محمد صلاح: يا مساء الخيراذا كانت الصحافة مهنة البحث عن المتاعب فنقابة الصحفيين هي صاحبة المتاعب وحائط المبكى الاخير لاهل المهنة ومشاكلها وكمان صاحبة السلم ، زمان كان سلم النقابة جوه ايام المبنى القديم والجنينة ، كان الشغل كله في الجنينة دلوقت السلم بقى برة 15 سلمة بالعدد لكن وقف على السلالم دي اعضاء من حركات احتجاجية من كل لون جوه الاوض يعني جوه المبنى ممكن يكون زملا تانيين احتجاجا او اضرابا بحثا عن حل او ملاذ.. زمان كانت الصحافة بتكتب عن اوجاع الناس وبتعكس و بتتابع احوالهم.. دلوقت بقى كانه باب ثابت، الناس هي اللي بتتابع مشاكل وخناقات الصحفيين لكن المجتمع برضه في النهاية وحراكه الجديد بيروح للنقابة طول الوقت وتقفز النقابة الى واجهة الصورة كل سنتين عشان انتخابات النقيب ورغم اسماء 17 نقيب اشهر من نار على علم من ساعة تاسيس النقابة لغاية دلوقت فالشغل فيها كله عذاب وضنى مفيش نقيب ما اشتكاش لكن اصول المهنة الحفاظ عليها ، تحمل هموم الزملا ، غريزة مساعدتهم.. خلى اساتذة كبار يتصدوا للمنصب ويترشحوا له الزملا الصحفيين وراهم و الحكومة قدامهم يمكن كانت النقابة زمان عندها وقت لقضايا الراي كان عدد الاعضاء اصلا محدود الصحف والمجلات قعدنا عقود طويلة عددهم محدود قبل تاميم الصحافة في الستينات كان فيه لمجلس النقابة ممثلين لاصحاب الصحف وممثلين للمحررين بعد كده بقت كل الصحف قومية.. دلوقت بقى فيه بالاضافة للصحف القومية صحف حزبية وصحف خاصة هل احنا محتاجين دلوقت نرجع تاني لصيغة ممثلين عن المحررين وممثلين في مجلس النقابة عن اصحاب الصحف ..؟ النقابة انشغلت كتير من سنين في كل انتخابات بحكايتين نقيب الحكومة ونقيب المعارضة نقيب سياسي ونقيب خدمات اما وانتخابات نقيب الصحفيين على الابواب فالنقابة والنقيب ، الدور والوظيفة ، وضع النقابة ومستقبلها مش بس كده انما مستقبل المهنة نفسها وكمان تجاوزات الصحافة كل دا بقى على المحك .. الصحافة والصحفيين هيكون لينا عنهم النهاردة كلام مسئول فاصل محمد صلاح: الجماعة الصحفية في مصر بتحلم بكتير من نقيبهم وعلى كل الاصعدة، سياسيا عايزين مواقف قوية مش بتهادن ، واقتصاديا عايزين دعم وخدمات واضحة ومحددة ، ونقابيا متمسكين بالحفاظ على المهنة قيمة الصحفي قدام مصادره ووضعه في المجتمع عايزين نقيبهم محامي ضد جبروت الادارة و كمان حاطينه تحت الحساب بناء على برنامجه الانتخابي وايه اللي حققه وايه اللي فاته.. نقيب الصحفيين الاستاذ مكرم محمد احمد هيكون لينا معاه كلام ..... مسئول ومن كلام الاستاذ مكرم محمد احمد :- اخوض الانتخابات لاستكمال برنامجي الانتخابي وتحقيق مصالح الجماعة الصحفية التي اختارتني نقيبا لها باغلبية كبيرة اسعى الى الغاء باقي المواد التي تقضي بعقوبة الحبس في قضايا النشر والحفاظ على حرية الراي والتعبير وحق الاختلاف وكذلك اصدار قانون جديد للمعلومات يمكن الصحفيين من الحصول على معلومات بطريقة لائقة من حق نقابة الصحفيين ان تعاقب صحفييها اذا خالفوا قرارات الجمعية العمومية في شان منع التطبيع مع اسرائيل خاصة انه لم يحدث أي تغيير في مواقف اسرائيل مشكلة البدل تتمثل في عدم تطابق البيانات المقدمة للمجلس الاعلى للصحافة من كل من النقابة ورؤساء الصحف الحزبية والمستقلة وكلما حدثت مشكلة بين احد الصحفيين ورئيسه يرسل الاخير بيانات يقول فيها ان الصحفي لا يعمل عنده لذا تم الاتفاق على عقد اجتماع مشترك بين النقابة والمجلس الأعلى كل شهر للنظر في مثل هذه الحالات ملفات شائكة وألغام جاهزة في شارع الصحافة البيت الصحفي كل سنتين بيدخل في ترتيبات جديدة بوعي جديد ووعود جديدة عندنا انتخابات النقيب كل سنتين وانتخابات مجلس النقابة كل 4 سنين وتبقى مناسبة لفتح كل القضايا ، مناسبة للمصالحات وحل مشاكل وانها ء خصومات ومحاولة فرد مائدة مزايا للمهنة واصحابها .. نقيب الصحفيين الاستاذ مكرم محمد احمد هيكون لينا معاه كلام ..... مسئول فاصل محمد صلاح: ارحب بنقيب الصحفيين الاستاذ مكرم محمد احمد استاذ مكرم انت ليه اعلنت بدري ترشيحك لانتخابات النقابة يعني عادة بيكون الاعلان قبل فتح باب الترشيح وفيه سنين سابقة وانت شاركت فيها بيبقى الاعلان بعد فتح باب الترشيح ؟ أ/مكرم محمد احمد: لا لا عمري ما حصل انه يبقى فيه اعلان بعد فتح باب الترشيح وبعدين انا متصورتش ان انا اعلنت بدري انا اعلنت قبل شهرين قبل شهر من فتح باب الترشيح محمد صلاح: مش بدري شوية دا ؟ أ/مكرم محمد احمد: لا ماظنيش وقبل شهر من فتح باب الترشيح وقبل شهر من الانتخابات يعني عندك شهرين يا دوبك هو الحجم الزمني اذا كنت هتعمل حملة انتخابية لانه عدد ضخم من المؤسسات ، الاول كنت تلف على مؤسستين دلوقت لابد ان تقدم نفسك لعدد واسع من مؤسسات حزبية وخاصة وقومية وفضلا عن ذلك انا الفترة اللي كنت تعبت فيها وقعدت تقريبا حوالي 3 شهور ان انا مقدرش امشي الا وانا مستند على عكاز انا كان عندي احساس انني لابد ان اكف ولابد ان اتوقف وبعدين تحت ظروف كثيرة زملائي اللي دخلوا معايا اعضاء مجلس النقابة ، الاحساس بانك انت كان لديك برنامج عملت الجزء الاكبر منه لكن ايضا فاضل جزء ، الاحساس ايضا ان المعركة او الفترة المتوقعة للنقيب هي 4 سنوات عندما تمضي سنتين وتسيب سنتين منهم تبقى كمان هربت من المعركة كل هذه الظروف هي اللي خلتني اقول انا هنزل لان انا قلت قبل ذلك ان انا ربما افكر في الاعتذار بسبب ظروفي الصحية محمد صلاح: اللي كان يتابع حضرتك كان يشوف انك زهقان جدا ومتضايق وحصل لك مشاكل كتيرة جدا وصلت الى حد الشجار مع بعض الزملا الصحفيين داخل مقر النقابة لاسباب مختلفة يعني وانه الضغوط عليك كانت شديدة جدا وانك واجهت حتى بعض الزملا في مجلس النقابة في مشاكل وكان دا بيدي ايحاء زي ما حضرتك بتقول دلوقت انك مكنتش هتكمل .. المنصب مش مغري ولا مغري ؟ أ/مكرم محمد احمد: اطلاقا ليس مغري ولو ان فيه زميل يقدر يقوم بهذه التبعات ، فليس ما يدعو الى الاغراء في سني هذا كمان لم يعد هناك ما يدعوني الى الاغراء لا اتوقع من المنصب لا منفعة ولا اتوقع مكانة اذا كنت عملت مكانة فانا عملتها بتاريخي وبجهدي في المهنة وليس لانني نقيبا للصحفيين على وجه الاطلاق وبالتالي الحوافز او الدوافع التي دفعت الواحد الى الترشيح كلها ليس فيها على وجه الاطلاق ما يمكن ان يكون شئ شخصي انك انت عملت برنامج تحس انك مسئول عن تنفيذ هذا البرنامج ..آه..فيه مشاكل لكن مشاكل متعلقة بينا كصحفيين ودا طبيعة العمل الصحفي انك انت كل يوم داخل في منافسة وكل يوم داخل في قواضي ويمكن ان تختلف مع زميلك الان ويمكن ان تختلف مع رئيسك بكرة لكن مش دا نهاية العالم يعني محمد صلاح: طب ايه رايك في الصيغة اللي بتتقال انه الاستاذ مكرم مرشح الحكومة وانه مع المستقلين ؟ أ/مكرم محمد احمد: دا احد الاسباب اللي بتخليني اتضايق وبتخليني اتنرفز لسبب بسيط مش لانه الانتساب للحكومة شئ سئ لا انما المفروض اللي يقول هذا الكلام يكون قد قرا مقالاتي يكون قد قيم اعمالي لما يجيني واحد يقول انت مرشح الحكومة او انك انت بتحابي الحكومة يقولي انا قريتلك مقالات انت قلت في المقال كذا وانت وقفت خطا الى جوار الحكومة انا بعتب عليك هنا هضربله تعظيم سلام لانه دقق ونقب وبحث ووجه اتهاما على اساس صحيح انما النهاردة كل واحد بيستسهل ان يوجه اتهام ماتشوف اللي حاصل النهاردة في قضية نور الشريف استسهال شديد جدا في اطلاق تهم معممة استسهال شديد جدا في انه معاك قلم تجرح بيه الاخرين دا يحتاج الى وقفة حقيقية فانا طبعا من حقي جدا ان انا اتنرفز لما ييجي واحد لسه مابقالوش 5 سنين لا يعرف شيئا عن تاريخ واحد بيشتغل 50 سنة وييجي يطلق حكم كده " انت حكومي" ..لا ..لا .. محمد صلاح: البعض بيخففها يا استاذ مكرم بيقول انه اذا مكانش مرشح حكومي فعلى الاقل الحكومة تكون راضية عنه ؟ أ/مكرم محمد احمد: ليس من الضروري ان اكون عميلا لحكومة وليس من الضروري ان اكون محابيا ليها انا مش مرشح حزبي انا مرشح نقابة ادافع عن 6 الاف صحفي فيهم من هو مع الحكومة ومن هو ضد الحكومة ولديهم مصالح لدى الحكومة ومن الضروري ان اكون على صلة بالحكم من اجل انجاز هذه المصالح لكي السؤال الحقيقي هل هذه الصلة منعتني من اقول رايي الحقيقي في كثير من المشاكل دفعتني بالفعل الى ان أتغاضى عن الحقائق خلتني ابتلع اشياء تتعلق بنقابة الصحفيين ما كان ينبغي ان ابتلعها يعني السؤال محطوط غلط ودوافعه خاطئة وسؤال حقيقة بلا معنى ..آه .. السؤال مش انت مع الحكومة ولا ضد الحكومة لانك انت المفروض صحفي انما مع الحكومة في موقف وقد اكون ضدها في قسوة شديدة جدا في موقف اخر محمد صلاح: زي ايه يا استاذ مكرم انت كنت في العمل النقابي خلال السنتين اللي فاتوا كنت اخدت موقف ضد الحكومة ؟ أ/مكرم محمد احمد: زي حاجات كتيرة جدا ابتداءا من قضية هدم النيل وكتاباتي حول ان السلام لن ياتي ونحن في حالة انتظار وان المقاومة ممكن ان تكون بصيغ اخرى ، كلامي ضد الفساد، كلامي ضد المحسوبية محمد صلاح: ومواقفك النقابية اصطدمت بالحكومة خلال السنتين اللي فاتوا نقابيا ؟ أ/مكرم محمد احمد: حصل خلافات مع الحكومة يعني انا ممكن اصطدم مع الحكومة.... محمد صلاح: اصل فيه ناس بتعتبر انه لما بتصطدم مع الحكومة دا كويس ؟ أ/مكرم محمد احمد: اصطدم مع الحكومة عندما يكون هناك مبرر للاصطدام وعندما يكون المجموع الصحفي بأكمله جاهز لهذا الاصطدام ، لقضية تتعلق بالمجموع الصحفي مش قضية بتتعلق بمجموعة حزبية زي القانون عندما طلب اعضاء مجلس الشعب تقليص قانون العقوبات وصدر التقليص، الصحفيين كلهم وقفوا موقف واحد جدا ضد الحكومة مطالبين بإنهاء هذا لان القانون كان يمثل ظلم وقد وقفت ضدها ضمن هذا وكنت ضمن الذين ساندوا هذه الحركة بقوة محمد صلاح: حتى تدخل الرئيس مبارك ووجه بتخفيض العقوبات . أ/مكرم محمد احمد: الرئيس مبارك قبل انه اعادة النظر في الموضوع وانا كنت احد الذين اداروا الحوار من جديد حول القانون الجديد محمد صلاح: انت في الفترة اللي جاية ان شاء الله قدامك سكة سفر عندك مشاكل كتير وملف مفتوج يتعلق بالنقابية الخاصة بالزملاء الصحفيين ..