخي حط نفسك مكان الاخوان .. تخيل كده واحد كان شحات ومش لاقي ياكل ولا لاقي حتة ينام فيها .. قام في لحظة " مسروقة " لقى نفسه ساكن في قصر وعنده خدم .. وبياكل بط ووز وحمام محشي بالفريك وخرفان محشية باللوز والجوز وعين الجمل .. قمت انت ضربته على قفاه وطردته من الجنة اللي كان عايش فيها ، وياريتك رجعته الشارع اللي كان جي منه .. ده انت قمت مرجعه السجن .. وبدل البط والوز والحمام .. بقى ياكل فول وعدس اصفر ويشتهي حتة اللحمة ويشوفها يضرب لها تعظيم سلام

· يعني عايزه تقولي ان اللي بيحصل ده طبيعي ؟
- طبعا .. واللي مش طبيعي انكم تتخيلوا سيناريو تاني غيره

· بس ايه اخرتها مع أم اللي خلفوهم؟
- انتوا اللي تقرروا .. وفيه مثل عندكم بيقول اضرب الحديد وهو سخن .. لكن حكومتكم استنت كتير لما الحديد برد ع الأخر .. قامت الضربة محققتش المطلوب كما ينبغي .. لو كانت جات في وقتها كنتوا اختصرتم الوقت ويمكن كان دلوقتي عندكم مجلس شعب ورئيس.

· بما انك جبتي سيرة الرئيس .. عايز اقولك كان نفسي متمشيش وترحلي قبل ماتفرحي معانا به.
- قصدك السيسي يعني .. ؟

· وهو فيه غيره .. ؟ طبعا قصدي السيسي
- طيب وافرض مجاش السيسي .. الدنيا تخرب والنور ينطفي والفرح يخلص وينقلب ميتم؟

· فال الله ولا فالك .. قلت لك قبل كده الملافظ سعد .. وانتي مش عايزه السيسي ليه؟
- وانا مال أمي ومال السيسي .. انت ليه مش عايز تفهم .. إش دخلي انا كسنة جات وراحت بمصير دولة زي مصر؟

· طيب فهمت .. انتي عايزة تقولي ايه؟
- عايز أقول ان السيسي بتاعكم فعلا راجل وقائد وزعيم مليون في المية .. بس لازم تكونوا عاملين حسابكم لو مجاش لأى سبب كان .. مين البديل .. هو ده السؤال اللي لازم تنشغلوا به من دلوقتي

· والله ياست الكل .. بحثنا وطلعت عين اللي خلفونا .. بس فعلا مفيش غير السيسي .. وكل ماعداه كروت محروقة .. لاتنفع طبلة ولا مزمار
- خلاص .. مادام مصممين عليه .. هاتوه

· وافرضي قال لأ .. مش عايز
- مش حيقدر يقول لأ

· ليه يعني واحنا كنا ماسكين عليه ذلة.. قراره وهو حر فيه
- لأ .. مش قراره .. هو قال لكم قبل كده .. عايز منكم أمر .. وهو راجل عسكري وعارف يعني ايه الأوامر في الجيش .. التنفيذ دون مناقشة .. فأمروه أمر .. مصر محتاجة لك واحنا معاك وفي ضهرك .. وليس من حقك ان ترفض

· فكرك كده ؟
- مفيش غير كده .. انتم أدرى مني بمصلحة بلدكم .. شايفين مفيش غير السيسي اللي ينفع في المرحلة دي .. هاتوه واذا رفض أأمروه .. وهو واضح عليه انه معجون بحب مصر وشعب مصر .. ولازم يرضخ لإرادة اهله وناسه اللي بيحبوه.

· روحي ياشيخة ربنا يكرمك .. بس متنسيش توصي علينا 2014 .. عايزنها كده حنينة وحلوة زيك
...... ابتسمت وقالت وهى تودعني : مفيش فايدة .. قلت لك السنة مش هى اللي بتعمل .. انتم اللي بتعملوا وتقرروا .. عموما .. ربنا يوفقكم ويصلح حالكم .. انتوا شفتم سنين سودا كتير .. بس لأنكم شعب بجد عظيم .. ربنا كرمكم .. وحيكرمكم .. قولوا يارب .. سلامو عليكم.