كنباوي وكنباوية.. حلقة رقم (125).. الإخوان على دين قادتهم!

كنباويه تجلس في الانتريه، تضع المانيكير في اظافر يديها وقدميها وتدندن بأغنية ام كلثوم ( قولي اية حلو في حياتي وانت غايب عن عنيا السهاد انا فيه ليلاتي والبعاد طول عليا ) يسمعها كنباوي وهو يدخل من باب الشقة فينتشي ويبتسم وتنفرج اسارير وجهه ويقترب من كنباويه ليقبل رأسها وهي تبتسم
كنباوي: لمين الكلام الحلو ده ؟
كنباويه: ليك طبعا انت بتوحشني وانت معايا وشوقي بيزيد وانت بعيد عني انا روحي فيك ياكنباوي
كنباوي: وانا كمان روحي فيكي وانتي مش مراتي بس انتي حبي الوحيد وحياتي من غيرك مالهاش معني انتي طعم الحياة ولونها وبهجتها انتي سؤر السعاده انتي الامل والرضا والقناعه انتي اللي بتعنيني بحبك اني اتحمل أي ظروف صعبة بمر بيها
كنباويه: بس بس بس ايه ده كله ياراجل انا كده اتمرع ايه الكلام الحلو ده انا ما اقدرش على كده
كنباوي: انتي تستاهلي اكتر من كده وكل كلام الدنيا الحلو قليل عليكي بس قوليلي ايه آخر الاخبار ؟
كنباويه: اللي بيحصل كل يوم، القبض على قيادي جديد
كنباوي: ايه همه مابيخلصوش ؟ ماسورة قيادات اخوانيه وضربت في البلد ؟
كنباويه: معلش بكره يتلموا ونخلص منهم ونرتاح مفيش شيئ بيجي بالساهل وده نتيجه أن الانظمه اللي فاتت سابتهم يكتروا ويتشعبو زي السرطان في البلد لكن اللي حضر العفريت يصرفه يا اما يسيبه يقرفه
كنباوي: سيدي ياسيدي على احلي كلام من احلي شفايف
كنباوية: اقوم احضر لك الاكل؟
كنباوي: مش قبل ماتقوليلي انتي زعقتي للراجل اللي اسمه نصر ليه امبارح وهونازل على السلم هو قابلني واشتكالي منك
كنباويه: انا الراجل ده زهقانه منه وقرفانه منه وبتلككله
كنباوي: ليه كل ده علشان هو إخواني ؟
كنباويه: ايوة ياكنباوي انا ماعدتش بطيق أي إخواني لا وكمان ساكن في بيتنا المسالم اللي مايعرفش غير الحب والخير للناس بسمعه دايما بيسب الجيش والداخليه وكل واحد كاره الإخوان ده مجنون متخلف لسه بيتكلم عن المشروع الإسلامي وانا نفسي افهم كان فين المشروع الإسلامي ده في حكم مرسي والإخوان دول اقول ايه مرتزقه منافقين الإسلام برئ منهم وبعدين هو فيه حد يكره الإسلام والدوله الاسلاميه بس مين يكون قائم عليها
دول امثال البلتاجي والعريان والشاطر وحجازي وحسان وابو إسماعيل وبديع دي حاجه تكسف همه فاكرين نفسهم مين ابوبكر الصديق وعمر بن الخطاب وعلي بن ابي طالب وعثمان وعمر بن عبد العزيز وبن حزم ولا ايه ؟مالك والشافعي وبن حمبل دول غلبوا الكفار في جهلهم وغباؤهم احنا نسلم نفسنا لدول مستحيل طبعا ولا القرضاوي القطري الإسرائيلي اللي بيتاجر بالدين والراجل الاهبل ده اللي اسمه نصر واخده مثل اعلي وبيقول أن الناس ظلماه ولو حد قرأ كتبه كان عرف قيمته ده متخلف لأن اللي كتبه ماتضاهيش افعاله يبقي منافق وبيتاجر بعلمه وبدينه والقرضاوي كده بالضبط اقول ايه ولا ايه ياكنباوي القلب مليان وساكت على وهم الإخوان في مشروعهم الإسلامي والاهبل اللي اسمه اردوغان بيجعجع ويشجع فلول الإخوان على عصيان ارادة شعب مصر خايف يحصل معاه في تركيا اللي حصل مع الإخوان في مصر كلاب اغبيا ياكنباوي مين قال أن كل اللي بيطالب بفصل الدين عن السياسه والدوله كافر ؟ مين اللي قال أن اللي يطالب بالدوله المدنيه علماني مش همه دول شوية المتخلفين الله يلعنهم في كل كتاب ورونا الويل معاهم ربنا ياخدهم ويريحنا منهم كفايه على مصر وسطيتها وسماحتها ومحبتها كفايه غلواء وتطرف وزفت على دماغ ابوهم مطرح ماهمه قاعدين اسكت ياكنباوي انا كويس اني ماقلعتش الشبشب وضربت الراجل ده بيه على دماغه بس الشبشب انضف منه انا هزئته بس علشان لقيته بيرمي ورقه على باب شقتنا
كنباوي: ياكنباويه حرام عليكي تمرمطي الراجل علشان ورقه رماها من غير مايقصد اوحتي يقصد على باب شقتنا انتي بتتلكيكيله ياكنباويه
كنباويه: ايوة ياكنباوي انا بقي بتلككله عايز حاجه ؟
كنباوي: لا ياكنباويه عايز سلامتك
كنباوية:ايوه سبني براحتي ده صنف عايز السك على قفاه صنف يخاف مايختشيش
كنباوي: انا جعان
كنباويه: خلاص حقوم احط اكل ليا وليك
كنباوي: ياريت ياكنباويه بسرعه
كنباويه: واسرع مما تتصور هو انا اقدر اسيبك جعان ياحبي
كنباوي: سبحان الله اللي يشوفك وانتي بتتكلمي على نصر الإخواني مايشوفكيش وانتي بتتكلمي معايا دلوقتي بحنيه
كنباويه: انت حاجه والإخواني حاجه انت الحب وهو الغل والكره افهم بقي
كنباوي: خلاص فهمت
كنباويه: يارب تكون فعلا فهمت
كنباوي: لأ اطمني فعلا فهمت !