يوميات فاهم وفهيمة.. حلقة رقم (16)

فهيمة مبسوطة قوي تجري على فاهم ليك عندي مفأجاة إنما إيه عنب يا معلم حاجه ولا في الأحلام.
فاهم وهو قرفان : مع اني متأكد أن مفيش حاجه تيجي منك تسر القلب لكن مفيش مشكله خير ياستى.
فهيمة :بص ياسيدى ايه الأزمة اللي الناس الايام دي بتشتكي منها ليل ونهار.
فاهم : السؤال يبقي ايه اللي ماحدش بيشتكي منه ليل ونهار الأسعار ولا الانفلات ولا انهيار بلدنا ولا انقطاع الكهربا ولا ولا ............................
فهيمة :الله ينور عليك هو ده اللي عليه القصد والنيه .
فاهم :عارف كلمت واحد صاحبي صيني هيجيب لي فانوس يشتغل بالغاز وشوية حاجات كدة لزوم البيت بروضة بالغاز.
فهيمة :ما انت دماغك شغاله وزي الفل اسمع بقي ياسيدي فيه رجل أعمال إخواني بس راجل محترم قوي عمل صفقة مولدات كهربائية إنما ايه تحفة وسعر مفيش زية .. واية يامعلم بعلاقاتة عمل منع استيراد لمدة 5 سنين يعني من الآخر كدة نطلع على وش الدنيا هي دي الفرصة اللي لازم نستغلها .
فاهم :يا نهار اسود ومش بعيد تكونو اللي مسلطين وزير الكهربا عشان يقطعها الامور تمشي معاكم.
فهيمة مبسوطة قوي :مش للدرجة دى لكن دي بالطبع فرصة هايلة ولازم نستغلها فهمت.
فاهم :امال فين بقي مصلحة الشعب واحنا بنخاف ربنا ولا كلها شعارات كدابة حسبي الله ونعم الوكيل فيكم.
فهيمة : هي التجارة حرام لكن لو حد تاني مش اخواني كنت هللت وكبرت فعلا العين تكره اللي أحسن منها.
فاهم :انا اكره الاستغلال وده استغلال مرفوض وحرام.
فهيمة تصرخ :ليه هو احنا سرقنا حد.. نصبنا على حد احنا بنقول ياجماعه ظروف البلد وحشة والكهربا على طول مقطوعة فيه مولدات كهربائية وبسعر كويس كاش وقسط كمان.
فاهم:انا تعبت منكم ايه المطلوب مني اخلصي.
فهيمة :حبيبي حبيبي ايوه كده احبك لما تسمع الكلام وافرح اكتر لو بقيت من الإخوان.
فاهم :وايه المطلوب.
فهيمة :ولاحاجه يانور العين هتاخد نسبة من الارباح 25% اظن الموضوع هيبقي عنب ماشي ياجوفة.
فاهم :طيب ولو قلت لا ايه اللي هيحصل.
فهيمة :ولاحاجه يا حبيبي انت اللي خسران يعني من الاخر كده كل واحد يبقي في حاله
فاهم :هي وصلت إلى كده.
فهيمة: انت حبيبي وكل حاجه لكن عند الفلوس ومفيش حب ودي سبوبة زي اللوز وجايبها من بوق الاسد وتقولي لا يا خي نياها ها ها.
فاهم يقلب يدية: فعلا ربنا ما يحكمكم على شعب طيب زينا أمين.
فهيمة: حبيبي الدعوه دى خلاص كانت زمان احنا النهارده الحكام ودم الشعب لينا حلال وسلم لي على قلبك قلب العصفور الأخضر.