اول همّ البدل ..ايه قصة البدل يا استاذ مكرم ؟ أ/مكرم محمد احمد: اولا البدل ثابت ومقرر ومؤكد ولا حق لأحد فيه في المراجعة والذين يشككون في البدل ويعملون مشاكلات في البدل دول ما وراهمش حاجة البدل مقرر وشرعي وليس في وسع احد ان يقترب منه، احيانا كانت المالية بتتاخر في صرف هذه الفلوس نتكون فيه مشكلة مع يوسف بطرس غالي يكون مفيش فلوس محمد صلاح: واتقال برضه فيه عجرفة في التعامل مع الصحفيين يا استاذ مكرم وساعات بيبقى فيه شد ودن للصحفيين في تاخير البدل عشان مواقف معينة . أ/مكرم محمد احمد: بيترد عليه واظن يعني انا لا احتاج اني اقول انا عملت ايه ولكن اظن انه صدرت تعليمات واضحة من الرئيس مبارك بان هذا البدل شرعي وينبغي ان ينتظم ..المشكلة بقى في تضارب المعلومات حول البدل ..البدل يصرف للصحفي العامل انت صحفي في مؤسسة تاخد البدل اذا المؤسسة بعتت للمجلس الاعلى للصحافة قالت الراجل دا ما اصبحش عندنا بيتوقف البدل .. فتختلف كشوف النقابة عن كشوف المؤسسات بنعمل جلسة كل شهر عشان نطابق هذه الكشوف وبالمناسبة اعتقد انه من الضروري ان يغير البدل ليصبح البدل الصحفي ليس لمجرد ان هو موجود في مؤسسة محمد صلاح: دي خطوة مهمة جدا . أ/مكرم محمد احمد: لانك انت بتعطي هذا الصحفي عشان يتمكن من الاستمرار في حياته خاصة في هذه المؤسسات الصغيرة بعض المؤسسات الصغيرة بتحترم حقوق زملاءها ويمكن بيقدموا اجور احسن من المؤسسات القومية لكن بعض المؤسسات شئ زفت يعني يمضوك على استقالة مسبقة لاتقبض ولا مليم يقولولك تقبض 150 جنيه انا جبت هؤلاء الناس وغيرت الوضع واصريت على ان تكون النقابة طرفا في هيئة التعاقد مع هذه المؤسسات واصبح هناك عقد جديد يوقع في هذه المؤسسة ياتي صاحب الجرنان وياتي المحرر ويوقع العقد والنقيب يوقع واي احد في حضور المؤسسة كحد ادنى 500 جنيه ونفسي ان واحد يبلغ عن ان هذا العقد لا يحترم لانه انت بتفتح مشروع خاص على عينا وعلى راسنا والصحافة المستقلة والصحافة الخاصة صحافة ضرورية وصحافة مصر كلها قامت على عدة بيوت خاصة نجحوا في انهم يعملوا صحافة عظيمة يعني انما مانجحوش في انهم يضحكوا على الصحفيين ويمضوهم على استقالات مسبقة ..لا ..دول كانوا بيدوهم احسن مرتبات لابد ان نعود الى المنابع الحقيقية عشان نفهم الدور الحقيقي للقطاع الخاص تيجي تضحك على شوية شباب وتستنفذ هدفك من هذا الجرنان وتقفله بعد شهر وتسيبلي العيال محمد صلاح: في جرايد بتفتح لاهداف معينة ؟ أ/مكرم محمد احمد: طبعا فيه جرايد بتطبع لها 12 صفحة وبتطبع 100نسخة او 200 نسخة محمد صلاح: عشان يعملوا اعلانات يعني ؟ أ/مكرم محمد احمد: اعلانات او أي مصلحة او أي حاجة يعني هل كل الجرايد هذا الحجم الضخم من الجرايد دي هل هي بالفعل جرايد ذائعة الانتشار يعني احنا بنقول انه حرية الاصدار جزء من حرية الصحافة لانه مفيش حاجة اسمها حرية الصحافة وصدور جريدة جديدة معناه بالفعل نافذة جديدة للحرية وتعزيز لحرية الراي محمد صلاح: يعني انت مش مع القيود ؟ أ/مكرم محمد احمد: لا انا مع القيود بس اقولك في الحتة دي لازم حاجة مهمة لانه احنا النهاردة عندنا عدد ضخم جدا من كليات الاعلام التي تخرج بلا عدد بلا حصر اعداد ضخمة جدا وليس هناك اماكنيمكن ان تودي فيها هؤلاء الناس انا نفسي نعمل زي نقابة الاطباء ونناشد وزير التعليم العالي انه على الاقل المخرجات تكون متوافقة مع المدخلات عشان مانقودش احسن شباب في مصر كانوا يدخلوا الى كلية الاعلام على امل... محمد صلاح: بقى في التعليم المفتوح يا استاذ مكرم كلية الاعلام ب50% و55. أ/مكرم محمد احمد: هذا خطا وهذا ينبغي ان يقاوم لان هؤلاء يضحكون على مصائر الشباب لانه في النهاية الولد دا هيوديه فين وبعدين هما كمان اللي يتكلموا يقولك ان التعليم خاطئ لان فلسفة التعليم مش متوافقة مع سوق العمل طب ما انت اهه امال اللي انت عملته دا ايه محمد صلاح: الحكومة ؟ أ/مكرم محمد احمد: اه الحكومة ما انا بتكلم عن الحكومة باعتباري نقيب حكومي بقى محمد صلاح: اهه ضحك الاستاذ مكرم ماهو بيضحك اهه . أ/مكرم محمد احمد: باعتباري نقيب حكومة فانا بتكلم عن الحكومة ..الحكومة التي تتكلم عن ضرورة توافق التعليم مع سوق العمل يعني لا لا لا محمد صلاح: عاجباك صورة الصحفي يا استاذ مكرم ؟ أ/مكرم محمد احمد: صورة الصحفي علشان انا اكره التعميم هناك صحفيين شبان من اجمل ما يمكن وهناك صحفيين من الشبان بزغوا في فترة مبكرة واصبحوا كتاب راي انت كنت عشان تكتب رايك تقعد 30 سنة ومع ذلك هناك ايضا صحفيين شبان نجحوا في اصدار صحف ينبغي ان تحيّا صحف صفحات جديدة لاول مرة ادخلوا انماطا جديدة بالاخبار لم تكن معروفة ولم تكن مألوفة في الصحافة المصرية النهاردة المجتمع المدني بقى ابطاله معروفين في الصفحات الاولى في كثير من الصحف والحياة لابد ان تتجدد واللي يقولك دا انا جيلي احسن ..