يوميات فاهم وفهيمة.. حلقة رقم (12).. قاعدين على قلبكم لطالون !!

تجري علي الباب بعد أن سمعت صوت فاهم على السلم وهو يسلم علي الجيران..

فهيمة: كل الغيبة دى يافاهم هانت عليك العشرة أقول إيه ما أنت فلول..

فاهم: إزيك يا فهيمة والله ليك وحشة وحشنى لسانك اللى عايز قطعه..
فهيمة: سيبك من الكلام ده وقوللى كنت فين؟..

فاهم بعد أن يبربش عينه: كنت عند أمى..

فهيمة متعجبة: أم مين سلامتك.. فاهم أنت اتجننت؟!!...
فاهم يزعق: رجعنا لطولة اللسان تاني والله أروح لأمى تانى.
فهيمة: حقك عليّ مش أمك بعد الشر ماتت من عشرين سنة..

فاهم يبربش عيونه: أى نعم.
فهيمة تصرخ: إيه ياراجل أنت راجع عشان تجنني..

فاهم يقرب منها ويأخذها فى حضنه: بعد الشر عليكى إن شاء الله اللى فى بالى قولى أمين.
فهيمة: بصوت ناعم فهمني أمك عايشة ولا ماتت..
فاهم: أمي اللى ولدتني ماتت من عشرين سنة، لكن أمي الكبيرة عمرها ما تموت أبدا إن شاء الله..
فهيمة: ياعم أبوس على يد أمك فهم أمي..
فاهم بضيق: كنت عند مصر..

فهيمة تصرخ: اتجوزت عليا يا فاهم..

فاهم منفعل: اتنيلي هو اللى يتجوز واحدة زيك يفكر إنه يعرف أو يبص علي واحدة تانية ده انتي كرهتني فى نسوان الكون.
فهيمة ضاحكة: هو ده المطلوب، فهمني بقي كنت فين..

فاهم: عشان عارف إنك غبية أقولك كنت عند مصر أم الدنيا مصر الوطن فهمتي..
نفسي أعرف مين اللي كتب اسمك فى شهادة الميلاد..

فهيمة تضحك وسعيدة: المرحوم أبويا..
فاهم يرفع ايديه بالدعاء: الله يرحمه، سبحان الله، ممكن يكون ده الذنب الوحيد اللي يدخله النار..

فهيمة تحط يديها فى وسطها: نعم هو إنت كنت تطول تتجوز فهيمة..
فاهم: سبحان الله وممكن يكون جوازى منك هو اللي يدخلني الجنة..
فهيمة سعيدة قوي: عد الجمايل، يعني إن شاء الله هتدخل الجنة بسببي، هيص ياعم مكتوبالك.
فاهم يرفع يديه للسماء: اللهم إني لا أسالك رد القضاء ولكني أسالك اللطف فيه..

فهيمة حزينة: يرضيك اللى حاصل من الممتردين، عايزين يسحبوا الثقة من الرئيس المؤمن محمد مرسي..

فاهم: هو إنتي يا فهيمة مش ناوبة تختمي حياتك وتفهمي مرة لله..

فهيمة: اللي أنا فاهماه وعارفاه إن الريس مرسي منتخب يبقي ما ينفعش نقوله روح إلا بعد أربع سنين وممكن يبقوا تمانية الله وأعلم..
فاهم يصرخ: نعم أربع مين وتمانية مين، أمال حركة تمرد جاية لمين..!!..
فهيمة: شوف يافاهم يا حبيبي إحنا وأنتم والزمن طويل، رايح تنام ولا ترجع لأمك تاني..

فاهم يصرخ: أنا متمرد أنا متمرد..
تدخل ناحية غرفة النوم: سلم لى على المتمردين ياحبيبي..
فاهم: عيوني، وإحنا ملايين مش واحد ولا اتنين..
وإن شاء الله إنا لمنتصرون..

فهيمة تخرج وشعرها منكوش: وحياة شعر فهيمة ولا يكون على راجل إحنا قاعدين على قلبكم لطالون..

فاهم يكلم نفسه: مستحيل لا لا لا، يصرخ، طيب يا فهيمة يحرم عليا النوم طول ما الإخوان حاكمين...

وأنا وأنتم والزمن طويل.!!....