فهيمة: وصل النور ب67 جنيها يا غالي. فاهم: هو فين النور أصلا عشان أدفعه لا طبعا مش هدفع لما الحكومة تحترم الشعب يبقى الشعب يدفع. فهيمة زعلانة: لو كل واحد قال نفس الكلام بتاعك ده يبقى مفيش حد هيدفع يبقى الحكومة تفلس وبعد كده تطلع تشحت عليكم وبرضه مش هيعجبكم. فاهم: أدفع إيه وليه مش حرام لما أدفع حاجة أنا محروم منها ده اسمه استعباط واستكراد واستهبال. فهيمة: اعتبرها صدقة يا سيدي وبعدين هشام قنديل وحكومته تجوز عليهم الصدقة. فاهم: القادر وأنا غير قادر وعشان كده مش هطلع صدقة لا على الحكومة ولا غيرها. فهيمة: والله الست أم علاء اللي ساكنة قدامنا قطعت نفسي من كتر الكلام وفي الآخر قالت برضه مش هدفع حاولت معاها أبدا لكن أنا دفعت. فاهم: معاها حق وهي عشان عاملة حساب لجوزها ما دفعتش لكن حضرتك عاملة حساب لقنديل ووزير الكهربا والإخوان. فهيمة: والله قنديل صعبان علي قوي الشعب كله عليه وبعدين هو مش فاشل بكره الشعب يعرف قيمته لما يمشي. فاهم: أقولك الشعب هو اللي فاشل بس امتى هيمشي خلي الشعب يفرح. فهيمة: أنا حاسه كده إن الست أم هشام كانت تدعيله روح يا بني ربنا يجعلك على طول مظلوم. فاهم: والله مش عارف مين المظلوم ومع ذلك يا ستي إحنا شعب ظالم قاعد معانا ليه ما يمشي ولا يشوف شعب غيرنا ويحل عنا بقى. فهيمة: يا عمي هو مرتاح ومبسوط وزي الفل والنهاردة فاشل بكره ينجح وبعدين أنا عرفت إنه بياخد درس خصوصي عند البروفيسير مهاتير على حساب الإحوان يعني مش على حساب الشعب. فاهم: والنبي ولو عمل إيه برضه مفيش فايده زيه زي مرسي والإخوان مفيش فايدة مفيش فايدة. فهيمة: معلهش استحملهم عشان خاطري دول عشمانين في الشعب مش دايما الريس مرسي وسط الكلام يقول سامحوني بيقول ولا لا؟ فاهم: طيب يا ستي يخلع بقى مش كفايه كده البلد هتغرق دي خلاص غرقت. فهيمة تبكي: يا ريت الموضوع بيده ده عبد المأمور يا عيني والله لوكان عليه هو عايز يقعد في زاوية صغيرة كده في البلد ويصلي بالناس ويوعظهم لكن يعمل إيه حكم القوي. فاهم: معلهش من غير عياط الله يخليكي أنا مش ناقص هو راجل طيب بس ما ينفعش. فهيمة: أنا كل مكان أروح فيه بحس إني عامله عملة وبيبقى وشي في الأرض من كلام الناس واحنا لازم ندافع عنه صح غلط ده هو برضه ابن الجماعه، وهات يا عياط. فاهم: خلاص أنا مسامح في وصل النور وحسبي الله ونعم الوكيل!!