كنباوي وكنباوية.. حلقه رقم (123).. بقايا الإخوان !

كنباوية في المطبخ منهمكة في تحضير وتجهيز طعام اليوم والمطبخ يخبط يقلب وكنباوي يدخل عليها ضاحكا
كنباوي: ياساتر يارب، إيه إنتي بتطبخي ولا داخلة حرب ؟ إيه كل الحلل والمواعين دي ؟
كنباوية: أعمل إيه عيالك بيتوحموا اللي عايز ممبار وكوارع والللي عايزة محشي كرنب وقلت بالمرة أعمل حلة لحمة وصينية رقاق باللحمة المفرومة
كنباوي: ليه كل ده العيد جه ؟ ولا عاملين عزومة ؟
كنباوية: يلا خليكوا تاكلوا وتنبسطوا وبالهنا والشفا
كنباوي: إيه آخر الأخبار عندك
كنباوية: بقي ده وقته ياكنباوي أحكيلك أخبار إنت مش شايفني مربوكة قد إيه؟
كنباوي: أهه بنتساير وإنتي بتشتغلي
كنباوية: بص ياسيدي لسه فيه شويه متخلفين من جماعة وأنصار الإخوان بيطلعوا بمظاهرات بس أنا متأكدة إنه شوية وحيبطلوا لما يلاقوا مفيش فايدة من اللي بيعملوه ده
كنباوي: فكرك كده ياكنباوية؟ يعني شوية والليلة دي تتفض وتتلم ؟
كنباوية: طبعا بس همه هايجين دلوقتي بسبب أن مبارك خد إفراج وبقي تحت الإقامة الجبرية وفيهم عبط بيقولوا إن السيسي حيرجعه للحكم تاني شوية متخلفين مش فاهمين همه بيقولوا إيه زي عوايدهم، كنباوي: مبارك مين ده اللي يرجع للحكم تاني هو إحنا كنا بنلعب ولا بنلعب ؟ ولا 25 يناير ماكانتش ثورة ؟ وكانت زوبعة في فنجان ؟ مبارك خلاص راحت أيامه وسنينه بس الواجب يحتم علينا إننا نخرجه من السجن راجل مسن ومريض يقضي بقي اللي باقي من عمره في بيته وسط أهله بدل مرمطة السجون والأيام أثبتت لنا أن جزمته برقبة أي إخواني وأولهم محمد مرسي.
كنباوية: في دي عندك ومعاك حق مبارك برقبة الإخوان كلهم
كنباوي: ماهو الواحد لازم كان يجرب علشان يعرف الكويس من الوحش ويشوف الدنيا والناس على حقيقتها واديكي شايفة اللي شوفناه موسي طلع فرعون يعني ماحدش مضمون إلا بعد التجربة بس بيني وبينك يابنتي أوسخ تجربة عاشها المصريين كانت تجربة الإخوان ولاد الهرمه
كنباوية: ولاد ستين في تسعين دول كفروا سيئات أهالينا معاهم السنة اللي فاتت ولسة مكفرينا ربنا يسهل ونخلص منهم بسرعة
كنباوي: حنخلص منهم هانت خلاص أهم بيقعوا واحد واحد زي الجراد
كنباوية: على قولك كل يوم أقوم من النوم على خبر واحد جديد ممسوك منهم أفرح وينشرح قلبي
كنباوي: يارب ينشرح قلبك أكتر وأكتر بكرة يقبضوا على المغير والبلتاجي والعريان وتفرحي فرح السنين
كنباوية: ندر عليا لو ده حصل لأعمل ندر وأفرق رز بلبن للشارع كله
كنباوي: رز بلبن للشارع كله؟
كنباوية: أيوه ماتستغربش الغل اللي في قلبي من ناحية البلتاجي يخليني أفرق على القبض عليه مش رز بلبن لأ وفتة ولحمة ورز كمان.
كنباوي: لا رز بلبن أرحم خليها رز بلبن مقدور عليه بس ربنا يسهل ويقبضوا عليه
كنباوية: يارب ياكنباوي يارب
كنباوي: كل شيء بأوانه بإذن الله وحيقبضوا عليه لأنه يستاهل القبض لأنه مش بني آدم ده منافق خوان كداب.

كنباوية: أديني مستنية أهه ممكن تسبني بقي أعمل المحشي والممبار والكوارع
كنباوي: حاضر حسيبك أهه وشهلي يلا وأكلينا من الأصناف الحلوة اللي انتي عملاها دي
كنباوية: حاضر ياكنباوي كلها ساعة زمن وتدوق أحلى أكل في حياتك
كنباوي: واثق من كده هو فيه أحلى من أكلك في الدنيا ديا ياكنباوية
كنباوية: أيوه أيوه أبلفني وكل بعقلي حلاوة.
كنباوي: حلاوة إيه ياكنباوية إنتي يتاكل بيكي بغاشة
كنباوية: كتر خيرك ياكنباوي دايما جابر بخاطري وناصفني يلا قوم خليني أكمل الأكل
كنباوي: حاضر ياكنباوية !