يوميات فاهم وفهيمة.. حلقة رقم (10)

"فهيمة": صباح الخير يا حبيبى.
"فاهم": اللهم اجعله خير!! صباح النور.
"فهيمة" بدلع: بطّل كسل، قوم عشان تجيب خضار وفاكهة.
"فاهم": خير، وحضرتك رجلك انكسرت إن شاء الله!!
"فهيمة" ضاحكة: النهاردة مش هزعل منك، مسموح لك تقول أى كلام، إن شاالله هبل حتى.
"فاهم": أنا عارفك، طالما قلتى الكلام ده يبقى أكيد وراكى مصيبة، خير يا "فهيمة"!!
"فهيمة": أبدًا يا روح قلبى من جوه، عمى معزوم عندنا على الغدا النهاردة.
"فاهم" بانفعال وصراخ: على أساس إنى أنا "كيس جوافة، قفص لفت، ردل من غير مية، حاجة مالهاش لازمة"!!
"فهيمة" بصوت عالى: وليه ده كله يا صاحب السعادة، عمى وجاى يزورنى.. إيه اللى فيها دى!
"فاهم": المفروض يا هانم يا بنت الأصول قبل ماتقولى تعالى يا عمى تاخدى رأيى ولا إيه؟!
"فهيمة": عادى جدًّا، وإيه اللى حصل، خير.. ليك شوق فى حاجة يا ابو الرجالة؟!!
"فاهم" بصوت واطى قوى: آه يا اولاد ............. خير، إيه المناسبة؟!
"فهيمة": إنت زعلان قوى كده ليه؟!
"فاهم": بصراحة عمك "نحس" ومفيش مكان دخله إلا ما شاء الله، خلى الأخضر يبقى يابس، الله أكبر.
"فهيمة": دى كلها إشاعات، ده احنا بنقول عليه البركة.
"فاهم": طبعًا بالنسبة "للنحس" الكبير يبقى بركة ونص، فيه نحس تانى مدمر البلد كلها، وكل الناس عارفة إلا هو.
"فهيمة": قصدك مين؟!
"فاهم": اللى على راسه بطحة، وبعدين إيه الغباء ده، البلد كلها عارفة وانتى بتسألى؟!
"فهيمة": اتلم يا "فاهم" أحسن لك، كل الاتصالات عندى، كل المكالمات اللى صوتك فيها أحلى من عبد الحليم حافظ.
"فاهم" بتهتهة: يا نهار اسود، يبقى الكلام بجد بقى.
"فهيمة": لازم نعرف مين معانا ومين علينا.
"فاهم": طيب.. ماشى، ولوكان الشعب كله عليكم تعملوا إيه؟!
"فهيمة": الشعب الإخوانى والحمد لله كله على العهد والسمع والطاعة، أما انتم فلا يسمع لكم صوت، ولانفكر فيكم أصلا.
"فاهم": فعلا.. إذا لم تستحِ فاصنع ما شئت.
فى أثناء كلام "فاهم" يدق جرس الباب، يدخل العم المنحوس.
"فاهم": يا ميت أهلا بوش الخير والسعد ،عمى حبيبى. وأثناء هذا الكلام تقطع الكهرباء، يصرخ "فاهم": قابل يا معلم.
"فهيمة" تصرخ من جوه: المية قطعت يا "فاهم".
"فاهم": أهلا يا عمى أهلا!!!
"فهيمة" من الداخل: أنبوبة البوتجاز خلصت مع إنى جايباها امبارح.
"فاهم" يرقص: حبيبى يا معلم!! ويلف حوالين العم "مال" لو قعد عندنا أربعة أيام هنعمل إيه؟ هنموت من الجوع ولا نقطّع بعض!! ولسه احنا فى أول اليوم.
"فهيمة" بكسوف: أهلا يا عمى، حمد الله على السلامة.
"فاهم": طالما مفيش إحساس، إنتى طالق يا "فهيمة"، خدها فى إيدك، تعيش وتتعزم يا وش الخير، وسلّم لى على الكبير.
"فهيمة": البيت بيتى يا "فاهم".
"فاهم": كان زمان، خلاص انكشفتى يا لئيمة، ده بيتى ووطنى، ولا يمكن أسيبه لحد مهما كان، وانا وانتى والزمان طويل يا وش النحس .