يوميات فاهم وفهيمة.. حلقة رقم (27).. هروب مرسي إلى إثيوبيا

فاهم: مش عارف ليه حاسس إن الريس مرسي هيعمل مفأجاة للعالم كله وتبقى حركة حلوة قوي
فهيمة: وأنا مش عارفه ليه حاسه إن إحساسك ده غلط.
فاهم: ليه يمكن يكون راجع نفسه وفكر يعمل حسنة في حياته ويهرب ويلم هدومه وعياله ويقول يا فكيك؟
فهيمة: ليه هو بعد الشر عامل عملة وسارق سريقة؟! لا مش احنا يا حبيبي
فاهم: هو انتي فاكره إن مرسي مش ممكن يفكر في الهروب وهو لو الشعب قفشه تفتكري هيعملو فيه إيه؟ ده مش بعيد يعلقوه.
فهيمة: ليه مفيش رجالة وحريم ده إحنا ملايين وللدفاع مستعدين ويا نعيش عيشة فل يا نموت إحنا الكل
فاهم: الله يرحم لما كنتم زي القطط تنونو بس.
فهيمة: يا حبيبي ده كان زمان إحنا دلوقتي شعارنا يا فيها يا نخفيها والأيام بينا وبينكم.
فاهم: تعرفي يا فهيمة أنا عندي معلومة إن الريس كلم أمير قطر عشان يتعالج هناك بس لاقي الأمير هات يا عياط وقفل السكة في وشه.
فهيمة: بصراحه إحنا زعلانين قوي على اللي حاصل مع سمو الأمير وهو كمان اختار الوقت الغلط.
فاهم: هو كل اختياراته غلط قوليلي أختار إيه صح؟
فهيمة: هو مش مطلوب منه الاختيار مطلوب بس التنفيذ وغيره يفكر.
فاهم: والله أنا حاسس إن الريس مرسي هيسافر إلى أي دولة ولا حد هيعرف عنه حاجة من يوم 29 وغالبا هتكون إثيوبيا وبكره تشوفي.
فهيمة ترتعش: ما تهرجش يا فاهم هو ممكن ده يحصل فعلا لا لا وممكن تطلقني وترميني في الشارع والواد فهيم يتربى في الملجأ، وتصرخ، لا لا مستحيل أكيد ده كابوس.
فاهم: مش كابوس ده دبوس وهيشك كل إخواني عايز يفرض على الشعب المصري اللي هو عاوزه.
فهيمة: بصراحة إحنا خايفين ومن يوم 30 مرعوبين وأنا حاسه إننا احتلال.
فاهم: والله أنا حاسس إنها هتبقى ليلة الهروب الكبير.
فهيمة: هو احنا فعلا مكروهين؟
فاهم: يا سلام ده إنتم كرهتم الشعب في نفسه وحسبي الله ونعم الوكيل.