خالتي شرعية.. الحلقة الثالثة

شرعية: عارفه يا بمبه لما "القرضاوي" يقول إن اللي عمله الجيش والسيسي مع مرسي غلط وغير قانوني وغير شرعي يبقى لازم نصدق إن مرسي على حق والسيسي على باطل
بمبه: مش قرآن كلام القرضاوي مش قرآن يا شرعية دي فتوى مش قايمة على حقيقة دي فتوى على ضلال لأن الحقيقه بتقول إن اللي شال مرسي مش انقلاب على الشرعية اللي شال مرسي غطرسته وغروره واستقوائه بالجماعة وعمر الجماعة ما تقدر تواجه ثورة شعب، الشعب قال كلمته قال إنه رافض حكم الإخوان ورافض إنه يكون رئيسه رئيس فاشل
شرعية: فشر ما تقوليش كده ده رئيسنا مرسي رئيس ملوي هدومه قيمة وسيما
بمبه: سيما إيه ده خلانا فرجة العالم من حوالينا بأفعاله وأقواله وتصرفاته وقراراته
شرعية: ده كفايه إنه قطع العلاقات مع سوريا ورفع راس مصر
بمبه: رفع راس مين ده وكسنا ده كان تصرف أحمق علشان يراضي أمريكا والسلفيين والجهاديين بقى يقطع علاقاتنا مع سوريا اللي كان فيه اتحاد بينا وبينها من أيام جمال عبد الناصر ده تخلف وعدم فهم وعدم دراية سياسية وجهل سياسي وغباء رئاسي
شرعية: أهو إنتم كده كل حاجة عملها مرسي كانت بالنسبة لكم كخه وغلط
بمبه: إحنا ما اتجنيناش عليه هو اللي تصرفاته كانت حمقاء بقى فيه رئيس عاقل يعين محافظين إخوان وقت احتقان الشعب واتهامه ليه بتمكين الإخوان ده مجنون ده ولا إيه؟ ولا ماكانش همه الشعب يقول إيه أهه الشعب هو اللي عزله وخلعه وشاله اوعوا تكونوا فاكرين إن السيسي هو اللي شال مرسي اللي شال مرسي جهله وسماعه كلام مكتب الإرشاد لو كان بص للمصريين وسمع كلامهم كان زمانه قاعد لسه في الاتحادية مش محبوس ومتحددة إقامته كده
شرعية: بكره خارج بالسلامة
بمبه: لا وانتي الصادقة بكره خارج بالندامة على الأملة اللي كانت في إيده وضيعها منه بغباوته يا ساتر يا رب على جبروت ونمردة البني آدمين اللي يشوفه يوم ما مسك الحكم ويشوف المسكنة اللي كان فيها ما يقولش إن ده اللي اتنمرد واتفرعن كده في خطابه الأخير اللي هدد فيه المصريين مفيش رئيس جه قبل كده واستجري إنه يهدد المصريين ده كان لازم يتعالج واللي عمله معاه الجيش علاج علشان يعرف إن المصريين ما بيتهددوش ولا أي جماعة تقدر عليهم حتى لو كانت المافيا مش جماعة الإخوان وإن الجيش المصري جيش مصر وأهل مصر وشعب مصر جيش الرجالة البواسل الشجعان
شرعية: ما الجيش ده انضرب قدام الحرس الجمهوري وبكره ينضرب كمان وكمان وحنغلبه
بمبه: أكيد إنتم مجانين مخابيل مهابيل علشان تفكروا تحاربوا جيش مصر ولو انتم قدرتم تغلبوا جيش مصر يبقى الجيش يروح يلبس طرح ويبقى كده جيشنا جيش ورق أو كسر رخام
شرعية: انت ماتعرفيش أنصار مرسي قد إيه؟ أنصار مرسي ألوف مؤلفة حنكسر شوكة الجيش وحندوخه ونقلقه لحد ما يرجع مرسي
بمبه: ربنا يشفيكي ويشفي الإخوان كلهم وخصوصا البلتاجي وصفوت حجازي انتي عارفه مستشفى المجانين اتعملت للي زي دول وبكره حيدخلوها بإذن الله الواحد الأحد
شرعية: بقي عاملين برامج تتريقوا فيها على الشيوخ والإخوان وقاعدين تتفرجوا عليها وتضحكوا بكره تعيطوا لما نرجع نمسك الحكم من تاني ونحطكم في السجون ونقفل لكم القنوات دي
بمبه: بكره بتاعكم ده مش حييجي لانه مستحيل عارفه ليه؟ لأنكم مش صادقين منافقين كدابين مش بتحاربوا ولا بتدافعوا عن الدين انتم بتحاربوا علشان الكرسي والسلطة والنفوذ ما هي أول مرة تطولوها وماقدرتوش تحافظوا عليها خايبين انتم مالكمش في السياسة انتم كبيركم الاجتماعات السريه والاغتيالات والكدب والتزوير والتلفيق زي صور الاطفال المتركبة اللي عرضتوها على الفيس بوك وقلتوا إن دول أطفال الإخوان اللي ماتوا في هجومكم على الحرس الجمهوري
شرعية: أحسن احنا حنعمل كل حاجة تخليكم قصاد الناس أشرار سفاحين والجيش قتل وخاين
بمبه: انتم اللي أشرار وقتلة وسفاحين انتم اللي قتلتم الضباط والجنود انتم اللي قتلتم معارضي مرسي انتم اللي قتلتوا الأطفال في سيدي جابر ورميتوهم من فوق السطوح انتم اللي مفيش في قلوبكم رحمة انتم ملاعين والجيش صابر عليكم والقيادة السياسية عاوزه تراضيكم وتعمل معاكم مصالحة مع انكم مالكمش أمان خوانين العهود والوعود انتم تعابين وعقارب ماحدش يآمن لكم ابدا غدارين انتم ما ينفعش معاكم غير الحلول الأمنية الحلول السياسية مش ليكم ولا للي زيكم بس ياريت الناس تفهم كده
شرعية: كل ده جواكي وساكتة؟
بمبه: ساكتة غلب بس خلاص فاض بيا منك ومن عمايلك وأقوالك انتي إيه مغيبة؟
شرعية: ده انتم اللي مغيبين انتم اللي مش فاهمين حاجه
بمبه: احنا برضه اللي مغيبين ده انتم اللي عايشين في البلاله ومصدقين شويه شيوخ بدقون منظر منافقين مع مصلحتهم
شرعيه: احنا راجعين راجعين
بمبه: أحلام ابقوا اتغطوا وانتم نايمين كويس علشان ماتستهووش!