يوميات فاهم وفهيمة.. حلقة رقم (11)

يصحى فاهم على صوت صراخ، وهتاف فهيمة "لازم ترحل يافاهم يالعين.. وديت حق فهيمة فين".. ارحل ارحل.
فاهم ركبه تخبط فى بعض: هى وصلت لارحل..لا أنا مش سهل أنا فاهم مش أى حد.
الهتاف من تحت: يا ترحل يانطلع بالعافية نخليك ترحل.. إحنا مش ساهلين أنت عارف فهيمة بنت مين؟.
يافاهم اسمع الكلام ما توديشى نفسك الليمان..
أثناء ذلك يخرج فاهم إلى البلكونة ويخرج الراية البيضة، وتصرخ فهيمة انتظروا لقد سحقنا فاهم.. سوف يرحل.
فاهم: نتفاوض يا فهيمة..

فهيمة:أانا صاحبة القوة وأنا اللى أملك الشارع شوفت القوة يا فاهم؟..

فاهم مهزوما: شوفت يافهيمة خلينا نوصل لحل يمكن نوصل إلى قرار يرضى جميع الأطراف.
فهيمة: أنا مش طايقة أشوف وشك.. أنا عايزة القصر.. قصدى الشقة.
فاهم: معلهش تعالى على نفسك، ونقعد مع بعض، وخلافاتنا تخلص.
فهيمة: خلاص هبعت مندوب من عندى ويشوفك ويخلص معاك..

فاهم: ياخسارة جاتلك الفرصة وتعملى كدة مع فاهم..
فهيمة: هو أنت مين؟.. ده أنت يادوب واحد كحيان عايز ياخد الشقة من فهيمة الغلبانة.. تبقى أنت ظالم وطاغية ومكانك الطبيعى "طرة "، ومع ذلك كل المطلوب أنك تخرج من الشقة بهدومك بس.. وده كرم منى..
فاهم: ماشى يافهيمة، أنا موافق.. بس بشرط الشقة نتبرع بيها لدار أيتام.
فهيمة: موافقة وتضحك.. ماهو إحنا من الأيتام ياعينى.
فاهم: أنا إيه اللى ورطنى أتجوز واحدة منكم.. من 10سنين كنتى تبوسى رجلى ياجزمة.. زمن قلاب، لايخلى الراكب راكب، ولا الماشى ماشى، معلهش طالما فهيمة عملت كدة يبقى خلصت....
- تطلع فهيمة، ومعها حوالى 10شباب عضلات..
فاهم يرجع للوراء: عنف لا.. عنف لا.. يافهيمة افتكرى يوم حلو، افتكرى العشرة، أنا مش ضمن الجماعة.. حرام..
-الشباب لا يتكلمون.. ويكتفون فقط بالنظر إلى فاهم، الذى يبص عليهم.. ويجيله مغص ويمسك بطنه: ياليلة سودة يا فاهم، العيال دى ما بتفهمش، وبعدين مؤدبين قوى مافيش شتيمة ضرب وسحل وخرطوش...

فهيمة: اتنازل عن الشقة يافاهم..
فاهم: عقد التنازل معاكى يافهيمة، أنا جاهز ولا تزعلى نفسك.. بصى لما جيتى أنا قلت لا؟! مستحيل.. مش خوف..لا.. تقدير.. بس مش ليكى لكن للشباب الحلو والمحترم أبو عضلات كبيرة، اللى مش فاهم حاجة خالص، هو جاى يضرب فاهم الغلبان..
فهيمة: ما تحاولش هما مهمتهم تنفيذ اللى أنا عايزاه..
فاهم: مبروك عليكى القصر قصدى الشقة، بس من النهارده مش هتعرفى تنامى.. الأقارب والأصحاب والأحباب كل يوم ينكدو عليكى، لأنك أخدتى القصر وطردتينى منه، مع أن الاتفاق أننا نعيش فيه مع بعض..
فهيمة: خدوه إلى طرة وجنب الحبابيب حطووووه..
فاهم: حسبى الله ونعم الوكيل!!