كذاب ..مهما تكن قيمته ومهما يكن صنعه محمد صلاح: طب دا الجانب الايجابي ..الجانب السلبي بقى ؟ أ/مكرم محمد احمد: الجانب السلبي بقى انك انت كان لابد انه عشان تعطي انسان جرنان اهلا وسهلا كل جرنان هو نافذة لحرية الراي لكن للابد ان تضمن لهذا الجرنان ان يضمن للعاملين معه حياة كريمة انه صحفي بدون حياة كريمة معناها اشياء كثيرة جدا سيئة محمد صلاح: فيه صحفيين دلوقت عايشين حياة غير كريمة ؟ أ/مكرم محمد احمد: كتير كنير دا بيقوله ما بيدلوش مرتب ويقوله روح خد البدل بتاع الحكومة واسترزق ورزقني وكل صحفي في مصر للاسف عارف هذه الصورة انتوا مش بتقولوا ان الصحافة الخاصة دي مشروع خاص يسري عليه القوانين التي تسري على أي مشروع اذا كان ينجح ينجح واذا كان يفشل يفشل طب ماهي الضمانات حقوق الناس دي اذا فشل المشروع عشان كده انا طالب من المجلس الاعلى اعادة النظر في بعض الاجراءات المتعلقة بصدور الصحف بحيث يبقى هناك وديعة تضمن حقوق الصحفيين ..جريدة البديل مع انها جريدة كانت محترمة لما قفلت اغلقت ..كل الدائمين خدوا فلوسهم واخر ناس الغلابة الصحفيين بتوع البديل يعني اخر قائمة تسدد هي حقوق الصحفيين ..الاول المؤسسة الطابعة الديون للوكلاء الكذا الكذا على بال ما وصلوا لحقوق الصحفيين مالاقاش ولا مليم فلابد لما النقابة تتشدد في هذه الشروط اعتقد انها تتشدد لصالح المستقبل واعتقد انها تتشدد ايضا لكي يكون لدينا صحفي محترم يعرف ان رزقه هو من قلمه الشريف وليس من قلمه المؤجر علشان خاطر يبتز دا او يشتم دا او يلزم دا بانه يجيب اعلان محمد صلاح: استاذ مكرم بقالنا سنين طويلة بنسمع عن كادر خاص للصحفيين وتخطى الصحفيين فئات اخرى بقالهم كوادرهم المدرسين مثال يعني امتى هيظهر الكادر الخاص ؟ أ/مكرم محمد احمد: انا اعتقد ان اول مسئولياتي الفردية مش انا كفرد واحد من 6 الاف صحفي انه هناك تاريخ او انه هناك سن لكن لو احنا اتجمعنا على ضرورة هذا المطلب سوف نستطيع ان نحققه ومن الضروري ان نحققه لان حال الصحافة لم يعد يرضي احد لا يرضي الحاكم ولا يرضي المحكوم ولا يرضي الراي العام ..الحل الحقيقي للصحافة مش في البدل الحل الحقيقي للصحافة في انه احنا نعيد تقييم الاجور تقييما حقيقيا بما يمكن كل صحفي من انه يؤدي مهامه في حدود تضمن له على الاقل الكرامة لانك انت اذا ما اديتلوش اسال نفسك بقى ما الذي سوف يحدث محمد صلاح: من الملفات المهمة جدا خلال الفترة اللي فاتت وشغلت جموع الصحفيين ملف التطبيع مع اسرائيل على خلفية استضافة الدكتورة هالة مصطفى السفير الاسرائيلي في الاهرام ..ماهو يادكتور مكرم ماهو تطبيع وما هو ليس من التطبيع ليه قضية التطبيع لحد النهاردة مش محسومة ؟ أ/مكرم محمد احمد: لانه لاسف بالفعل انا طبعي كوني نقيبا لصحفيين يلزمني اني اقولك علشان فيه تسجيل عالهوا يلزمني اني اقولك كلام رسمي وهقولك الكلام غير الرسمي برضه ..الكلام الرسمي اننا مسئولون بالفعل عن تطبيق قرار الجمعية العمومية اللي هو عدم التطبيع الى ان يتم تاريخه لانه كم من القوانين الظالمة الموجودة ولكن المجتمع المدني المحترم يحترم قوانينه الى ان ينهض بتغييرها دا الكلام ..الكلام الاخر ان هناك مشكلة هالة مصطفى اثارت مشكلة ..الزميل بتاع اكتوبر اثار مشكلة وقالك ان دا جزء من واجبي المهني الله انت ما بتتكلمش ليه على الصحفيين الاسرائيليين اللي بيجوا وبيخشوا بيوتهم وزراء ويخشوا يجيبوا اخبار واشمعنى انا .. انت بتطالب مني اني اكون فلسطيني اكتر من الفلسطينيين هو التطبيع ان انا اتكلم عن واحد وانقل اخبار ولا التطبيع ان انا اعمل لقاءات ونعمل اتفاقات ونعمل مشروعات مشتركة قولولنا بالظبط ايه التطبيع ..ربما يكونوا مجموعة قليلة ولكن اذا كنا احنا النقابة بنحمي وبننفذ قرار الجمعية العمومية ينبغي ان نحمي ايضا حق الطرف الاخر في ان يقول رايه عشان كده بعض الصحفيين قالوا عايزين ورشة عمل عشان نعيد تعريف التطبيع ماهو التطبيع واعتقد انه النضج العقلي يلزمنا بضرورة هذا علشان حتى على الاقل لكي يكون أدائنا عن قناعة ..طيب صحفيين راحوا مع احمد ابو الغيط اسرائيل لما ييجوا بقى ابعتلهم جوابات واقولهم والله انسوا الجوابات دي زي ما كان بيحدث زمان احولهم الى لجان تاديب ولا اعمل ايه ..الله..!! الراجل راح قدم مهمته يمكن حتى ماسلمش على اسرائيلي اهه واقف مستني وزير الخارجية او مصدرا مسئولا تقوله هذا محمد صلاح: استاذ مكرم انت رحت اسرائيل وعندك وجهة نظر تتعلق بانه هناك فرق بين التطبيع الشخصي وبين اداء مهمة العمل يعني دلوقت واحد رايح يعمل حوار او مع وزير الخارجية احمد ابو الغيط في اسرائيل مهمة عمل لكن لو اتفسح شوية هيبقى تطبيع ولا ايه ؟ أ/مكرم محمد احمد: انا اولا لما رحت اسرائيل لم يكن قد صدر قرار الجمعية العمومية انما رحت بعد كده الارض المحتلة مرتين رحت وانا مقتنع بان مرواحي مهم لاني كنت بكلم ياسرعرفات في التليفون فبيقولي في وسط الكلام يرضيك يا مكرم ان انا قاعد محجوز وتحت شبابيكي الدبابات الاسرائيلية لا مسئول عربي يجيلي ولا صحفي عربي يجيلي تاني يوم قلت له انا في الطريق اليك وذهبت وعملت موضوع جميل وقال فيه كلام حلو وقضى الراجل يوم جميل جدا لانه حس انه فيه ريح حلو من مصر قد وصلته انا بقى اجرمت لان انا اتخانقت مع العيال على البوابة الاسرائيلية قبل دخول غزة ..طبّعت ..!! فيه ناس اه بيقولك طبعت اوكي على عيني وراسي نقعد بس نناقش نشوف الحكاية دي تطبيع ولا لا وبالتالي انا شايف انه فيه حالة مهنية قضية مهنية تستحق بالفعل شجاعة المناقشة محمد صلاح: يعني محتاجين كود عشان يحدد لنا بالظبط ايه اللي تطبيع وايه اللي مش تطبيع ؟ أ/مكرم محمد احمد: هنصل لكود منين من خلال مجموعة من الناس العقلاء بس هو كمان انا عاوز اقولك حاجة يا صلاح احيانا التوقيت واحنا ادرى الناس بقضية التوقيت احيانا يكون التوقيت ليس في صالحك يعني في ظل حكومة زي حكومة بنيامين نتنياهو في ظل وزير خارجية مش قادر اقولك مش قادر اوصفهولك الوصف الذي يستحقه لما اثير هذه القضية وبعدين سفير اسرائيلي موجود في القاهرة متصور انه قضية هالة مصطفى هيوقع الصحفيين مع بعضهم يقولها ايه انا هقولك القائمة بس والبهوات السذج.." القائمة السرية للذين طبعوا ".. محمد صلاح: هيوقعهم في بعض ؟ أ/مكرم محمد احمد: طب الافندية الصحفيين ..التطبيع يعني يكون وقع وثيقة ،وقع اتفاق، عملوا عمل مشترك، عملوا عمل ايجابي محتاج بالفعل ان نفكر في عمل ايجابي في قضايانا المهنية ونحتاج الى بعض الرشد عشان مانندفعش كده في اتهامات ..جرنان كاتب كده "قائمة المطبعين الخونة " هل دا يحق محمد صلاح: ماهو جرنان ماهو صحفي يبرضه مش صحفي اللي كاتب كده ؟ أ/مكرم محمد احمد: ايوة بس هو متصور انه هو لما يعمل هذا الاعلان جهة ما هتقوله والله انت هايل وانت عارف الجهات اللي ممكن كده متصور انه هيبيع بهذا الكلام متصور انه بهذا الجرنان هيستأسد على زملائه لكن كل دا قبض ريح محمد صلاح: انت قلت انه لانت نازل انتخابات عشان تسعى الى الغاء باقي المواد التي تقضي بعقوبة الحبس في قضايا النشر والحفاظ على حرية الراي والتعبير وحق الاختلاف ازاي بقى ؟ أ/مكرم محمد احمد: هقولك ازاي ..دلوقت لما حصل هذا كان جزء من برنامجي والحكومة ممثلة في اعلى مستوياتها قالوا اننا سوف نحل هذه المشكلة جاء البرلمان آه انا رحت شهدت في الدستور واعتقد ان الدستور احترم شهادتي وكتب " شهادة تاريخية لنقيب الصحفيين" والاكثر من هذا عندما الرئيس مبارك قال انه قال والله انا سوف اتنازل عن حقي لان رئيس تحرير الدستور مواطن عندي انا بعت وقلت له سيادة الرئيس هذا الامر لا يخص ابراهيم عيسى دا يخص كل صحفيين مصر واذا كنت هتتنازل لابراهيم عيسى فالمفروض ان تتنازل لكافة الصحفيين لم يحدث على وجه الاطلاق ان تم ان صدر قرار بحبس صحفي حتى القضاة اصبحوا لا يستسيغون ان يصدروا حكما بحبس صحفي والجميع ادرك ان حكم الحبس دا كلام فاضي وانه ربما بعض الناس تكون تواقة اليه لكي تزداد شهرة محمد صلاح: تقصد مجدي احمد حسين او حاجة ؟ أ/مكرم محمد احمد: لا مقصدش مجدي ..بالعكس انا بالنسبة لي مجدي كنت اتمنى ان يكون دفاعه اذكى من كده لان مجدي انت صحفي وعايز تروح تتفرج على نفق وتعدي ع اليمة التانية ، لو دفاعه المهني انه بيركز على انه بيؤدي عمل مهني اتاخدت على انه سياسي انما دفاعه المهني مغامرة صحفي يريد ان يستكشف نفقا . فالظروف كلها مهياة ان هذه النصوص اصبحت عاطلة بس موجودة ووجودها نفسه مش حلو للحكم ومش حلو للصحفيين ومش حلو للمستقبل لانه اظن مصر في الفترة القادمة لابد ان تكون الديمقراطية تكتمل بصورة اكتر من كده نحن نستحق بالفعل ديمقراطية مكتملة واظن ان الفترة القادمة تستحق هذا وعشان كده انا شايف بالفعل انه هذه القضية ما اتنجزتش وعشان كده انا باعلن استمرار التزامي بيها رغم ان الظروف كلها قد خففت من هذا الموضوع وانت تعرف انني اولا مش رحت شهدت فقط في قضية ابراهيم عيسى لا دا انا رحت لشيخ الازهر عشان اقنعه بالتنازل عن قضية يعني بذلت مالم يبذل من اجل اقناع المجتمع بان هذه العقوبة لا ضرورة لها واعتقد ان احنا حققنا شيئا في هذا المجال .. محمد صلاح: خليك معانا يا استاذ مكرم لسه الكلام مخلصش فاصل محمد صلاح: الاستاذ مكرم محمد احمد يتحدث الينا حول برنامجه وماحققه في الفترة الاولى وما ينوي او يسعى الى تحقيقه الفترة الثانية أ/مكرم محمد احمد: انت ماسالتنيش ماذا حققت في الفترة الاولى وماتاكلش عليا هذا السؤال محمد صلاح: مش قلت رحت لابراهيم عيسى ورحت ...؟ أ/مكرم محمد احمد: هذه قضايا فردية انما القضايا التي تستحق الاهتمام هي قضايا جموع الصحفيين محمد صلاح: طيب عندنا مداخلة كده بتتكلم على قضايا جموع الصحفيين نشوفها. أ/مكرم محمد احمد: اه قوي محمد صلاح: نشوف الاستاذ سليمان جودة هيقول ايه ؟ فاصل أ/سليمان جودة – الكاتب الصحفي: لماذا لا يطبق هذا الميثاق على كل تجاوز تشهده الحياة الصحفية هذا سؤال اعتقد ان الاستاذ مكرم مطالب بان يجيب عليه بصراحة خاصة اذا كان اعلن انه ينوي الترشح لفترة اخرى في نقابة الصحفيين ولا نجد جهة اخرى يمكن ان نلجا اليها لوقف هذه التجاوزات الصارخة في ممارسة المهنة لان النقابة هي المنوط بها اولا واخيرا مواجهة هذه التجاوزات ووقفها عند حدها بحزم وحسم.. الشئ الثاني يتعلق بدخول ومرتبات الصحفيين الجدد الذين لا يزالون في خطواتهم الاولى في المهنة هذه المرتبات اعتقد انها كانت في مقدمة برنامج الاستاذ مكرم الانتخابي منذ عامين ولكن الانجاز فيها اظن انه ليس على قدر الطموح فهذه المرتبات لاتزال في حاجة الى اعادة نظر وفي حاجة الى اهتمام اكبر من الاستاذ مكرم محمد احمد لانه ما حدث ولا يزال يحدث مع الصحفيين الجدد او الصحفيين الشبان لا يجعلهم مطمئنين ولا امنين ولا قادرين على ان يمارسوا المهنة كما يجب او ينبغي لها ان تمارس ، النقطة الثالثة والاخيرة وهي خاصة ببدل الصحفيين الذين كان الاستاذ مكرم ايضا قد زاده وتعهد باستمراره منذ عامين ولكن للاسف الشديد تحول هذا البدل شهرا بعد شهر الى نوع من التسول من جانب الصحفيين عند الحكومة ولا اعرف لماذا رضي الاستاذ مكرم محمد احمد على ان يكون الحصول على البدل بهذه الدرجة من التسول واعنيها بالحرف لانه وصل الحد الى ان بعض الصحفيين في وقت من الاوقات قد هددوا بالتظاهر وبالاعتصام امام النقابة وعلى سلمها طلبا لبدل لا يكاد يكفي شئ هذه الملاحظات الثلاثة اعتقد ان الاستاذ مكرم في حاجة الى ان يتكلم فيها بصراحة وبشفافية مع الصحفيين لانها ملاحظات في عمق اداء النقابة خلال عامين في الفترة الاخيرة فاصل محمد صلاح: موضوع البدل وموضوع المرتبات موضوع مالي يتعلق بدخل الصحفيين اللي عملته عشان دا ..الشئ المهم التاني عملت ايه لصورة الصحفيين ايضا في مسالة ميثاق الشرف الصحفي وعندنا قضية نورالشريف اللي اتكلمت عليها اللي عايزين نركز عليها أ/مكرم محمد احمد: اولا لاول مرة في تاريخ نقابة الصحفيين بيطبق نظام الشرف الصحفي لكن للاسف نحن لا نعلن على الاقل فيه 42 قضية محالة الى قضايا التحقيق في 10 قضايا ذهبت الى اللجنة التأديبية فيه 8 قضايا طلعوا براءة بس احنا ما بنحبش نعمل من هذا الموضوع دوشة لانه احنا بنمشي تجربة في اول مرة في تاريخ محمد صلاح: لما ما بتعلنش حصلت ازاي قضية نور الشريف وخالد ابو النجا وحمدي الوزير يعني استسهال ان احنا نطول سمعة الناس بالشكل دا دي مسالة مسيئة للصحفيين طبعا بيطالبوا ان دا يتوضع له حد ؟ أ/مكرم محمد احمد: انا اكثر الناس تشددا في هذا الموضوع خد في القضية الاخيرة انه احنا كنا راغبين في احالة زميل منهم المحرر ليس عضوا في النقابة رئيس التحرير ورئيس الادارة الاتنين اعضاء في النقابة ..الاتنين بيدعوا ان لديهم وثائق النائب العام قال انه ليست هناك أية وثيقة على وجه الاطلاق وان لديه شهادات ونحولهم ع المحاكمة وحولهم للمحاكمة لانه طلبهم لكي يقولوا في التحقيق فاعتذروا عن التحقيق وبقوا يطلعوا في الفضائيات وانا بقول انه لولا انه حولهم على المحاكمة كانوا النهاردة امام لجان التاديب في النقابة لانه انا لابد ان احترم القانون ايضا لانه لا يمكن اطلاقا ان انا احول ناس الى قضية يتادب هنا ويتادب هناك يا يتادب هنا يا يتادب هناك ننتظر قرار المحكمة كافي ورادع النقابة تتخذ فيها الاجراءات .... محمد صلاح: عايزين نحل معضلة يا أستاذ مكرم وهو مطالبة الصحفيين بالغاء الحبس في قضايا النشر ومطالبة بحريات اكتر وفي المقابل الحفاظ على سمعة الناس والتزام مواثيق الشرف الصحفي نحلها ازاي ؟ أ/مكرم محمد احمد: نحلها بان يكون لدينا مدونة سلوك وان هذه مدونة السلوك يلتزم بيها رؤساء التحرير جميعا ونحترم حقوق القارئ في الرد ونحترم ولا نكبر عن ان نعتذر عندما نخطئ في حق احد واعتقد انه انجزنا هذه المدونة بمعونة ثلاثة من رؤساء التحرير الذين كانوا قد قدموا استقالاتهم بالفعل يعني الموضوع يحتاج الى عناصر عديدة علشان كذا لكن الامر الذي انا على يقين منه انه نحن جادون في تطبيق الميثاق لا يمكن ان نقبل ما يجري الان اذا قضية نور الشريف...ومش قضية نور الشريف طب ليه الاستاذ سليمان ما افتكرليش قضية هبة ونادين وحقق تحقيق نقابي محترم و48 جرنان مصري يخطئوا في حق هاتين الفتاتين وجبنا ال48 واحد وسالناهم في قلب النقابة وطلع انهم ضحية لضابط غير مسئول اداهم معلومات كاذبة علشان قال يقفل على الولد من اليمة التانية وقضيت ان يقدم اعتذ ار لهذه الاسرة وعملت ملحق اسمه ملحق هبة ونادين علشان خاطر كود اخلاقي في هذا الموضوع احنا ماسكتناش مش واخدين موقف المتفرج من هذه القضية والمفروض انكوا انتوا تتحركوا وتبقوا قوة ضغط ، كبار الصحفيين مش قاعدين في مكاتبهم فقط..