خالتي شرعية.. حلقه رقم (7).. مرسي رئيس جمهورية رابعة العدوية!!

بهية تنصت على الضجيج القادم من شقة شرعية الإخوانية وتسمع أطفالها يهتفون يحيا مرسى رئيس جمهورية مصر العربية، فتضحك بهية وتنادى على أطفال شرعية، وتقوم بإعطائهم بعض الحلوى، وتقول لهم اهتفوا يحيا مرسى رئيس جمهورية رابعة العدوية، فيستمع لها الأطفال ويقومون بالهتاف الجديد يحيا مرسى رئيس جمهورية رابعة العدوية، فتضحك بهية، فتسمع شرعية أطفالها وتنهرهم وتعلم أن بهية هى التى طلبت من أطفالها تغيير الهتاف الأول إلى هذا الهتاف الجديد فتذهب لها لتوبخها وتعاتبها..
شرعية: ازاى تسلطى العيال يتريقوا على رئيسنا؟ دة يصح؟
بهية: أيوة يصح، وبعدين أهة إنتى قولتيها بنفسك لرئيسنا يعنى مرسى رئيسكم إنتم مش رئيسنا إحنا المصريين
شرعية: إنتم المصريين أمال إحنا إيه؟ إنتم صنفتونا إيه؟
بهية: إنتم مالكمش تصنيف إنتم كائنات غير معلومة المصدر أو التكوين إنتم ألعن من الشياطين وطبعا مش ملايكة ولا بنى آدمين لأن البنى آدمين ما بيعملوش اللى إنتم بتعملوه ده كل يوم فى سينا بقتلكم لجنود مصر وظباطها حتى المدنيين ما بيسلموش هناك من أذاكم.
شرعية: أنا خلاص كلها أيام واعزل ونرتاح من بعض
بهية: يا ريت وربنا يقرب البعيد
شرعية: للدرجة دى قرفانة من وجودى جنبك؟ ده النبى وصى على سابع جار .
بهية: ده لما يكون فعلا جار ويعرف أصول الجيرة لكن إنتى اللى بيقولوا عليه الجار السو، يا يرحل يا تجيله مصيبة من عند ربنا تجيب أجله.
شرعية: إيه كم الجرأة دى والبجاحة دى اللى إنتى بقيتى فيها؟
بهية: ما خلاص الواحد لما بيفيض بيه بيعمل اكتر من كدة وأنا خلاص فاض بيا منك ومن الإخوان كلهم وما بقتش حسكت عليكم ولا على عمايلكم السودة تانى.
شرعية: كل ده علشان إحنا بندافع عن الرئيس محمد مرسى؟
بهية: لا إنتم مش بتدافعوا عن محمد مرسى إنتم بتدافعوا عن الكرسى مرسى ما يفرقش معاكم اللى يفرق معاكم هو الكرسى حلمكم وأملكم.
شرعية: ومرسى إيه والكرسى إيه؟ ما الاتنين واحد .
بهية: عندك حق الاتنين خشب، والاتنين جماد ما بيحسش وهو لو كان بيحس كان ساب البلد توصل للحال ده؟ ده كان تنحى وساب الحكم من نفسة مش يستنى لما الجيش يشيله ويعزله كدة ويبقى منظره وحش لكن طمعه فى الكرسى هو اللى عمل فيه كدة ووداه فى داهية وجابه ورا وحيفضل طول عمره ورا بإذن الله.
شرعية: بكرة الأمور تتغير ومرسى يرجع تانى
بهية: بتوع رابعة عملوا كعك حجازى؟
شرعية: إنتى بتتريقى علينا يا بهية؟
بهية: ماهى حاجة تجنن اللى مايتجننش؟ الدنيا خربانة ورئيسكم محبوس وشاطركم كمان وكتاتنيكم شرحه وحجازى عايز يعمل كعك العيد؟ بقى ده مش جنان رسمى وهبل وعبط؟
شرعية: بلاش نفرح زى باقى المسلمين بالعيد؟
بهية: ما قلناش كدة افرحوا زى ما إنتم عايزين بس فى بيوتكم واعملوا الكعك ده فى بيوتكم وإن شالله تعملوا كمان بسكوت وغريبة وبتى فور وقرص ما حدش قال لكم ما تعملوش بس فى الشارع لأ مرفوض الناس هناك فى رابعة قرفت منكم وهمة ذنبهم إيه فى اللى بيحصل ده كله؟
شرعية: ذنبهم إنهم من الشعب اللى رفض مرسى.
بهية: إنتم بتنتقموا من سكان مدينة نصر ولا من شعب مصر؟
شرعية: يعنى حنعتصم فين ما إنتم أخدتوا التحرير وإحنا أخدنا ميدان النهضة ورابعة العدوية وكدة عدل ربنا.
بهية: لأ مش عدل، وعدل ربنا إنكم تسيبوا رابعة وتتوكلوا على اللى إنتم عايزين تتوكلوا عليه إن شاالله يكون الشيطان بس الكلام ده فى بيوتكم مش فى ميادين البلد هى مش ناقصة قرف ولا إنتم حتقرفونا وإنتم فى الحكم وبرة الحكم كمان؟
شرعية: إنتم لسه شوفتم قرف، ده القرف لسه جاى ورا.
بهية: طيب يالا يا بنت الأبالسة روحى على شقتك وانكشحى من قدامى بدل ما أطبق فى زمارة رقبتك ما أسيبهاش إلا لما السر الإلهى يطلع فى إيدى.
شرعية: أهه أنا ماشية وسيباهالك مخضرة.
بهية: فى ستين داهية.
شرعية: كتر خيرك.
بهية: أيوه أهه ده خيرى وهو ده اللى دايما حتلاقية عندى لحد ما تعزلى من هنا ونرتاح من قرفك ومن كلامك ومن أفكارك الملوثة دى.
شرعية: تصمت ولا ترد على بهية غضبها وإهانتها وتخرج فى صمت إلى شقتها وأطفالها الصغار!