احمد عفيفي يكتب : نصيحة خروف.. لازم تضحوا بمرسي عشان البلد تعيش !!

هو دايما كل سنة كده .. مش بيتغير .. لمض ولسانه طويل .. بس عليه مخ يوزن بلد .. عشان كده كل عيد لازم اشوفه واتكلم معاه .. ورغم ان النهارده تالت يوم في العيد وكنت خايف الاقي كل الخرفان اندبحت .. لكن الغريب ان كتير منها لسه عايش وبيمأمأ .. المهم لقيت واحد هفتان وشكله كده مبيكلش بقاله شهر .. نحيف وليّته كأنها ديل جاموسة .. ومع ذلك كان شكله مبسوط وقاعد يغني : ماما سابتلي في البلد اطيان كتير ملهاش عدد .. كان عندها 12 ولد مفضلش منهم الا انا ..
اقتربت منه : ازيك ياعم الخروف .. كل سنة وانت طيب .. فرد : اهلا .. هو انت برضه بتاع كل سنة .. ايه يابني انت مش وراك غيري؟
قلت : غريبة .. النهارده تالت يوم ومحدش اشتراك ولا دبحك .. ماشية معاك ياعم
رد : اعوذ بالله من عينيك .. لسه فيه يوم رابع وممكن جدا يحصل اللي خايف منه
قلت : ومالك هفتان كده ليه
رد وهو يضحك : لؤم بقى .. قعدت يجي اسبوع مفيش لقمة دخلت جوفي عشان ابقى زي مانت شايفني ومحدش يشتريني .. حيشتريني ليه يا حسرة وانا كده جلد على عضم .. وبعدين واضح ان الفلس ضرب الكل ومحدش معاه فلوس .. احسن .. ربنا يفقركم عشان تبطلوا شرا ودبح.
قلت : الحمد الله انك بخير عشان اتكلم معاك شوية
قال : اتكلم ياخويا وانا حايشك .. ماهو واضح بعد الثورة ان كل اللي عندكم كلام وبس.
قلت : بدأنا بقى النقرزة واللماضة اللي على اصولها .. خف عليا شوية .. بلاش الدخلة الشمال دي
فاجأني قائلا : وايه اخباركم مع الريس مرسي؟
قلت : ما انت عارف كل حاجة اهو وعارف ان مرسي والاخوان حكموا البلد
قال : تصدق انا مش مرتاح ابدا للنوعية دي من الناس
سألته : ليه .. وانت اش عرفك بيهم؟
قال : مش هما مربيين دقنهم ودايما فاشخين بقهم بضحكة صفرا مصطنعة؟
قلت : صح .. يخرب بيت عقلك انت عرفت ازاى ؟
قال : شفت يوم العيد اتنين منهم .. اعوذ بالله .. تصدق جايين يشترونا والسكينة ورا ضهرهم .. مستعجلين اوى على الدبح .. والاتنين بيضحكوا وعينهم كلها شر.
قلت : اهم دول بقى يا سيدي اللي رسي عليهم المزاد وحكموا البلد.
قال : ماهو من خيبتكم .. تقوموا بثورة ويموت منكم فوق الالف وترسي في الاخر على الاخوان
قلت : قصدك على مرسي
قال : انت حتستعبط .. ماهو مرسي هو الاخوان .. والاخوان هما مرسي
قلت : بس هو قال انا رئيس كل المصريين
رد : يقول اللي يقوله .. هو الكلام عليه جمرك .. ازاى واحد اتربى مع الجماعة وشرب منها يتخلى عنها بالسهولة دي .. ولا بعد 100 سنة .. تكون البلد خربت
قلت : ده انت متشاءم اكتر مننا
قال : وانا مالي ياعم .. هو كان رئيس عليا انا .. بس برضه انتوا غلطانين .. اخترتوه ليه؟
قلت : حطونا في اختيار صعب .. اما هو واما شفيق .. كأني بقول لك تموت بالسرطان ولا بجلطة في القلب.
قال : وانتوا اخترتوا الجلطة .. اسهل من السرطان .. مش كده؟
قلت : ماكنش فيه حل تاني .. لو انت بني ادم ومصري كنت اخترت مين؟
قال : لا ده ولا ده
قلت : انت بهزر .. ومين يحكم البلد؟
رد : انتم
قلت : ازاى ياعم الخروف .. هو كلام وخلاص .. لازم يكون فيه رئيس لمصر
قال : وهو معقولة مصر .. وانا عارف يعني ايه مصر يحكمها مرسي والاخوان؟
قلت : اهو اللي حصل .. قدر الله وما شاء فعل
قال : وانتوا حتسكتوا على كده؟
قلت : وانت عايزنا نعمل ايه؟
قال : سؤالك بطريقتك دي فيه يأس .. ودي بداية مش حلوة وهما مش عايزين اكتر من كده .. قصدي الاخوان طبعا .. عايزنكم تيأسوا وتزهقوا وتسلموا بالامر الواقع .. ويبرطعوا هما في البلد براحتهم.
