يوميات فاهم وفهيمة .. حلقة رقم (7)

فاهم رجع من شغلة تعبان جدا واستقبلته فهيمة بحب وترحاب.
فهيمة : لك عندى حتة مفأجاة إنما إيه حكاية.
فاهم : خير.
فهيمة : بعد أن تقرب منه مش من شهرين كان نفسك فى "صنية "بطاطس باللحمة صح.
فاهم بسعادة كبيرة وحياة النبى عاملة صنية بطاطس روحى ياشيخة ربنا كدة ما يحرمك من حاجة انتى بتحبيها ابدا ولايحرمك من فاهم ياحبيبة فاهم
فهيمة بدلع : هوانا ليا كام فاهم.
فاهم : سيبك من الكلام ودخلى عليا بصنية اللحمه الله يكرمك.
فهيمه: عيونى ياحبيبى.
فاهم، يكلم نفسة هو فيه إيه النهاردة أكيد عايزة حاجة كبيرة وكبيرة قوى كمان مش معقولة حبيبى وصنية بطاطس لا الموضوع فيه "إن "
تأتى فهيمة بالبطاطس "مطرح" مايسرى "يمرى" بالهنا والشفا ياحبيبى.
فاهم خايف ويحلف طلاق تلاتة فية مصيبة مش "إن "ايه المطلوب يافهيمة.
فهيمة : كنت عايزك تقف مع ابن خالتى حمادة أصلة ناوى على الانتخابات وليك منى كل أسبوع ياعم صنية لحمة إيه رأيك.
فاهم : ما أنا بروضه يا حبيبتى قلت مش معقولة تكون صنيه اللحمة "لله ".
فهيمة، سعيدة، أصل أنت لسانك حلو كلامك بتصدقة الناس وليك اصحاب كتيرة فى المنطقة.
فاهم : ماشى ياستى هو أنا ليا كام فهيمة هى وحدة بس شاى بقى زى ما قال الكتاب عشان تبقى عملتى الصح.
فهيمة : من عيونى.
فاهم : هو حمادة نازل حزب ولا مستقل.
فهيمة : على حزب الحرية والعدالة.
فاهم : نعم.
فهيمة : فيه حاجة ياحبيبى.
فاهم : قصدى مش محتاج منى حاجة هو كفاية يقول ":إخوان" وينجح على طول.
فهيمة تضع يدها على شعر فاهم وتهمس وحشتنى قوى يافاهم.
فاهم يرتعش : الموضوع إيه يافهيمة.
فهيمة أبدا أنا عايز حمادة ينجح بأى شكل.
فاهم : هو حد قال لك إنى مسئول عن الانتخابات .
فهيمة لابس انت تقدر تخلى الناس تحب حمادة وتنتخبة .
فاهم : إزاى يا أم العريف .
فهيمة : زى ما طول النهار والليل بتهاجم الإخوان تقول إنك كنت فاهم الإخوان غلط وإن حمادة كويس وخدوم وكمان هيوزع سكر وزيت وصابون والجديد لحمة وفراخ وتضحك أصلة بيستورد اللحمة والفراخ من برة.
فاهم : مصيبة لا تكون اللحمة دى من عند حمادة ابن خالتك.
فهيمة : بذمتك أيه رايك فى طعمها مش زى العسل .
فاهم بزعل : أنا مش ممكن أعمل كدة وبعدين حمادة تم اختياره بناءً على إيه .
فهيمة : عشان إخوانى طبعا تفتكر يجيبوا حد من برة "الإخوان" طبعا لا .مستحيل.
فاهم : وهو فين بسلامته .
فهيمة مترددة أصلة .أصلة. فى المستشفى .
فاهم :ياساتر يارب إيه اللى حصل له وبخوف بسبب اللحمة ويحط يدة على بطنه .
فهيمة : لا الموضوع بعيد خالص عن اللحمة .
فاهم : مال الموضوع إيه أنا عارف إنك عايزة تخلصى منى وجبتى لى لحمة فاسدة حسبى الله ونعم الوكيل فيك وفى حمادة .
فهيمة :لا الموضوع غير كدة خالص أصلة عندة كسر فى الحوض ورجلة مكسورة ويدة يعنى من الإخر كدة كلة على بعضة مكسر.
فاهم متأثرا : ياساتر يارب هو إيه طسة مترو ولا إيه .
فهيمة مترددة : أصله أصله عمل مؤتمر انتخابى والناس قامت عليه انتم "كدابين "انتم "خربتم" البلد احنا هنجوع قريب بسببكم يا إخوان حمادة قال لهم انتم شعب غبى ومتخلف اشتغل الضرب كل اللى كان مع حمادة جرى مسكين أخد الضرب كلة لوحدة معرفش نفسة الأبعد تلاتة أيام فى المستشفى .
فاهم ضاحكا : إيه وانتى عايزنى احصله يعنى .
فهيمة : بعد الشر عليك يا حبيبى لابس كلمتين حلوين منك إن حمادة مش كداب وتتعهد قدام الناس إن كل كلام حمادة هيتنفذ وانك المسئول قدامهم
فاهم يصرخ : انتى مجنونة ومين يصدق حمادة إن شاء الله وأحط نفسى فى ورطه عشان صنية لحمة لا يا ستى تحرم عليا اللحمة من النهاردة طول ما الإخوان بيحكموا البلد ارتحتى ياحاجة فهيمة .