فهيمة: انت معاك رقم وفاء عامر؟ فاهم مستغرب: ليه هي عملت إيه حرام عليكم من حقها تقول رأيها اتقو الله. فهيمة بعصبية: انت فهمت الموضوع غلط احنا عايزين نروح لها ونعتذر ليها على الكلام الفارغ ده. فاهم:يا سلام إيه الحنية دي كلها؟ فهيمة: مش حنية ولا حاجة الموضوع أن تعليمات صدرت أن وفاء لازم تضحك وتطلع الصورة حلوة وبعدين اللي فات مات. فاهم: الموضوع مش كده إنتم مش فارق معاكم لا وفاء ولا إلهام أكيد فيه سر. فهيمة: مع إنك مش معانا لكن فعلا احنا عايزين يوم 30 يعدي وبعد كده اللي يحصل يحصل فهي مش ناقصه الشعب اتخنق من الإخوان. فاهم:هو بصراحة مش اتخنق.. الشعب يريد رحيل الإخوان. فهيمة تعيط وتمسح دموعها فاهم: انتي مستعجله ليه على العياط يوم 30 العياط اللي بجد. فهيمة: لا مش بعيط على يوم 30 امبارح الريس مرسي قعد معانا والله يا عيني صعب علينا وخصوصا لما قال أروح فين وأنا عندي عيال والله حاجه تقطع القلب. فاهم مستغرب: هو مين اللي كان معاكم امبارح هو مين؟! فهيمة: مرسي يا حبة عيني والله يصعب على الكافر وقطع قلبنا إنه قال ده أنا لسه مكملتش سنة لسه مفرحتش وبصراحة مش هيبقى له معاش كمان يعني موت وخراب ديار. فاهم: يا حول الله يا رب لا والله صعب عليا. فهيمة: أمال يا حبيبي لو شوفته امبارح وهو قاعد يعيط ويقول شوية كلام يخلوا الحجر ينطق بس للأسف الشعب مش عايز يسمعه. فاهم: وانتم هتعملوا إيه يا حول الله والله صعبتم عليا. فهيمة: والله انت قلبك طيب شوف قلت ايه.. أمال لو شوفت الريس امبارح كان عملت إيه؟ يا حبيبي يا ريس. فاهم: أنا عندي اقتراح هايل. فهيمة بفرحة: خير يا حبيبي؟ فاهم بصوت منخفض ويقرب منها: هو يبلغ فرار النهاردة الساعة 3 الصبح ولا من شاف ولا من دري. فهيمة: ما ينفغش عشان الإخوان مش راضيين وهو قال كده بس اترفض. فاهم: خلاص ينتحر ويريح ويستريح. فهيمة بزعل: لا لا مستحيل أستغفر الله العظيم المشكلة مش في مرسي المشكلة في مستقبله اللي ضاع والجامعة رافضة رجوعه تاني يعمل إيه ويوم 30 خلعه يا حبيبي ياعياط إهئ إهئ.