يوميات فاهم وفهيمة.. حلقة رقم (21)

فاهم: أنا مش عارف هما عايزين من الشعب إيه.
فهيمة بعد أن تهرش شعرها: هما مين يا فاهم يا حبيبي؟
فاهم بغيظ: هو فيه حد غيركم تعملوا المصيبة والشعب يشيل وبرضه لسانكم طويل.
فهيمة ضاحكة: ما هو ده العشم فيكم يا حبايبي.
فاهم: الريس بتاعك بدل ما يتكلم على الوكسة بتاعة إثيوبيا وراح يقول أنا عارف كل حاجه في البلد واللي بيحصل مع كل واحد هع أنا معايا وحوش.
فهيمة: هي دي فعلا الحقيقة يا حبيبي هو معاه وحوش والأيام الجية مفاجآت للركب مش فساد زي مبارك.
فاهم: طيب هتعملوا إيه في المصيبة السوده بتاعة إثيوبيا دي؟
فهيمة تربعت في القعدة: شوف يا سيدي الريس طويل العمر قعد مع المرشد طويل العمر هاي هئ والشاطر الشطور اللي كايد الشعب كله ما عدا الإخوان واتفقوا أن الريس يروح بكره بعد صلاة الجمعة في السر بزيارة واجبة للحاج أبو علاء.
فاهم يصرخ ويلطم: الحاج مين أبو علاء ليه وعشان إيه وعلى أساس إنه دخل السجن إمبارح؟!
فهيمة: لا يا عم الأمور العقل والحكمة والفطنة بيقولوا إن لازم الأخ أبو علاء يعطي أخيه وحبيبه أبو أحمد مجموعة نصايح قبل ما نغرق في شبر ميه.
فهيمة تلطم: ويا ريت نلاقيه عشان نغرق فيه وعفا الله عما سلف.
فاهم: يعني الريس بكره هيصلي في طرة؟
فهيمة: بعد الشر إن شاء الله اللي يكرهه يا رب.
فاهم: إنتي لسه قايله كده.
فهيمة: شبيه الريس هو اللي هيروح طرة، والريس هيصلي مع الناس في جامع التجمع، عشان لما حد من الأعداء يقول إن الريس راح للريس اللي قبله يبقو كدابين، صح شفت التفكير يا أبو المفاهيم؟
فاهم: ونعم التفكير.
فهيمة: ولسه خد دي كمان، هيخدوا وصفة إزاي يتعاملوا مع بتوع إثيوبيا وإزاي هو كان مسيطر عليهم ولما أبو علاء يقول هع كله يدخل العشش.
فاهم: يا سلام يا ست البنات أنا عندي اقتراح كويس ما تخلي المرشد يطلع أبو علاء ويخليه وزير للميه ويقعد في إثيوبيا على طول يبقى البعبع ويقول هع هع؟!
فهيمة: تصدق فكرة والله مخك شغال يا فاهم وبكده نرتاح ونرجع الميه ويسيطر عليهم هناك.
فاهم: المشكلة مش فيكم المشكلة مبارك هيرضى؟!
فهيمة: نعمممممم هو يطول يبقى وزير ميه مع خليفة المسلمين مرسي العياط؟!
فاهم: والله أنا حاسس كده إنه هيرفض مش عارف ليه ومش بعيد يرفض الزيارة من الأساس ومش بعيد يحط شبيه مرسي مكانه ويهرب.
فهيمة: تفتكر إن الجماعة مش عاملة حساب كل ده.. لا يا حبيبي وفيه حاجه تنيه كمان ساحر مغربي جاي بكره وهيقعد ويحل الموضوع أصل بتوع إثيوبيا ملوك السحر أمال إحنا جبنا الساحر ليه وبكره تشوف يا باشا كله تحت السيطرة.
فاهم يرفع يديه بالدعاء: اللهم عطشهم في الدنيا والآخرة يا رب واحرمهم من الاستحمام لحد ما ريحتهم تبان قادر يا كريم.. آمين!