يوميات فاهم وفهيمة الحلقة (4)

تدخل فهيمة والدم نازل من وشها وهى تبكى زى الأطفال وتنوح آه يا غلبى. آه يا جسمى .آه يانى.
فاهم يجرى عليها : إيه انتى عملتى حادثه ولا إيه.
فهيمة وهى تنوح : أبدا ياخويا كنت واقفه فى طابور العيش فى حالى لا بى ولا على والنسوان شغالين يشتموا على مرسى والإخوان بصراحة يافاهم الدم غلى فى عروقى ومستحملتش الشتيمة.
و أنا يا دوب قلت لهم يا جماعة عيب ده بروضه ريسنا والإخوان دول حبابينا.
وعينك ما تشوف الإ النور.
وهات ياضرب اللى ما فيهم وحده "شتمت".
فاهم ماسك نفسه بالعافية من الضحك : وبعدين.
فهيمة : وهى فيها بعدين يا فاهم ياخويا.
وست كبيرة خلصتنى منهم وسألتنى هى الخناقة ليه يا بنتى.
قلت الجماعة بيشتموا على الريس والإخوان.
الست الكبيرة قالت وماله حقهم هو احنا اللى.
" شيفينه "على إيديهم شويه قلت لها يا حاجة بس الإخوان خبرتهم قليلة فى السياسة.
والتانية حنفية كلام وجلدتها "باظت "
مش حرام عليهم يتعلموا "فينا "هى ناقصهم.......
" فالحين "بس يقولوا احنا هنخلى الشعب يمشى على الفلوس ونهضة وبسكوت وعيش كبير وأمان وكلام كتير قوى وفى الآخر طلعوا "كدابين "ضحكوا علينا "
فهيمة : وبعد ما سمعت الكلام ده كله وأنا هفرقع من الغيظ.
قلت لها تصدقى ياحاجة انتم ما ينفعش معاكم غير حبيب العادلى ومبارك.
بس وعينك "ما تشوف" الإ النور عملت زى الست "أطاطا "وهات يا ضرب وعض مخلتش حته فى جسمى سليمة.
فاهم : يا حبيتى ما انتى عارفه الشعب كله مخنوق منكم وانتى بتدافعى ده بروضه كلام.
فهيمة : بقولك إيه يا فاهم أنا مش ناقصك خالص سيبنى فى حالى آه يانى يا فهيمة ياللى كل الناس عليكى وعلى الإخوان ومرسى والشاطر والمرشد.
فاهم : صدقتى دلوقتى هى دى بقى علقه "حرامى الجزم" اللى قلت لك عليها.
فهيمة : أنت شمتان فى يافاهم بدل ما تنزل تاخد حقى منهم واحدة قالت لو معاكى راجل خليه ينزل واحنا نعلمه الأدب.
فاهم : طالما قالت الكلمه دى تبقى غلطانة.
فهيمة : أنا اللى حارق قلبى إن فيه واحده "إخوانية" انا عارفها زى ما أنا عارفك كده وعملت نفسها.
ولا كأنها تعرفنى وسابتنى انضرب.
فاهم ضاحكا : ماهى لوقالت إنها معاك كان.
"انضربت " اكتر منك الحمد لله قدر ولطف.
أنا عندى فكرة حلوة انتى بكرة تروحى "الكشك" تانى ولو شتموا عليك أو على "الإخوان "أو على مرسى ولا كأنك سامعه واشتمى معاهم كمان.
فهيمة، وهى ترتعش : مين يروح فين انسى الموضوع ده خالص.
بقولك إيه يافاهم انت متأكد إن دى علقة "حرامى الجزم" والله كتر خير "الحرامى "اللى استحمل الضرب دة كله.
ويرن جرس الباب فهيمة تترعش هما أكيد.
اوعى تفتح يا فاهم .
فاهم بخوف : هو فيه حد مشى وراكى.
فهيمة "ترتعش "هو أنا كنت شايفه حاجه خالص.
الجرس يرن بشكل مفزع.
فاهم : اسمعى احنا مش هنفتح الباب خالص إن شاء الله يولع الجرس واللى بيرن كمان.
صوت يقول افتحى يا "اخت فهيمة "
أنا اختك أم كريم.
فاهم : دى دى تعرفك بتقول لك أم كريم.
فهيمة : اوعى تصدقها يافاهم ده أكيد كمين عايزين يكملوا علقة "حرامى الجزم "وتبكى.
فاهم : مش للدرجة دى انتى تعرفى "أم كريم".
فهيمة :هو أنا دلوقتى فى "مخ "افتكر أم كريم ولا أم حليم يا محترم أنا حصلت لى "كربله " فى المخ ومش بعيد افقد الذاكرة.
الصوت يتكرر يااخت فهيمة أنا أم كريم
افتحى الباب
فاهم، يرعب فهيمة أكتر، غالبا والله أعلم قاصدينك وناويين عليكى النهاردة.
فهيمة : اوعى تفتح يافاهم اوعى وأنا حرمت ادافع عن مرسى أو الإخوان تانى اوحتى "حرامى الجزم "