خالتى شرعية.. حلقة رقم (6).. جهاد النكاح !!

بهية: بمناسبة إنك اسمك شرعية إيه حكاية الخلوة الشرعية دي اللي سمعنا عنها في رابعه العدوية ؟
شرعية: وماله ماهو الواحدة لما تعاشر جوزها في أي مكان فيها إيه دي ؟
بهية: فيها كتير فيها أن المعاشرة الزوجية في البيت مش في خيمة في وسط الشارع والرايح واللي جاي ممكن يسمع أو يتصنت على اللي جوه الخيمة وبعدين هى حبكت ده احنا في شهر رمضان شهر الصيام يعني ممكن رجالتكم تستحمل شوية وبعدين سيبك من الخلوة الشرعية دي إيه حكاية المحاضر اللي اتعملت للإخوان في قسم شرطة مدينة نصر دي من بنتين بيقولوا إن الإخوان كانوا عاوزين يغصبوهم على الجماع تحت اسم جهاد النكاح
شرعية: وفيها إيه يعني ما جهاد النكاح مباح
بهية: حللتوا كمان جهاد النكاح ؟ انتم رايحين تدافعوا عن الشرعية وتطالبوا بالحكم ولا رايحين تتهببوا على عينكم همه دول الإخوان الأفاضل ؟ إخص عليكم الله يكسفكم لكن باين عليكم وشكم مكشوف مابتتكسفوش
شرعية: ده حق رجالتنا اللي شايلين همنا وبايتين في الشارع علشان يرجعوا لنل حقنا اللي انتم استوليتوا عليه بغير وجه حق
بهية: حق إيه جاتكم كسر حقكم من امتى والإخوان ليها حق في حكم مصر دي كانت غلطة واحنا بنحاول نصلحها وانتم مالكمش إلا السجون والشغل في السر زي زمان
شرعية: بكره احنا راجعين
بهية: ابقى قابليني ده عشم إبليس في الجنة
شرعية: لأ انتم اللي حتخشوا الجنة يا سافرات يا متبرجات يا ملحدين يا ناسيين ربنا
بهية: كفرتونا كمان.. هو احنا اللي ناسين ربنا ولا انتم اللي بتستبيحوا القتل علشان توصلوا للحكم ؟
شرعية: ماهو حنوصل للحكم يعني حنوصل بأي طريقة كانت
بهية: ما أنا عارفة انكم بتطبقوا خطة "هوجو تشافيز" سياسة الضغط والنفس الطويل واللي يستحمل يقعد في الشارع أطول فترة ممكنة هو اللي حيفوز وحيكون وسيلة ضغط على الرئاسة أصحاب القرار علشان مطالبهم تتحقق بس ده بعيد عن شناب رجالتكم إذا كان ليهم شناب أصلا وبعدين روحوا شوفوا الأمراض اللي اتنشرت بينكم في رابعة دي حتعملوا فيها إيه ؟
شرعية: إيه يعني شوية جرب فيه دكاترة هناك بيعالجوه
بهية: اه إيه يعني شوية جرب وشوية تيفود وشوية كوليرا ده وباء حيضركم ويأذيكم من غير ماتحسوا ذنبهم إيه الناس الغلابة اللي بتأجروهم من المحافظات علشان يزودوا عددكم وبتستغلوا فقرهم وبتدوهم يومية وبتأكلوهم وساعة الخطر بتحطوهم في وش المدفع همه اللي يموتوا بدال رجالتكم الجبنا
شرعية: احنا ما بنضربش حد على إيده همه اللي مقتنعين بأهداف الإخوان وهمه اللي بيدافعوا عن مرسي رئيسهم
بهية: دول غلابة مساكين محتاجين وعمر مرسي ما كان رئيسهم في يوم من الأيام هو من امتى كان حس بيهم ده عمره ما شافهم طول مدة حكمه ولا لفتوا حتى انتباهه لا من قريب ولا من بعيد مرسي ماشافش غير نفسه وغير جماعته ده حتى ديون المزارعين البسيطة للبنوك اللي أقل من 10000 آلاف جنيه اللي قال إنه حيشيلها ماشالهاش وضحك عليهم وخدعهم وغشهم عايزه أكتر من كده إيه تاني ؟
شرعية: انتم علشان مش راضيين عنه بتطلعوا فيه القطط الفاطسة وغيره على قلبكم زي العسل
بهية: إذا كان قصدك على السيسي ففعلا زي العسل وراجل ملو هدومه وبيحب بلده وشعبه مش طمعان في سلطة زيكم يا ملاعين
شرعية: ولما هو مش طمعان في سلطة كان شال مرسي ليه ؟
بهية: شاله علشان كان رئيس فاشل ظالم مستبد مغرور وهو أهبل مش فاهم حاجة خالص
شرعية: ده كان رئيس ملو هدومه
بهية: رئيس مين ده كان رجل كنبة، شيرز، أومقطف بودان انتي بس اللي مش واخدة بالك فوقي يا شرعية قبل فوات الأوان
شرعية: لكم دينكم ولي دين أنا على عهدي مع مرسي
بهية: هو مرسي ده رسول الله اعقلوا بقى وبطلوا الجنان والخبل اللي انتم فيه ده
شرعية: لما انتم تعقلوا الأول وترجعوا الشرعية
بهية: ما الشرعية رجعت بس انتم مش شايفينها الشرعية أن الحكم للشعب والشعب قال كلمته ويعوض عليكم ربنا في الحكم وسنته
شرعية: بكره نشوف آخرتها إيه ؟
بهية: آخرتها حبس الإخوان إن شاء الله ورجوعهم للسجون من تاني طول ما انتم بتعملوا على خراب البلد
شرعية: انتم اللي خربتوها لما وقفتم ضد مرسي
بهية: مرسي هو اللي وقف قدام نفسه وقدام الشعب واللي يقف قدام الشعب لازم ينداس تحت أقدام الشعب !