لا .. لما انت تشد ازر النقابة معايا في هذا على الاقل يبقى لدينا الشجاعة جميعا في ان نقف ضد الغوغائية لان الغوغائية تهجم علينا بشراسة الحاجة التانية موضوع اجور الصحفيين الشبان اظن يعني الاستاذ سليمان لا ينبغي ان ينكر على انه الزملاء الشبان النهاردة ال200 جنيه وانا متاسف اني بقول هذا الكلام لولا ال200 جنيه كانت احوالهم سوف تكونة سيئة ولم يحدث في تاريخ النقابة انه فيه نقيب صحفي جاب علاوة مادية 200 جنيه دفعة واحدة وال200 جنيه اللي صدر بيهم قرار الدكتور احمد نظيف القرار بيقول الاتي تكون جزءا من اعادة نظر شاملة في كوادر اجور الصحفيين حتى يتمكنوا من محمد صلاح: ما احنا بنتكلم فين بقى اعادة النظر ؟ أ/مكرم محمد احمد: انا بقالي سنة ونص لم اتوقف فيها عن العمل يوما واحدا انت فاهم ان سنتين دول دا كل واحد صحفي عايز يركبك علشان مشواره الخاص وعشان موضوعه الخاص محمد صلاح: ازاي ؟ أ/مكرم محمد احمد: انت ليك مشكلة خاصة عند وزير الصحة خلصها لي ياسيادة النقيب ، الاسانسير بتاع بيتكم وقف واتخانقت مع جارك كلم لي الشرطة في اسكندرية مثلا طول النهار وانا مش زعلان لان احس اني استطيع ان اقدم خدمة اقدمها لكن ايضا لا ينبغي انكار الجهد الذي تم بالنسبة للشباب قى انا عملت الشئ الصحيح اللي يصلحه دلوقت الشاب يقعد عشر سنه ولا يتعين انا مقدم مشروع للمجلس الاعلى بيدرس النهاردة انه الولد قعد كل 6 اشهر ياخد شهادة من الجرنان بحجم تقدمه قعد سنة ونص الجرنان يلزم بتعيينه خلال 3 سنين محمد صلاح: ممكن ما يدلوش الشهادة اصلا فيه زملاء بيدربوا يا استاذ مكرم وانت عارف بقالهم 6 سنين و7 سنين . أ/مكرم محمد احمد: الاطراف كلها تبقى عارفة انه من حقه ان يأخذ شهادة والجرنان يبقى عارف انه اذا اصدر 3 شهادات متتالية يبقى لازم هيتعين ، اذا الولد بعد كده هو حر انما في النهاية عندما يكون هناك نظام واضح اعتقد ان الجميع سوف يلتزم بيه ..انا موافق على كل كلام سليمان وانا بقول انني ملتزم بهذه الاشياء من برنامجي ولكن نحن نحتاج موضوع الكادر الجديد طيب انا عملت كادر وبعته الى المجلس الاعلى وناضلت من اجل اقراره المفروض ان رؤساء مجالس ادارة المؤسسات يساندونا محمد صلاح: محدش ساند..؟ أ/مكرم محمد احمد: لا ..احنا بعتنا جبنا المحررين الاقتصاديين فيه اوضاع موجودة صعبة واحد زميلي بيقولي اذ كنت انا مؤسستي هيكلها المالي كذا تعبان فالاول صلح لي الهيكل المالي وبعدين طالبني باستحقاقات جديدة يعني التركة صعبة ومشاكلها ضخمة محمد صلاح: عندنا مشاكل كتير عندنا مشكلة كده عايزك تسمعها انت عارفها وتابعتها تتعلق بالدمج اللي حصل بين بعض المؤسسات القومية معنا الاستاذ محمد بسيوني نسمع رايه فاصل أ/محمد بسيوني- مدير عام التحرير بالاهرام: قرار رقم 7 لسنة 2009 الصادر في 26 مايو 2009 من مجلس الشورى والخاص بدمج المؤسسات الصحفية ادى الى نقل المطبوعات والصحفيين من دار الشعب ودار التعاون الى مؤسسات الاخبار والاهرام والجمهورية الحقيقة انه هذا القرار شهد في الفترة الاولانية كثيرمن الجدل الى انه في الاخر اصبح فيه اتفاق جماعي لكل الاطراف عليه لكنت مشكلة الموافقة على القرار طول الوقت بيتوازى معاها عدم وجود آليات تنفيذية فالمجلس الاعلى للصحافة ومجلس الشورى خدوا القرار ولم ينفذ حتى الان.. لم نجد له جدول زمني واضح احنا دلوقت بقالنا 4 شهور ونص بعد صدور القرار ، فيه مشاكل متصاعدة ادت الى ان عدد كبير من الصحفيين مش قادرين يمارسوا عملهم لان بيئة العمل المفترض انها تتوفر فيها مقومات اساسية تقريبا مش موجودة ، الصحف لغاية النهاردة بتصدر بشكلها القديم مع انه ضمن القرار كلام واضح والاستفادة من الخدمات والاجهزة اللي موجودة في المؤسسات الكبرى لتطوير الاداء في الصحف اللي مدموجة فيها، الصحفيين الحقيقة كان حقوقهم الاساسية فيها مشكلة مفيش مكان للشغل ، مفيش اداء كما ينبغي.. ايضا من المشاكل التامينات الاجتماعية لسه فيها الكثير من المشاكل حصل انقطاع للصحفيين المنقولين الى الاهرام لانه فيه شهرين لم يتم تسديدهم ودا بالمخالفة للقرار ، فيه الحقيقة حالة عدم اهتمام من الاطراف اللي مفترض انها بتساعد الدولة في تنفيذ قرارها رجال الدولة الموجودين في المؤسسات القومية مفترض ان هما ينفذوا القرار الا ان الحقيقة واللي موجود الان عكس هذا الكلام فاصل محمد صلاح: محمد صلاح: هو نقابة الصحفيين كان لها دور يا استاذ مكرم في موضوع الدمج ؟ أ/مكرم محمد احمد: آه..احنا كنا ضد الدمج واصدرنا بيان واضح قلنا ان الدمج لابد ان تتكافئ فيه حقوق المدمجين مع حقوق الدامجين وانه لا ينبغي ان يأتي على حساب احد محمد صلاح: هو واضح ان المدموجين كانوا فرحانين ان هما هيندمجوا واللي كان هيندمجوا عندهم اعترضوا فمحدش خد حاجة . أ/مكرم محمد احمد: آه.. هو الذي حدث بالفعل ان المجلس الاعلى تعهد عشان يطمئن المؤسسات اللي حصل تجاهها الدمج ان هو سوف يتحمل الخسائر لمدة 3 سنوات الى ان تتوازن الميزانيات وانه سوف يكون مسئول مسئولية كاملة عن تعويض هذه الخسائر محمد صلاح: ايه دور النقابة هنا في رعاية مصالح الناس دي ؟ أ/مكرم محمد احمد: دي علاقات مؤسسات خارجة عن النقابة احنا دورنا ايه فيها.. محمد صلاح: الحفاظ على حقوق الناس . أ/مكرم محمد احمد: اقول لحضرتك اولا من الذين ثبتنا ان التفاوض وصل الى هذه النقطة قبل موقف النقابة لم يكن المجلس الاعلى قد اتخذ قرارا بمسئوليته عن الخسائرعشان يطمئن بتوع الاهرام وبتوع الاخبار وعلشان الكل يحس انه مستفيد من الدمج وان الدمج لن يكون على حساب احد يعني موقف النقابة هو الذي سبب هذا ، جت المشكلة بتاعة الاخ اللي بيتكلم عنها الاستاذ محمد بسيوني الاهرام هما بيقولوا ان من حقهم ان يذهبوا الى الاهرام كمبنى لانهم اصبحوا من ابناء الاهرام فما الذي يمنع من ان تكون لهم مكاتب في قلب الاهرام والا يبقى دا نوع من التمييز وقضيتهم صحيحة من الناحية الشكلية ، الاهرام بيقول على الجانب الاخر انه ليس لديه مكان ، الاهرام كان يعتزم ان ينقلهم الى قليوب، النقيب وقف ضد هذا بقوة وتغير موضوع قليوب وانتهى لانك انت هتوديهم قليوب ايه هما لانهم محررين زراعيين رايح توديهم في الارض الزراعية..!! يعني وايه الحكمة انك انت تضيع منهم ساعة ونص رايح وساعة ونص جاي في زحام المواصلات الحقيقة يعني الدكتور عبد المنعم سعيد كان راجل عاقل جدا وكان متفهم وقلت له احسبها حسبة اقتصادية دا انت مجرد حتى لو حسبتها اقتصاديا هتلاقي لو انت رتبت لهم مكان وسط القاهرة او مكان في الاهرام سوف يكون اوفر ..ابتدينا ندور على مكان وقبل المنطق وقدم الاهرام مكانا ..المكان الاول الذي قدمه الاهرام اعتقد بانه ضيق ولا يمكن تحط فيه 90 واحد لو قلنا ال90 واحد دول هيحضر منهم نصهم لا يمكن وذهبت مرة تانية الى الدكتور عبد المنعم سعيد ..يادكتور عبد المنعم سعيد المكان فيه 160 متر لو حطيت في السقف جلدة كل واحد هيقعد في الجلدة الراجل مرة تاني اقتنع بهذا الكلام والحد الادنى ايه قلنا الحد الادنى المتطلبات.. حددنا متطلبات المكان هما الزملاء بيقولك والمكان اللي قدمه الاهرام في شارع مراد في مكان محترم هما بيقولولك لا لازم نكون في الاهرام عل شارع الجلاء، الاهرام بيقول متاسف معنديش مكا ن انا لو عندي القدرة عشان افتش في الاهرام عشلان اشوف الاوض الفاضية اسكنهم فيها ولا عندي جراح او مبضع عشان اشوف عبد المنعم سعيد ضحك عليا ولا ماضحكش عليا ..انما في النهاية انا ملتزم بحاجة اساسية ان يكون مكانهم فى القاهرة في مكان محترم ان يكونوا في ظروف عمل لائقة موجود في مكتب كويس عنده اوضة يستقبل فيها ضيوفه ومصادره عنده دورات مية نظيفة عنده تيكر عنده عربية توصله لمهامه هذا التزامي الاساسي ، موضوع بقى انه يبقى جوه الاهرام ، الاهرام يعتذر بانه معندوش مكان وانا شايف انه اذا توافر مكان مريح سواء هنا او هنا ينبغي ان الطرفين يعشقوا في بعض لانه انا اعتقد انه ممكن ان يكونوا اضافة جيدة للاهرام محمد صلاح: ايه اكتر انجاز انت حاسس انك حققته ؟ أ/مكرم محمد احمد: العقد الجديد اللي الصحفيين الصغيرين فانت عندك على الاقل 5 معامل مجهزة بالكمبيوترات لتدريب الصحفيين اقسم بالله ليس فيه معمل في الشرق الاوسط كله زيه ودا اتعمل في ظل العامين السابقين على الاقل 300 كمبيوتر ولم تدفع نقابة الصحفين مليم ، 3 معامل للغات ، معمل لتعليم التصوير ودخلوا الولاد وعارفين الولاد المطلوب وعملنا فيهم دورة للكمبيوتر كل صحفي انا اظن ان حجم الانجاز اللي اتعمل في مجال التدريب ومعانا سيدة عضو شاطرة عبير السعدي شاطرة وعضو مجلس نقابة وعندها دأب وشغالة دورات بصفة مستمرة يمكن حجم الذين تدربوا حتى الان يكاد يقربوا من الف صحفي ، محدش بيتكلم عن دا ليه لكن عاوز اقولك ايضا كمان انه غير دا وغير دا غير ال200 وغير المعمل وغيرحل مشكلات كتيرة جدا ، الاخبار كان فيها مشكلة متفاقمة قد تصل الى حد الانفجار لان انا بعتقد مش حاجة جميلة قوي ان انا اقول حليت مشكلة 20 صحفي في المكان الفلاني ..لا ..الحاجة الجميلة انك تخليهم يعشقوا مع بعض تخليهم يتعاونوا انا مش موجود عشان اتنصر طرف على طرف انا موجود عشان ادخل طرف مع طرف واصلح العلاقة من جديد اعتقد ان انا عملت دا في 4 مؤسسات 3 منهم قومية وواحدة خاصة بشكل جذري وبشكل مهم لكن الاهم من دا لابد انك انت تعيد العدل لولد صحفي شاب يكون احس بالظلم وانت ترجعه لعمله او تمكنه من ان هو يكسب سنة اعارة او تصالحه على رئيس تحريره او رئيس مؤسسته او تمكنه من ان يعود الى الكتابة بشكل منتظم لما تشوف فرحة هذا الزميل الصغير هذه الفرحة تعدل العالم كله وهو دا ربما يكون السعادة الوحيدة اللي الواحد بيلقاها في ظل الشقاء اللي بيعانيه هم يعرفون وانا اعرف وغالبية الصحفيين يعرفون محمد صلاح: كل الصحفيين عارفين ظروف المهنة وظروف النقابة يمكن منحنا للاستاذ مكرم محمد احمد يتكلم عما يعتبره انجازات قدمها للصحفيين اكتر من 50 دقيقة على اللي قدمه خلال السنتين اللي فاتت وواجهناه بمشاكل وهموم الصحافة وقال الاستاذ مكرم معانا النهاردة كلامه كان كلام جميل كلام معقول بس اكيد كان كلام مسئول خلص الكلام سلام نلتقي في الحلقة المقبلة
