يوميات فاهم وفهيمة.. الحلقة (2)

دخل "فاهم" واضعًا صوابعه خلف ظهره وينظر إليها وهو خائف من أن تكون "فهيمة" زى مرسى؛ تموت فى تقطيع "الصوابع".
"فهيمة": حمد لله ع السلامة يا "فاهم"، بسرعه اغسل إيديك وقص صوابعك قصدى "ضوافرك".
"فاهم" خائفًا: ليه هو انتى ناوية على إيه؟!! لا.. أنا لحمى "مر"!!
"فهيمة": يا راجل ده انت أحلى حاجة فيك "صوابعك".
"فاهم" يجرى على الباب: "آه" بقى هى كدة!! يبقى موضوع الصوابع "عادة" عندكم.
"فهيمة" مستغربة من كلام "فاهم": هو فيه إيه؟ مالك النهارده!!
"فاهم" من جنب الباب: يا سلام.. يعنى مسمعتيش كلام مرسى إنه فيه 3 صوابع هيقطعهم، وأى حد هيشاور بصوبعه هيقطعه؟!
"فهيمة" مبسوطة وتصفق: الله عليك يا مرسى، هو ده الكلام أيوة كدة.. ينصرك يا ريس.
"فاهم" غاضبًا: ينصر مين ويقطع "صوابع" مين، ليه؟ هى البلد مفيهاش قانون ...........
"فهيمة" تضرب على صدرها: إحنا القانون، وإن شاء الله بعد الصوابع "اللسان"، وبعد كدة "الودان"، وبعد كدة "المنخير".
ده انتم هتشوفوا أيام أسود من "السواد".
"فاهم": يا نهار طين يا ولاد!! يا حزن "الحزانة" يامّا!! يعنى ده مخطط إخوانى يا "فهيمة" "ياختى"!!
"فهيمة" منتصرة: يابنى آخرتكم معانا "قطع" على طول، ولسه.. ياما فى "الجراب يا حاوى".
"فاهم" منفعلًا: لأ.. السادات عمل كدة فعلا، بس دى كانت آخر أيامه يا "فهيمة".. آه.
"فهيمة" بعد تنهيدة: والله كلامكم كله "هواء"، شوف قال هقطع صوابع "نمتم" من المغرب.. ولسه.
"فاهم" بعد أن اصفر "وشه": هما الإخوان معندهمش حل وسط!! يا قتل يا قطع؟ بس دى بلطجة يا "فهيمة".
"فهيمة": أيوه إحنا بلطجية.. ليك شوق فى حاجة.
"فاهم": اسمعى كويس.. سكة "الصوابع" آخرتها "وحشة".
"فهيمة": إنت سمعت الريس اتكلم قبل كدة على الصوابع؟ أكيد "جاله" الأمر، وبعدين كل اللى كانوا قاعدين معاه حريم، يعنى لازم "يسخن" شوية ويقول "ها ها"، فين الصوابع اللى بتشاور.
"فاهم": طب لما "يسخن" يسخن على الصوابع؟ طب يسخن على حاجة تستاهل.
"فهيمة" ضاحكة: بصراحة موضوع حلو وجامد وجديد، إنت سمعت "ريس" "ولا وزير"، ولّا حتى "محافظ" اتكلم فى يوم عن الصوابع؟ "محصلش"، هومرسى وبس بتاع الجديد.
"فاهم": ده ساب كل حاجة وقعد يقول: أنا عارف، أنا فاهم، أنا حاسس، لدرجة إنى افتكرت إنه غيّر اسمه.
"فهيمة": خلاص يا ابو العُرّيف، يا ابو الفهمان كله، من "دلوقتى" خليك ماشى جنب "الحيط"، ولو لاقيت مكان فى "الحيط" ادخل فيه، عشان إنت شايف اللى بيحصل الأيام دى، وهو مرسى هايبدأ.. "الصوابع" وبعد كده الله أعلم.
"فاهم" غاضبًا: يعنى إيه ده "تهديد"؟
"فهيمة": خلى بالك أنا حماية ليك، يعنى لو "شلت" إيدى عنك ساعتها "قطع صوابع.. خلع أسنان.. قطع لسان.. ودان" وانت وحظك بقى.
"فاهم": يحط إيده على صوابعه، وعلى أسنانه.. وودانه.. ولسانه.. ويلطم: يا نهار اسود، والله يا "فهيمة" أنا حاسس إن الإخوان دول هيطلعوا من عيلة "دراكولا" مصاص الدماء.
"فهيمة" مبسوطة قوى: يا حبيبى الأدب "حلو"، وطول ما انت مؤدب مفيش حد يقدر يتكلم معاك.
"فاهم": يعنى من الآخر "لا أرى لا أسمع لا أتكلم".
"فهيمة": وانت زعلان ليه؟ ما الشعب راضى وزى الفل، وعايش آخر تمام، ورايحن الجنة إن شاء الله.
"فاهم": حتى الجنة بقت "إخوانية"؟ طيب الشعب عمل ثورة ليه؟
"فهيمة": ثورة مين يا ابو ثورة، وبعدين "لولا الإخوان لا كانت فيه ثورة ولا يحزنون".
"فاهم" فى ذهول وصمت من كلام "فهيمة".
"فهيمة": إيه يا "فاهم"، ما لك؟!! مفأجاة صح!! ده تاريخ.. احفظه عشان هيبقى منهج التاريخ السنة الجاية فى المدارس.
"فاهم" يغمى عليه.
"فهيمة": "فاهم".. "فاهم".. ترفع إيدها "الأول".