حوار خاص جدا..محرر مع رجل طيب جداً

المحرر: اسمك إيه يا راجل يا طيب
الطيب: أنا؟
المحرر: أيوه أنت.
الطيب: ليه
المحرر : عادى: عاوز أعمل معاك حوار.
الطيب: هو أنت مين يا ابني.. أوعى تكون من إياهم.
المحرر/ قصدك إيه؟
الطيب/ أنا !! مش قصدي حاجة يا ابني.
المحرر/ طيب اسمك إيه يا راجل يا طيب.
الطيب/ أنا اسمي (الطيب)
المحرر/ انا باسألك على اسمك.
الطيب / أيوة إسمي (الطيب)
المحرر/ يعنى اسمك (الطيب) وانت راجل طيب.
الطيب/ شكرا يا ابنى على شعورك.
المحرر/ ساكن فين بقى يا عم الطيب.
الطيب/ انا ساكن فى القليوبية... وبالتحديد فى شبرا الخيمة.
المحرر/ ياه.. شبرا الخيمة؟
الطيب/ مالها يا ابني شبرا الخيمة؟!!!
المحرر/ الله يكون في عونك يا راجل يا طيب ويكون في عون كل اللي ساكنين في شبرا الخيمة.
الطيب/ ليه يا ابنى؟!
المحرر ياحاج أنت كويس... صحتك كويسة...
الطيب/ الحمد لله يا ابني.. بس تعبان شوية .
المحرر/ تعبان إزاي يا حاج.
الطيب/ شوية تعب في الزور والصدر والرئتين.
المحرر/ بس كده.. طيب قول الحمد لله.
الطيب/ ليه يا ابني بتسألني على صحتي بالذات؟!!
المحرر/ اصل شبرا الخيمة كلها أمراض صدرية وعشان كده يا حاج باسالك.
الطيب/ فعلا يا ابني.. شبرا الخيمة كلها أمراض صدرية لأننا عندنا مصانع كثيرة جدا, فكلها أدخنة .. يعني كل أنواع الدخان.. دخان مصانع ودخان من عوادم السيارات ودخان من حريق الزبالة ... ده غير كده فيه دخان أزلي .. والسماء بتشتكي منه وهو دخان قش الأرز وهى مشكلة أزلية لسة موجودة لغاية الآن.
صحيح يا ابنى أنت عاوز تدخلنى في متاهات؟
المحرر/ متاهات إيه يا حاج؟
الطيب/ زمان المحافظ والريس والمسئولين على شبرا الخيمة بيسمعوني دلوقتي.
المحرر/ ماتخافش ياحاج., ده كان زمان... إحنا النهاردة غير زمان .
الطيب/ ليه يا ابني؟
المحرر/ إحنا النهاردة في حرية تامة.
الطيب/ حرية إيه يا ابني.. هو فيه حاجة اتغيرت .
المحرر/ ايوة يا حاج.. النهاردة كل شئ اتغير.
الطيب/ كل شئ اتغير ماعادا الحرية.. يعنى الوشوش اتغيرت وكل شئ زى ما هو.
المحرر/ لا لا ياحاج أكثر شئ النهاردة إننا في حرية تامة.
الطيب/ أنت ما سمعتش يا ابني على موضوع الأستاذ بتاع جرنان الجمهورية.. عشان نزل خبر ولا اللي أنت بتقولوا عليه ده .. (شالوه من رئاسة الجرنان).
المحرر/ لا ياحاج ماحدش شال حد.
الطيب/ شفت إزاي أنت خايف ومش عاوز تقول الحقيقة.
المحرر/ لا يا حاج هي دي الحقيقة.
الطيب/ يا ابنى ده بيقولوا إن رئيس مجلس الشورى هو اللي شاله من غير أي اجتماع للمجلس وكلف أستاذ غيره يمسك الجرنان.
المحرر/ أنت مش فاهم الحقيقة ياحاج!!
الطيب/ أنا اللي مش فاهم برده؟!
المحرر/ طيب قول أنت يا حاج.
الطيب/ يا ابني أنا قلت اللي فيه الكفاية وانت بتحاول تخبي عليه.. مش أنت قلت في الأول إني في حرية؟!!
على العموم يا ابني لو نزلت كلامنا ده في الجرنان انت محدش هيقولك حاجة, كل شىء هيبقى على رئيس الجرنان اللى أنت بتشتغل فيه زى ما حصل في جرنان الجمهورية.
يعني أنت ماحدش هيقولك حاجة من مجلس الشورى ولا غيره.
صحيح ياابنى انا سمعت الريس بتاعنا بيقول انه ساكن في التجمع الخامس.. هو الريس ساكن إيجار قديم ولا إيجار جديد, لو ساكن إيجار جديد يعني 5سنين أو 10 سنين وبعد كده صاحب البيت هيعلى عليه الإيجار أو يمشيه من البيت زينا.
افرض بقى إن الريس معهوش فلوس يعلى الإيجار يبقى صاحب البيت هيمشيه ولو مشى هيروح فين.
المحرر/ لاتعليق.
الطيب/ مالك يا ابني سكت ليه؟!! ماتخافش يا ابنى الريس بتاعنا طيب ومش هيعملك حاجة هو بس اللي تخاف منه وده بيني وبينك (رئيس مجلس الشورى) لأنه زي ما عمل مع الأستاذ بتاع الجمهورية ممكن هيعمله معاك بس أهم شئ ما يكنشى أنت رئيس الجرنان.
هو انت موظف صغير ولا رئيس الجرنان.
المحرر/ مش هتفرق!!
كل الحكاية إن هيوقف رئيس الجرنان ويجيب واحد غيره وده من غير أي اجتماع من مجلس الشورى أو حتى اجتماع للمجلس الأعلى للصحافة.
الطيب/ يا ابني أنا مش فاهم حاجة ولا من مجلس الشورى ولا حتى المجلس الأعلى للصحافة اللي أنت بتقول عليه ده.
أنا كل اللي اعرفه من مجلس الشورى ده هو اللي بيعين رئيس الجرنان ., يبقى زي ماهو عينه يبقى .. يشيله.
المحرر/ لا لا ياحاج أنا كده هبتدي أقلق من كلامك.
الطيب/ يا ابني مش أنت قلت اللي إحنا في حرية.
المحرر/ أيوه يا حاج حرية ولكن بشروط.
الطيب/ هى الحرية يا ابنى لها شروط.
المحرر/ أيوه يا حاج الحرية لها شروط.
الطيب/ قوم يا ابنى مش قلت لك من الاول بلاش تكلم معايا ولا تجيب سيرة الحرية ولا غيره .. وقلت لي إن الدنيا اتغيرت يا حاج فين يا ابني التغيير ده؟!!
عرفت إن كلامنا مالهوش فايدة والفايدة دائما عند الله.
المحرر/ شكرا يا حاج. عاوز حاجة...
الطيب/ أيوة يا ابني عاوز حرية بجد.