"فهيمة" في حالة من الغليان والتوتر وتروح وتيجي: معقولة هي وصلت لكدة يا "فاهم". خلاص مش خايف مني ولا عامل لي حساب!! لأ.. إنت لحد النهارده ما شفتش الوش الوحش. لكن توصل لكده يبقى لازم تشوف الوحش النهارده، يا وقعتك السودة يا "فاهم"، يا شمسك اللي غابت قبل ميعادها . يدخل "فاهم" يصفّر أغنية "وحياة قلبي وأفراحه"، ويبص يلاقي "فهيمة" مكشرة وشعرها منكوش . يرجع خايف مذعور ويصرخ: أعوذ بالله من غضب الله، ويشير إلى غرفة النوم: "فهيمة" نايمة جوّا روح لها . "فهيمة" تصرخ: تعالى هنا بسرعة . "فاهم" يرتعش: مش عايز غباء "فهيمة" هي السبب . "فهيمة" تقرّب منه: أنا السبب في المصيبة اللي انت عملتها . "فاهم" يضحك: الله يحرِقك، والله فاكرك عفريت من الصبح، أي نعم انتم إخوات . ومستغرب إنتي عاملة في نفسك كده ليه . "فهيمة": إنت مش عارف المصيبة اللى إنت عملتها "فوق"، هي مش ناقصاك خالص . "فاهم": مصيبة إيه أعوذ بالله؟ "فهيمة" تقرّب منه: لأ بلاش استعباط . "فاهم" يصرخ: لأ لحد هنا ووقفي، إنتي فاكرة نفسك مين!! لأ أنا ساكت.. بس مش معناه إنك تتعاملي معايا بالطريقة دي، انتم خلاص قريب إن شاء الله هتاخدوا (إبعاد). ويضحك: عارفة الإبعاد يعني نهائي، يا حرام!! هاهاها. "فهيمة": يبقى الكلام اللي وصلني صحيح يا "فاهم"، وإنك تبع .. وهي ترقص.. "ت م ر د". "فاهم" بصوت واطي: يا ولاد التيت، هي وصلت لحد كده ؟! "فهيمة" تشخط فيه: إنت انضميت لتمرد دي؟ قول من غير كدب . "فاهم" بصوت مرعوش: الموضوع يا حبييتي غير اللي وصلك خالص، دول خبّاصين ومتصدقيش كلامهم. "فهيمة": إيه بقى الحقيقة . "فاهم" يقرب منها: الله ينور عليكي، أيوه كدة بالراحة يا اختي، ربنا يسترها معاكي . الموضوع إني كنت قاعد مع واحد صاحبي على القهوة، وراح مطلع استمارة من "تمرد"، ومش عارف إزاي مضيت عليها، أي والله، بس بصراحة كنت فرحان قوي . "فهيمة" ترفع حاجب وتنزل التاني: يا حبيبي!! إيه.. شربت حاجة صفرة يا بيضه!! ضحكوا عليك بتوع تمرد وعصيت ولي الأمر!! نسيت كلام ربنا يا "فاهم"، يا رب سامحه ما يعرفش . "فاهم" يبكي: يا رب سامحني يا رب، أنا عصيت ولي الأمر - ويبص إلى "فهيمة"- هو أنا عصيت مين؟! "فهيمة": طبعًا الريس مرسي . "فاهم": آه صح، بس الموضوع مش كبير للدرجة دي، معقولة ربنا يدخّلني النار عشان خالفت مرسي؟! يا نهار أسود، أمال الناس اللي بتعارضه ليل ونهار ربنا هيعمل فيهم إيه!!! "فهيمة": والله أعلم.. الدرك الأسفل من النار. "فاهم": طيب واللي يكدب ويحنث اليمين وينصر أهله وعشيرته، واللي لا يراعي الله في رعيته يروح فين يا نور العين؟! "فهيمة": خلّينا احنا بعيد إحنا نعمل اللي علينا وبس، وطاعة الحاكم واجبة، وعشان كده لازم تعمل اللي هقولك عليه . "فاهم": أنا من إيدك دي لإيدك دي، أنا تحت الأمر طالما فيها نار، هي ناقصة يبقى حكمكم في الدنيا ونار في الآخرة؟ لأ كده كتير . "فهيمة": شاطر حبيبي، أنا عايزة أخبار حركة "تمرد" دي، عايزة كل اللي يحصل فيها عشان تكفّر عن المعصية اللي انت عملتها . "فاهم": وده مش حرام؟! التجسس مش حرام ولّا ف شرع الإخوان حلال . "فهيمة": اسمع عشان تكفّر عن ذنبك لازم تعمل اللي أقولك عليه، وإلا هتدفع الثمن غالي يا فهومتي يا حبيبي. "فاهم" يلف الشقة: أنا متمرد أنا متمرد، ولحكم الإخوان متمرد !!