بهية: مش حتستهدوا بالله بقي وترجعوا بيوتكم اللي بتعملوه ده مفيش منه فايدة.. مرسي مش حيرجع تاني افهموا بقي وبلاش مقاوحة.. انتم كده بتكرهوا المصريين فيكم شرعية: إحنا مش حنمشي احنا حنفضل قاعدين لحد مرسي مايرجع تاني بهية: بطلوا وهم وأحلام مرسي خلاص انتهي ولا عمرنا حنسمح برجوعه إيه أنتم مش بتفهموا حد يرجع تاني للفقر وقطع النور وزحمة العربيات على محطات البنزين اللي ماكنش موجود أيام حكمه دي كانت أيام مهببة ربنا لا يرجعها تاني. شرعية: الفلول هي اللي كانت السبب في أزمة البنزين بهية: والفلول برضو هي اللي كانت السبب في قطع النور بطلوا بقي ترموا فشلكم على الفلول إنتي عارفة الحقيقة بتقول إيه؟ شرعية: بتقول إيه؟ بهية: الحقيقة بتقول إن أنتم الفلول أنتم اللي سرقتكم ثورة المصريين وأنتم اللي احتليتم البلد وحاولتوا تأخونوها أنتم سبب كل سوء إحنا وصلناله وبقينا فيه ربنا يرحمنا منكم شرعية: طبعا أنتم ماصدقتم إننا انزاحنا عن الحكم عاوزين تعيشوا في انفلات وتسيب ومش عاوزين دين بهية: ماتدخلوش الدين في الموضوع.. الدين مالهوش دخل باللي بينا وبينكم اللي بينا وبينكم خلاف حول طريقة الحكم مش أكتر ولا أنتم بتلموا الناس نحوكم بموضوع الدين ده بطلوا إفلاس وخيابة واجهونا بالعقل والمنطق مش باللعب على نزعة الإيمان والدين عند الناس يا فشلة ياموكوسين شرعية: إنتي كل ماتشوفي وشي تتخانقي معايه ؟ إنتي إيه مش طيقاني ليه ؟ بهية: لأنك إنتي وجوزك وجماعتكم عايزين تودوا البلد في داهية تقدري تنكري إنكم بتفكروا في بلبلة البلد وإلهائها في مشاكل ومشاغبات باللي أنتم ناوين تعملوه شرعية: إحنا بنحاول نضغط على الجيش زي ما أنتم ضغطوا عليه وعزل لكم مرسي أهه إحنا بنضغط علشان يرجعلنا مرسي بهية: لو قعدتوا عمركم كله في رابعة مرسي مش راجع تاني لأن رجوعه حيهد كل اللي إحنا عملناه وده مش حيحصل ولا حيقبله الجيش والسيسي شرعية: بكره نشوف لما نعمل عصيان مدني ونهاجم المنشآت الحيوية والعسكرية إيه اللي حيحصل بهية: وإنتي فاكرة أن الجيش والشرطة حيسيبوكوا تعملوا كده ده أنتم حتاخدوا على دماغكم من الجيش ومن كل المصريين لما تفكروا تهاجموا المنشآت العسكرية أنتم كده بتنتحروا شرعية: إحنا بندافع عن الشرعية بهية: شرعية إيه يامجنونة ؟ الشرعية أم إزازتين زيت و2 كيلو سكر اللي وزعتوهم على الغلابة أيام الانتخابات شرعية: إحنا ماضربناش الناس على إيدها علشان تنتخب مرسي هي اللي راحت بمزاجها انتخبته مش جبر ولا غصبانية بهية: معذورة كانت فاكرة أن تحت القبة شيخ طلع شيخ منصر كداب خوان ملاوع منافق شرعية: مرسي مش كده بهية: مرسي هو ده بعينه غشاش مجنون لازم له علاج ده مصدق نفسه أنه كان رئيس شرعية: ولسه هو الرئيس بهية: آه لسه مرسي الرئيس بس هو رئيس مدينة نصر ورابعة العدوية إيه رأيكم لما نخليه رئيس مدينة نصر وياريت لو حصل كده حيعرف يمشيها ده كبيره يكون شيخ حارة مش أكتر من كده شرعية: أنتم مش قابلينه ليه وبتحبوا البرادعي ؟ بهية: مصر عمرها ماحبت فاشل والبرادعي وطني بيحب مصر وعاقل وحكيم وبيفهم في السياسة كويس أوي مش بتاع المكرونة الإسبكتي بتاعكم ده والأصابع الخفية خلي الأصابع بقي تنفعه يبقي يحطها في أي حتة تريحه بس يبعد بيها عن مصر شرعية: بكره يحط صوابعه في عين كل اللي رفضه وفرح فيه بهية: لأ هو حيحطها في حتة تانية شرعية: ماتعمليش كعك السنة دي أنا حجيبلك كعك من رابعة ما إحنا ناويين نعمل أفران نعمل فيها كعك العيد هناك وحنعمله بالسمنة البلدي بهية: ده حتفرقوه على خيبتكم ولا على روح مرسي ؟ شرعية: بعد الشر عن مرسي وربنا يديله طولة العمر ويخليه لينا شوفتي أنا بفكر إزاي وعاوزة أجيبلك كعك العيد وإنتي بتدعي على رئيسنا بالموت بهية: العيد يوم تغوروا في داهية يا مضللين يامغيبين ومش عاوزين منكم كعك أي حاجة من طرفكم مش عاوزينها إحنا كرهناكم من عمايلكم ارحمونا بقي شرعية: مفيش فايدة فيكم خير تعمل شر تلقي بهية: لا وانتي الصادقة خير تعمل مرسي تلقي شرعية: خلاص أنا حعزل من البيت ده وأسيبلك العمارة بحالها حروح مدينة نصر بهية: يبقي عملتي فيا وفي نفسك خير والبلد اللي تودي جاتكم القرف مليتوا البلد!
