خالتي شرعية.. الحلقة الأولى

شرعية: بقولك إيه يابمبه خدي بالك من العيال أنا عملت لهم أكل يقضيهم يومين والنبي تشقري عليهم أصلي نازله دلوقتي ويمكن أبات بره.
بمبة: تباتي بره ! ليه كفى الله الشر هو أبو الولاد تعبان ولا حاجه ؟
شرعية: لا أبو الولاد بخير بس أنا رايحه أقف جنبه، ده واجب الست ناحية جوزها وأبو عيالها.
بمبة: إيوه بس أنا كده مش فاهمه حاجه، هو جوزك بيحارب ؟
شرعية: إيوه بيحارب.
بمبة: بيحارب مين ؟
شرعية: بيحارب الكفرة، الفاسدين، المنافقين، العلمانيين، الصليبيين، اللي لايعرفوا ملة ولا دين
بمبة: مين دول ؟ قصدك على مين ؟ أنا ابتديت أقلق من كلامك.
شرعية: قصدي على الجيش والشرطة والمسيحيين وجبهة الخراب والبرادعي وصباحي والإعلام الفاسد والقضاء الفاسد والبلطجية وأنصار شفيق وأنصار الحزب الوطني المنحل والفلول كلهم اللي مش عاوزين الإسلام.
بمبة: إنتي إيه مش بتشوفي ؟ مين اللي قال أن اللي انتي بتتكلمي عنهم دول بيحاربوا الإسلام والمسلمين القضية مش قضية إسلام الإسلام في عقول وقلوب كل المصريين وفي سلوكهم لكن اللي إنتي بتقوليه ده لايرضي مله ولا دين ولا هو كلام عاقلين إنت ياشرعية مغيبة ومعمول لك غسيل مخ، قولي لي ياشرعية إحنا بقالنا سنين ساكنين قصاد بعض عمر صدر مني في حقك عيبة ؟
شرعية: أبدا ماحصلش .
بمبة: أنا واحدة من الناس اللي فرحت لعزل مرسي أبقى كده في نظرك كافرة وصليبية ؟
شرعية: إنتي مش فاهمة ده مخطط علشان يقتلوا الإسلام .
بمبة: إسلام إيه اللي يقتلوه ! الإسلام باقي ليوم الدين كل مافي الأمر أن الإخوان ماعرفوش يمشوا البلد والبلد خربت والناس جاعت يافرحتنا برئيس بيصلي كل فرض في جامع غير التاني والبلد بتشحت.
شرعية: ماهو الإعلام هو اللي ضللكوا البلد زي الفل بس الصورة اللي وصلتكم غلط .
بمبة: الإعلام حيستفيد إيه لما يضللنا اللي ضللنا مرسي والإخوان مرسي مابناش مصنع واحد طول السنة اللي حكم فيها زود ديونا 11 مليار دولار في سنة واحدة يعني لو كان قعد 4 سنين كنا بقينا في عداد الأموات مرسي خرب البلد وجايين تقولوا على جبهة الإنقاذ جبهة الخراب ! الخراب ده جه على إيديكم أنتم أنا أول مره اعرف إنك إنتي وجوزك إخوان
شرعية: ومالهم الإخوان ؟
بمبة: على رأسي من فوق بس يانحلة لاتقرصيني ولا عاوزه عسل منك
شرعية: بقي أنا نحله ؟
بمبة: انتي دبور وزن على خراب عشه
شرعية: هي وصلت لكده للشتيمة وقلة القيمة بقي لكم صوت دلوقتي لما عزلتوا مرسي ؟
بمبة: إحنا طول عمرنا لينا صوت.. 40 مليون طلعوا في الميادين يطالبوا برحيل مرسي ده معناه إيه غير أنه كان رئيس فاشل ؟
شرعية: أنتم اللي فشلتوه.
بمبه: الفاشل فاشل من يومه بلاش ترموا أخطاءكم على شماعة غيركم، مرسي من يوم ما مسك الحكم وهو بيمكن جماعة الإخوان المسلمين من مفاصل الدولة ونسي أن مصر مش كلها إخوان مسلمين وبعدين يعني إيه إخوان مسلمين ؟ إيه التمييز الاهبل ده ؟ ماكلنا مسلمين ولا أنتم على راسكم ريشة ده إحنا أحسن منكم لأن ولاءنا لربنا وطاعتنا لربنا مش ولاءنا وطاعتنا لمرشد واقف يتكلم عن الشرعية وعودة مرسي.. ده بيحلم
شرعية: بكرة مرسي راجع .
بمبة: أنتم لازم تتعالجوا أنتم مرضى نفسيين السلطة والنفوذ دمروا عقلكم وبقيتوا مخابل
شرعية: الله يسامحك أنا مش حرد عليكي أنا لازم أنزل أروح رابعة دلوقتي
بمبة: لو قعدتوا هناك عمر بحاله مصر مش حترجع لورا تاني ومرسي ولي وراح ياريتكم تفهموا كده
شرعية: إحنا مش عاوزين غير الشرعية.
بمبة: شرعية إيه ؟ أنتم لازم تفهموا الأول يعني إيه شرعية قبل ماتطالبوا بيها وانتم مش فاهمينها خالص
شرعية: إنتي بقى اللي حتفهميني يعني إيه شرعيه ؟
بمبة: آه أنا اللي حفهمها لك بس المهم إنك تكوني إنتي عايزة تفهمي
شرعية: طيب قومي خليني أنزل لجوزي أوديله لقمة ياكلها
بمبة: الشرعية هي إقرار وتأييد الشعب لما يناسبه ويتفق مع طموحاته لا مايفرض عليه، الشرعية هي القبول العام لسلطة سياسية وقدرتها على تسيير القوانين والدساتير والقواعد المنظمة لحياة الناس، فاهمة حاجة ؟
شرعية: أقطع دراعي لو كنت فاهمة حاجة، كل اللي أنا فاهماه أن الشرعية هي الصندوق.
بمبة: الصندوق ! الشرعية اللي بالصندوق بتتزور لكن الشرعية اللي بإرادة الشعب مافيهاش تزوير والشعب طلع وقال كلمته يسقط حكم المرشد وارحل يا مرسي .
شرعية: أنا حسيبك وانزل وحكمل كلامي معاكي لما ارجع بكره .
بمبة: ربنا يهديكي وينور لك طريقك وعيالك في عنيا من جوه !