ساعات دماغي تضرب مني .. واتخيل حاجات عجيبة .. لو مفلس مثلا والجيب مفهش ولا مليم اروح ع السرير بدري قبل ميعاد نومي واسرح سرحة بنت كلب .. كسبت مثلا 10 مليون جنيه في اى مسابقة من المسابقات .. واعيش بقى مع نفسي .. حشتري فيلا في التجمع الخامس واجيب عربية " بي ام " .. ع الزيرو ويمكن اخطف رجلي واروح باريس واجيب من هناك شوية برفانات .. وياسلام بقى لو مراتي وافقت وسابتني اتجوز انجيلينا جولي وكيم كاردشيان ومعاهم بقى بالمرة سمية الخشاب وطقت في دماغي مرة وعملت حديث مع مبارك بعد ما اتخلع .. ونشرته على موقع " مصراوي " قبل ما انضم لكتاب الدستور والتحرير .. وكان حديث عسل وله معنى جامد جدا وكتير من اللي قروه افتكروا ان انا قابلته بجد.
وعلى نفس المنوال الخيالي التخيلي حاعمل دلوقتي حديث ابن حرام مع الرئيس مرسي .. انا حر .. محدش له عندي حاجة .. أدي الريس مرسي .. وأدي العبد لله احمد عفيفي .. حاكلم نفسي .. بس انا اللي بسأل .. وانا برضه باعتباري مرسي حجاوب .. واهى فرصة .. النائب العام مش فاضي لي .. محتاس في نفسه .. يمشي بكرامته ولا يقعد بلطجة ومرسي حاميه؟
المهم قابلت الريس مرسي في قصر الاتحادية .. وقبلها قالوا لي فين الأسئلة عشان الريس يشوفها قبل ما تدخل عليه .. فقلت لهم : ادخل عليه ازاى هو انا حتجوزه .. ياعم هما سؤالين تلاتة بس في الصميم .. وبعدها اما تسيبوني اروح بيتنا او تعتقلوني .. براحتكم .. أصروا لازم الأسئلة الأول .. كبرت في دماغي : طيب عليا الطلاق بالتلاتة ما حد منكم حياخد الاسئلة .. وحاقابله يعني حاقابله.
سمعت صوت مرسي : مين اللي صوته عالي ده وفاتح صدره؟
رديت : انا ياعم مرسي .. ياعم الريس .. يا رئيس كل المصريين .. ياللي جيت بعد ثورة .. عايز اقابلك .. والمقاطيع اللي ع الباب مش راضين الا لمّا ياخدوا الأسئلة ويعرضوها على جنابك.
خرج مرسي من مكتبه وبص لي بصة غريبة شوية وسألني : انت بتكتب في اى جريدة ؟ قلت : التحرير رد : بتاعت إبراهيم عيسى .. ابو حمالات .. ولك عين تيجي لحد عندي .. اقبضوا عليه صرخت فيه : يقبضوا على مين يا عم الحاج .. وماله إبراهيم عيسى ابو حمالات .. عشان يعني كاشفكم وفاضحكم؟ قال : انت لمض أوي ولسانك طويل قلت : بعض ما عندكم رد : وقليل الأدب كمان قلت : من عاشر القوم اكتر من 200 يوم صار منهم رد : الله عليك .. ده انت صايع بقى؟ قلت : من جاور الحداد ينكوي بناره قال : جرى ايه يا ابني انت .. هو كل ما حقول كلمة ترد عليا بمثل؟ قلت : م الأخر يا عم الريس .. مش حنقضيها لت وعجن وأمثلة .. حتخليني اقابلك ونعمل حوارنا .. ولا مش لازمك الحوار من أصله؟ .. نظر مرسي إلى حراسه وقال لهم : سيبوه .. تعالى يا حيلة أمك قلت : من أولها كده حنقل أدبنا .. أمي ماتت من زمان وكانت مخلفة عشرة قال : أحسن .. اكيد ارتاحت منك ومن طولة لسانك.. ثم جلس على مكتبه وبقرف شديد : خلصني وشوف عايز تسأل في ايه. قلت : إيه اللي انت بتهببه ده من ساعة ماجيت وبقيت رئيس؟ قال ولم اشعر بأنه غاضب : انا رئيس كل المصريين .. انا جي بعد ثورة وبالصندوق .. فحافظ على كلامك بدل وقسما بالله ما انفخك قلت : تنفخ مين يا عم الحاج .. والله العظيم ما تقدر .. وبعدين بلاش بمناسبة ومن غير مناسبة تقول انا رئيس كل المصريين .. بتفكرني بالراجل اللي في فيلم فؤاد المهندس " انا مش قصير أزعه ..انا طويل واهبل .. وبعدين ايه حكاية انا جي بعد ثورة .. " أحه " يا ثورة .. وبلاش كمان وحياة ابوك يا شيخ حكاية الصندوق دي .. بقت ماسخة ودم أمها يلطش.
