شرعية: شكرا يا ست بمبة العيال بيقولوا إنك ماسبتيهمش لحظة واحدة من ساعة ما أنا مشيت بمبة: ده واجب وولادك زي ولادي مفيش فرق بينهم بس المفروض إنك تراعيهم أكتر من كده وتبطلي نزول لرابعة كفاية جوزك هناك شرعية: جوزي محتاجني جنبه علشان أشد من أزره وأقويه وأنصره بمبة: تقويه على مين؟ على المصريين؟ كلنا اخوات ومسلمين شرعية: مفيش مسلمين غير الإخوان والسلفية والباقي مدّعين بمبة: مين اللي حكم بكده؟ انتم؟ المرشد؟ حسن البنا؟ الجماعة ومكتب الإرشاد؟ بطلوا جهل انتم مش ظل الله على الأرض، انتم مغيبين مش فاهمين حاجة ورجالتكم بتسوقكم زي النعاج الإسلام مش شعارات وجماعات الإسلام أكبر وأسمى من كده الإسلام في قلوب الناس وأرواحها وضمايرها انتم بتثيروا الفتنة في الأرض الفتنة اللي كانت نايمة ولعن الله من أيقظها شرعية: الفتنة اللي أيقظها الجيش والسيسي هو اللي تجنى وشال الرئيس مرسي بمبة: مش مكسوفة من نفسك لما تقولي على مرسي رئيس؟ ده فاشل مفيش غيركم حس إنه رئيسه مرسي لأنه منكم وانتم من عشيرته الحكاية مش حكاية رئيس الحكاية حكاية نفوذ انتم عاوزين السلطة وده كل همكم وعمر الدين ما شغل بالكم دلوقتي بتتمحكوا في الدين، الدين الإسلامي طول العمر في مصر يخدم ويصان وعمر ما حد هانه انتم اللي هنتوا الدين لما دخّلتوه في السياسة طول العمر والمصريين فاكرين إن الإخوان المسلمين ناس شرفاء ليهم مبدأ وليهم قضية كنا فاكرين الدعوة هي قضيتهم وكنا دايما بنعذرهم وبيصعبوا علينا من اللي شافوه من سجن واعتقال وتعذيب على إيد كل الحكومات اللي مرت على مصر لكن لما مسكوا الحكم وعاشرناهم وجربناهم وشوفناهم عرفناهم على حقيقتهم خداعين منافقين بيتاجروا بالدين وبيتحالفوا مع الشيطان لو مع الشيطان مصلحتهم ما يعرفوش العدل معقدين مغرورين متعالين فاكرين انهم همه وبس المؤمنين المسلمين والباقي كفرة مين اللي قال كده؟ ومين اللي حكم بكده؟ جهلهم، الدين الإسلامي دين يسر مش عسر وبعدين همه عملوا إيه طول السنة اللي فاتت للدين الإسلامي؟ شرعية: عملوا كل خير انتي ما شوفتيش مرسي وهو بيصلي الجمعة في الجامع؟ بمبة: كسبنا صلاة النبي، أنا أقولك مرسي عمل إيه للدين مرسي زوّد الضرايب على السجاير يعني وافق على تصنيعها وبيعها وهي حرام شرعا أو مكروهة، زوّد الجمارك على الخمور وبارك بيعها وتصنيعها وهي من المنكرات والكبائر ومخالفة للشرع والدين الإسلامي، وافق على القروض وقال إن الفوائد بتاعتها مصاريف إدارية وهي ربا، ما قفلش كباريه، زوّد الضرائب على صالات القمار في البلد رغم إن القمار ميسر وربنا نهانا عنه وباركه ده إيه ده؟ تدين؟ ولا حاجه تانية؟ إسرائيل مانعة القمار عندها وإحنا المسلمين مرسي ما منعهوش ووزير ثقافته الإخواني رايح يلغي فن الباليه.. هو ده الدفاع عن الدين الإسلامي؟ الدين الإسلامي بريء من مرسي وأمثاله اللي بيتاجروا بالدين إحكي في أي حاجة تانية غير الدين فهذه حماقة ما لهاش صلة بالدين ليها صلة بالتمكين والسلطة والنفوذ انتم بتدوروا على السلطه والكرسي والنفوذ مش أكتر من كده افهمي وصنفري مخك المصدي ده اللي بطل يفكر وجوزك هو اللي بيفكر بالنيابة عنك ويا ريته كمان هو اللي بيفكر ده الجماعة ومكتب الإرشاد والمرشد وهو كل اللي عليه الولاء والطاعة العمياء لما وديتوا البلد في داهية شرعية: أنا عمري ما سمعت الكلام ده من جوزي أنا باطيعه لأن الدين الإسلامي حث الزوجة على طاعة جوزها وبس بمبة: الزوج له على زوجته حق الطاعة بس ده ما يلغيش مخها وعقلها وإنها تفكر وتتدبر أمرها ما تبقاش زي البهيمة شرعية: مرسي لازم يرجع رئيس من تاني بمبة: ده حلم ووهم انتم واقفين في مكانكم ومش حسين إن الدنيا خلاص اتغيرت مرسي راح في الوبا واللي بيروح في الوبا ما بيرجعش تاني مرسي ما صانش مصر ولا المصريين إزاي تطلبي من المصريين إنهم يقفوا جنبه دلوقتي بعد ما ذلهم أبو دقن شايبة اللي فضل يقول أهلي وعشيرتي وهو كان يقصد الإخوان اللي إداهم كل حاجة في البلد ونسي باقي المصريين عمل نفس اللي كان بيعمله الحزب الوطني وكل اللي واقفين حوله دلوقتي همه أهله وعشيرته وجماعته اللي عمالين يحرقوا ويقتلوا وفاكرين إنهم حيضغطوا على السيسي بالكلام ده المفروض يفهموا إن مهما يعملوا كل ده مش حيأثر ولا حيغير حاجة مرسي راح راح شرعية: طول ما الشرعية معانا مرسي راجع بمبة: انتي مجنونة؟ شرعية إيه اللي انتي بتتكلمي عنها الشرعية انتهت يوم ما خرج المصريين يطالبوا برحيله الشرعية مش صندوق يا شرعية شرعية: الشرعية صندوق بمبة: طيب خلاص اعتبروا مرسي رئيس الصندوق مش رئيس مصر.. مصر اللي بيحكمها مش صندوق.. مصر اللي بيحكمها إرادة شعبها شرعية: إحنا حنوريكم وبكرة تقولي شرعية قالت لما مرسي يرجع بمبة: مرسي مش راجع وانتم خلاص انتهيتم وانتم اللي عملتوا في نفسكم كده بغباوتكم وعنادكم اللي يحاول يكسب كل حاجة بيخسر كل حاجة والإخوان حاولوا يكوّشوا على مصر كلها علشان كده خسروا كل حاجة ورجعوا للمربع صفر شرعية: الأيام بينا بمبة: وأنا موافقة نسيب الأيام تقول مين الصح ومين الغلط فينا، فوتك بعافية شرعيه: لاترد !!