يوميات فاهم وفهيمة.. حلقة رقم (28).. مرسي يتنحى ويفوض الإخوان لإدارة البلاد

فهيمة زعلانة ومتأثرة جدا ودموع وآهات
فاهم: خير لسه الدموع وقتها بدري إنتي مستعجلة ليه؟
فهيمة: بقولك إيه أنا مش ناقصك أنا على الآخر
فاهم: شكلك فيه مصيبة كبيرة خير؟
خير إيه هو ييجي منكم خير أبدا بعد الشر.
فهيمة متنرفزة: عشان ترتاحو المرشد هيطلع معاش ومرسي هيتنحى
فاهم فرحان قوي وحياة أبوكي طب وحياة المرشد الكلام ده صحيح ولا ضحك على الدقون كالعادة؟
فهيمة: ومالك مبسوط قوي كده ليه وكأنهم أخدو ورثك.
فاهم: يا بنتي ده الشعب كله هيبقى مبسوط ياه أخيرا الكابوس هينزل من على صدر المصريين دي كانت سنة سودة.
فهيمة: بكره تعرفوا قيمة مرسي والمرشد بتوع ربنا ويا رب يحكم مصر رئيس ما يعرفش عدد ركعات صلاة العصر ولا المغرب
فاهم: الصلاة يا خايبة بين العبد وربه ما ينفعش إني أتاجر بيها لكن قوللي إيه سبب التغيير الكبير ده؟
فهيمة: أبدا قيادات الإخوان اجتمعوا على إن مرسي أصبح شخصية مكروهة من الشعب وكمان المرشد وإنت تعرف مبادئ الجماعة النزول على رغبة الشعب يعني معاش مبكر.
فاهم: هو إنتم عندكم معاش مبكر كمان؟! أهلا أهلا
فهيمة: أمال إنت فاكر الموضوع إيه؟ إحنا منظومة لها قوانين ومبادئ وأسس ولو مش كده كانت الجماعة سقطت من زمان.
فاهم: والله حاجة كويسة خالص أمال ليه فشلتم في الحكم؟
فهيمة بعد ما عدلت قعدتها: إحنا كنا عاملين اختبار قوة تحمل للشعب لكن للأسف الشعب "خرع" أعصابه ضعيفة أمال لو عملنا الاختبار التاني كان الشعب ولع فينا.
فاهم: اللي هو إيه؟
فهيمة: الجوع وده كان المرحلة التانية بس للأسف الشعب قلبة خفيف وكمان العطش ودي اختبارات واجبة.
فاهم: يا نهار إسود جوع وعطش وبالمرة عفانة؟ إنتم عايزين مننا إيه؟
فهيمة تصرخ: عايزين نعمل منكم رجالة وشعب يبني مصر لكن للأسف خلاص مفيش أمل بس الحمد لله نجحنا في اختبار العطش وإثيوبيا هتقوم بالواجب والتاريخ هيسجل إن الإخوان علموا الشعب الصبر.
فاهم: والتاريخ هيكتب حاجات كتيرة مش ده موضوعنا دلوقتي فرحيني وقوليلي إمتى التنحي؟
فهيمة: احتمال كبير بعد ساعة
فاهم يحط رجله على التانية: طالما قلتي ساعة يبقى بعد نص الليل ويمكن بكره
أثناء الكلام يخرج المتحدث الرئاسي يعلن الريس مرسي تنحيه عن الحكم وتفويض الإخوان لإدارة شئون البلاد.
فاهم: "وطلعنا من نقرة وقعنا في دحديرة" ويطلع في البلكونة ويهتف يسقط حكم الإخوان ويغمى عليه