رد : سبحان الله .. مش هى دي الديمقراطية ؟ قلت : ايوه يا سيدي هى دي الزفت الديمقراطية .. بس انت عارف وانا عارف .. اللعب مش في الصندوق .. اللعب بره الصندوق رد : ماهى دي الشطارة .. ازاى تلعب بره الصندوق قلت : دي عاملة زي الصباع اللي بيلعب في مصر؟ قال : مش بالضبط .. بس قريبة منها قلت : الا بمناسبة الصباع يا عم مرسي .. انت معجب بصباعك للدرجة دي .. رايح جي حاطه في وشنا .. قال : أمال أخوفكم بإيه؟ قلت : يا سلام .. اذا كنا مش خايفين منك كلك .. حنخاف لا مؤاخذة من " بتاعك " .. قصدي طبعا صباعك! ضحك وقال : المثل بيقول الثعبان اللي ميقرص .. الحبل احسن منه قلت : وانت بقى الثعبان اللي قرصته والقبر .. ونبي تتحط بلا نيلة قال : انا مطول بالي عليك ع الأخر على فكرة .. وانت لسانك عايز يتقطع منه 10 متر ويبقى برضه طويل قلت : دي الحاجة الوحيدة اللي كسبناها من الثورة .. لساننا زي الطلقة ومحدش فينا عاد يخاف قال : ده بيتهيألك .. قلت : لا وحياة أمك .. ده بيتهيألك انت .. خليك عايش في الوهم بتاعك وماشي على مبدأ خليهم يتشلوا .. لحد ما حيجيلك انت شلل وكساح كمان قال : لا انت زودتها ع الأخر قلت : وانت تخلي المؤمن يكفر والحليم يفجر ، والصبور لا مؤاخذة " يشخر " رد بعصبية : انت قليل الأدب .. انا حلاقيها منك ولا من الأراجوز اللي اسمه باسم يوسف قلت : بما انك جبت سيرته .. فأنا لو منه اشكرك وبشدة .. ففريق الإعداد بتاعه مش بيتعب خالص .. كل اللي بتعمله مادة جاهزة وكوميدية للبرنامج .. حاجة ببلاش كده قال : بس انت فاكر اني حاسيبه؟ قلت : حتعمل ايه يعني؟ رد : المثل بيقول اصبر على جار السو .. لا يرحل لا تيجي مصيبة تشيله قلت : الله ينور عليك .. خدتها من فوق لساني .. كنت لسه حاقولها عليك قال : انا مش عارف انتوا بتكرهوني ليه؟ قلت : ياختي عليها ياختي .. ايه الرقة دي كلها .. بقى انتي مش عارف الناس بتكرهك ليه؟ رد : والله ما اعرف .. عايز اسمع منك قلت : انت تكذب مثلما تتنفس .. دي واحدة .. التانية .. جلد اللي خلفوك تخين .. مفيش إحساس بتعربفة .. التالتة .. قابل على نفسك ان الجماعة تحركك بالريموت كونترول .. يمين يمين .. شمال شمال .. الرابعة واخد البلد على خراب اسود كأنها بلد أبوك .. لا همك اللي بيموت ، ولا فارق معاك انك تدوس القانون بجزمتك .. وجايب وزير داخلية ميجلوش نوم الا اذا شرب 10 كوبايات دم من دم عيالنا .. الخامسة ... .. استوقفني قائلا : حيلك حيلك .. ان كان حبيبك عسل متلحسوش كله .. شفت انا صابر عليك ازاى .. مع إني ممكن اطلع دين امك واخلي الدبان الازرق ميعرفلكش طريق جرة. قلت : ايوه كده .. بانوا بانوا على اصلكو بانوا .. فكرتني بناس من جماعتك يوم الاتحادية .. كانوا بيقولوا للمتظاهرين : يا أعداء الاسلام يا ولاد دين الكلب. قال وهو يضحك : ده بس عشان يخوفوهم قلت : لأ وانت الصادق .. ده عشان يبانوا على حقيقتهم قال : انت وجعت قلبي .. ومسألتش ولا سؤال عليه القيمة لحد دلوقتي قلت : طيب خد دي .. مين اللي جالك بالبلدوزر وخرجك انت وجماعتك من السجن ؟ قال : البلد مليانة ناس طيبين قلت : يا حبة عيني .. البلد فيها ناس طيبين .. هما دول اللي خرجوك؟ قال : أمال تفتكر مين يعني حيعمل كده؟ قلت : يا عم مرسي بلاش استعباط .. ربنا يخليلك حبايبك بتوع حماس .. واحنا من جهلنا وقتها قلنا دي خطة العادلي عشان الأمن يفك في البلد قال : وافرض انهم حماس .. ايه المشكلة؟ قلت : لا يا روح خالتك .. تفرق كتير وكتير اوي كمان .. اذا كانت حماس عملت كده .. يبقى لازم تقبض التمن .. وحتفضل انت أسير جميلها عليك انها حررتك من السجن وساعة الجد حتديها عنيك. قال : طيب وانت مالك .. هى عينيا انا ولا عنيك انت ؟ قلت : يا عم بلاش نلف على بعض .. وهى حماس حتعمل ايه بعنيك يعني .. هى كانت عين منى الشاذلي ولا زبيدة ثروت زمان؟ قال : مش حاريحك واقولك مين اللي خرجني من السجن قلت : يا عم الحاج دي باينة للأعمى .. ومش مستني جنابك يعترف قال : طيب هات السؤال التاني ؟ قلت : وانت كنت جاوبت ع الاولاني قال : وانت حترد عليا السؤال بسؤال .. ده انت البعيد " غتت " قلت : بلاها حماس .. ملعون ابوها يا سيدي .. ايه اللي انا عملته في القضاء ده؟ رد : ماله ده كمان .. انا رجل احترم القضاء واقدس القانون قلت : " احتين " وحتة قال بعصبية : جرى يا ابن " ... " احنا قاعدين في الاتحادية ولا في الخرابة؟ قلت : ما انت خلتها خرابة .. بلد بلا قانون ولا دستور ولا احترام لأى حاجة .. ناقص تخليها بلا شعب قال : ما هى دي المرحلة اللي جاية قلت : حتودي الشعب فين .. حتموتنا ؟ رد : لأ .. حاخليكم تموتوا بعضكم ونخلص من الحدوتة دي قلت : ومش خايف من ربنا؟ قال : ما انا بصلي واصوم وحجيت كتير قلت : وبكده تبقى رضيت ربنا؟ قال : انت جي تحاسبني ؟ قلت : قبل الحساب الكبير اللي حتقف فيع عريان قدام ربنا وحيسألك عملت ايه في شعبك يا مرسي قال : يا سيدي .. لكل حدث حديث .. احنا فين واليوم ده فين قلت : يا راجل اتقي الله .. ده انت في لحظة ممكن تموت قال: لأ .. انا صحتي زي الفل وزي الحديد قلت : يعني ايه .. كبير ع الموت .. عزرائيل حيجي لحد عندك ويجيب واطي .. حيخاف منك رد وقد بدى انه زهق مني : انت خنقت أمي .... ثم نادى حراسه بصوت غاضب : تعالوا خدوا الجدع ده من قدامي وارموه بره. وهنا سأله احدهم : نرميه في السجن ولا استمارة 6 قال : لا دي ولا دي .. خلوه يروح بيتهم .. ده تابع ابراهيم عيسى .. واحنا مش ناقصين سي عيسى يفتح علينا النار .. .. وقبل ان انصرف قلت له : يعني انت خايف من ابراهيم عيسى ومش خايف من ربنا؟ ابتسم ابتسامة غبية و " سمجة " كعادة كل أفراد جماعته .. وقال لي : روح يابني لحال سبيلك .. بس عليا الطلاق من بيتي لو شفتك تاني او لمحتك في مظاهرة .. حنفخ أمك قلت : وانا .. واقسم لك بالله .. لو ما اتعدلت يا مرسي .. حاخليك تتمنى ترجع بطن أمك تاني تقعد جنب القولون على رأى علاء ولي الدين ولا تشوف النور في حياتك .. يا راجل يا ناقص يا للي معندكش ريحة الدم.
