يوميات فاهم وفهيمة حلقة رقم (13)

تدخل فهيمة زعلانة وتقول الشعب ده مش ممكن يتغير الفساد واصل للركب إيه الشعب الغريب ده..
وتبص ناحية فاهم: إيه يا عم إنت واقع على ودنك إنت وصغير مش سامعني طب عبرني قولي مالك.
فاهم متعجبا: خير يا فهيمة ماله الشعب اللي مش عاجبكم.
فهيمة: شوفت اللي حصل من الست أم أسامة اللي كنت فاكرها ست جدعة طلعت مع الأسف أي كلام.
فاهم يصرخ: إيه عايزه تاخدك للحرام يا نهار أسود هى وصلت خير يا هانم من غير كدب قولي إيه الموضوع؟
فهيمة ضاحكة: حرام إيه وحلال إيه يا عم إنت مخك راح فين؟
فاهم: والله معاكي حق ده أنا متجوزك صدقة على روح المرحومة أمي الله يرحمها.
فهيمة: يا راجل عيب عليك هو انت بتعترض على خلقة ربنا ارجع إلى ربك وتوب أي نعم أنا وحشة شوية أعمل إيه؟
فاهم: مش شويه ده قوي أستغفر الله العظيم وحسبي الله ونعم الوكيل، بصوت خافت، في اللي كان السبب في الجوازة دي يقعد له في صحته وعافيته ومراته.
فهيمة: بتقول حاجة يا فاهم يا حبيبي؟
فاهم بصوت خافت: حبك برص، لا أبدا مالها الست أم أسامة وزعلانة منها للدرجة دى ليه؟
فهيمة: أبدا يا خويا قال إيه لاقيتها عاملة بامية باللحمة الضاني وهي عارفة إني ضعيفة قدام اللحمة، وصنية كيكة بالسمنة البلدي.
وطبعا الحاجات دي كلها أنا محرومة منها والبركة فيك.
فاهم بعد أن بلع ريقه: وأكلت من غيري يا فهيمة؟ حسبي الله ونعم الوكيل فيكي.
فهيمة بعد ما تتنهد غيظ من فاهم: أنا جيت أقول باسم الله ونفسي مفتوحة وقلت لنفسي دي فرصة مش هتتكرر تاني وقال إيه ابنها أسامة عاطل وعايزني أكلم حد من الإخوان عشان يشغله.
فاهم يصرخ: وماله يا فهيمة وماله كان نفدتي باللحمة والكيكة فرصة يا غبية.
فهيمة: مانا قلت كده برضه لاقيتها مطلعة وصل أمانة بتمن اللحمة الضاني والكيكة والخضار والمصاريف.
قال إيه وفى حالة أن أسامة مشتغلش ملزمة برد المبلغ وطبعا إنت عارف الظروف شوفت يا فاهم يا أخويا مفيش ثقة خلاص الناس مش بتصدق بعض.
فاهم: هي بصراحة معها حق أنتم لا أمان لكم، حتى شوفي مرسي بيقول كلام وبيرجع فيه تاني ولا المرشد ولا الشاطر يعني الكبار بتوعكم بيرجعوا في كلامهم يبقى إنتي هتنفذي طبعا لا أم أسامة طلعت فاهماكم قوي.
فهيمة زعلانة جدا: أنا اللي مزعلني قوى الأكلة اللي راحت مني وجاية في وقتها بالظبط.
فاهم: معلهش يا فهيمة ما لكيش نصيب فيها ويمكن لو أكلتيها كان روحتي القصر العيني قولي الحمد لله.
فهيمة: الحمد لله على كل حال آه منظر اللحمة الضاني مش غايب عني أبدا يا فاهم طالعة معايا أروح أمضي على الوصل واللي يحصل يحصل هتعمل إيه يعني إحنا الحكومة ومفيش حد يقدر يقولنا بم.
فاهم: هتروحي من ربنا فين؟
فهيمة: إن الله غفور رحيم.