قلت : دي بلدنا احنا مش بلدهم .. والله لو عملوا ايه برضه حتفضل بلدنا .. ومحدش حيغير فيها او منها حاجة الا بمزاجنا .. احنا نسكت نسكت بس ساعة ما تضيق بينا نجيب عاليها واطيها .. لا تقوللي مرسي ولا بديع ولا الشاطر .. اتخن منهم واقوى منهم الف مرة اخد على قفاه وخلع.
قال : بس الاخوان مش زي مبارك وجماعته .. دول اكثر شراسة .. مش زي ما انت متصور.
قلت : على نفسهم .. اللي بيشيل قربة مخرومة بتخر على دماغ اللي جابوه.
قال : وعلى دماغكم انتوا كمان .. لو فضلتوا ساكتين
قلت : ساكتين يعني ايه .. انت عايزنا كل يوم نقوم بثورة .. هو احنا رايحين نشتري قرطاس لب؟
قال : لأ .. مش عايزكم كل يوم تقوموا بثورة .. بس احرصوا على تصدير الاحساس ده للحاكم وحاشيته .. خلوهم دايما خايفين من غضبتكم .. ساعتها حيعملوا ليكم الف حساب.
قلت : والله ياعم الخروف .. الجماعة دي اخر تناحة .. شكلهم كده قاعدين على قلبنا شوية مش قليلين .. فلازم يخوضوا التجربة ولازم نخوضها معاهم لحد مانشوف حيخدونا على فين.
قال : الكلام ده غلط .. وكلام ناس مش ناوية تثور تاني ولا تغير حاجة .. المثل بيقول العينة بينة .. ومرسي بتاعكم في ميت يوم غلط غلطات تبدو صغيرة انما هى في الحقيقة كبيرة اوى .. اهم حاجة انا لاحظتها انه مالوش شخصية .. وكلامه مش موزون والناس اللي حواليه كلهم " مقاطف " .. بيورطوه كل ورطة والتانية وهو يطلع يضحك ولا كأن فيه حاجة.
قلت : اسكت ياعم الخروف .. ده فضحنا وخلى رقبتنا زي السمسمة .. تصدق بعت جواب لشيمون بيريز رئيس اسرائيل وبيقول له فخامة الرئيس العظيم والصديق الوفي
قال : ماهو بيدفع تمن انه بقى رئيس مصر
قلت : تمن ايه .. هو كان بيريز انتخبه ولا جابه .. مال ام اسرائيل بالانتخابات عندنا؟
قال : تصدق انك لا مؤاخذة حمار ومش فاهم حاجة
قلت : انت كل ماتقابل معاك من السنة للسنة تقول عني حمار ..
قال : معلش الحقيقة بتجرح بس برضه بتفوّق البني ادم .. هو انت فاكر ان مرسي نجح بالصندوق بتاعكم .. ولا بمباركة وتعضيد من امريكا ومن وراها اسرائيل
قلت : وايه مصلحة امريكا ان الاخوان يحكموا مصر
قال : عشان يرسّخوا مبدأ العقيدة والدين في الحكم وبالتالي تقف اسرائيل على ارض صلبة بعقيدتها ودينها
قلت : انا مش فاهم .. المفروض ان العكس هو الصحيح .. المفروض امريكا بعد 11 سبتمبر تكره الاسلام واسرائيل تحط ايدها على قلبها من حكم الاخوان خوفا على معاهدة السلام.
قال : يبقى انت فعلا حمار ومش فاهم ومش حتفهم .. الاخوان يا بني قصاد مصالحهم يتفقوا مع الشيطان مش مع اسرائيل ولا امريكا .. بقولك الشيطان .. سيبك من الكلام الاونطة بتاعهم .. وقال الله وقال الرسول .. دي تجارة رخيصة عمرهم ماحيكسبوا بيها ولا يضحكوا بيها غير على ناس سذج.
قلت : طيب وبعدين نعمل ايه .. انت قفلتها في وشي بالضبة والمفتاح .
قال : انت مش بتشوف في الافلام العربية عندكم الدكتور بيقول احنا ضحينا بالمولود عشان الام تعيش
قلت : ايوه سمعتها كتير جدا
قال : وانتوا لازم تضحوا بمرسي عشان البلد تعيش
قلت : نعمل ايه .. ندبحه ولا نقتله؟
قال : لا دبح ولا قتل .. تخلعوه زي ما خلعتوا مبارك .. دقوا ع الحديد وهو سخن .. انتوا لسه في ثورة ولسه عايشين في جوها .. لو فاتت سنة كمان حتبردوا والحديد حيبقى صلب وهو اللي حينزل فوق دماغكم .. ويبقى الله يرحمكم .
قلت : ثورة تاني .. ده احنا ما صدقنا اننا عملناها ونجحت.
قال : مادام جابت الاخوان تبقى سقطت .. ولازم تذاكروا تاني وتسهروا الليل عشان تنجحوا في الملحق .. بس خد بالك .. لازم يكون المرة دي معاكم قائد منكم خايف على البلد وبيحبها من قلبه .. وساعتها حتنجحوا وتجيبوا مجموع كبير .. وانتوا اللي تختاروا .. عايزين تدخلوا اى كلية .. ومفيش قلق .. المجموع كبير وكل الكليات مفتوحة قدامكم .. وما عليكم سوى الاختيار اللي انتوا شايفينه صح.