"الحرب العاطفية الكبرى".. حب وخطوبة وزواج فى مواجهة شبح العنوسة.. زواج الصالونات يقضى على "فارس الأحلام"..وبنات الفيس بوك يرفعن شعار.. "عانس وافتخر"....

نقلا عن اليومى
«جواز الصالونات».. يقضى على مصطلح «فارس الأحلام»..محمد: اكتشفت أن عروستى «لدغة» بعد قراية الفاتحة.. وسهر: أم العريس شدتنى من شعرى فطردتها
«جواز الصالونات».. كلمة غالبا ما يرفضها البنات والأولاد لأنها تحرمهم من أحلام فارس الأحلام وسندريلا والحصان الأبيض التى تربوا عليها.
فكرة زواج الصالونات تنهى هذه الأحلام الخيالية وتفرض معايير أخرى جديدة للزوجة والزوج المثاليين، بعيدا عن الفتاة الحالمة والأمير بحصانه الأبيض، ليصبح المعيار الحاسم ل«جوازة الصالونات» الناجحة بنت جميلة الشكل تجيد أعمال الطبخ والتنظيف ومن أسرة اجتماعية مناسبة وترغب فى الاستقرار، ويكون الزوج المناسب لهذه البنت بالطبع شاب وسيم ميسور الحال لديه شقة وسيارة ودخل ثابت وقادر على تحمل نفقات الزواج ويبحث عن الاستقرار، وفى حالة عدم توافر تلك المواصفات فى أى من الطرفين تفشل «الجوازة».
وما بين مؤيد ومعارض لجواز الصالونات حملت مقابلات «الصالونات» الكثير من المواقف الطريفة والتى تحولت فيما بعد لذكريات جميلة عند البعض الذين تمت زيجتهم بنجاح وذكريات مؤلمة عند بعض آخر من الناس وذكريات مضحكة عند غيرهم، وما أن تمت دعوة نشطاء مواقع التواصل الاجتماعى لسرد أطرف المواقف التى تعرضوا لها خلال مقابلات الصالونات التى مروا بها فى حياتهم، انهالت القصص والمواقف المضحكة لتثبت أن الزمن لم يتغير.
«أم العريس».. الحماة مارى منيب مازالت تحيا بيننا إلى الآن
مشهد شاهدناه جميعا فى السينما المصرية لأم العريس التى لم تكتف بمجرد اختيار ابنها لعروسته ولكنها زيادة فى الاطمئنان تقوم بواجباتها المقدسة فى ضمان جودة البضاعة «العروسة»، تحكى إحدى الفتيات حكايتها وهى تربط بين حماتها وشخصية الحماة التى جسدتها مارى منيب، تقول: أنا جالى كذا عريس قبل كده ومنهم موقف لا يمكن أنساه أبدا دخلت سلمت على أم العريس وأخته وهو كان عندنا قبلها بيوم وشافنى وعجبته، المهم بقى أمه قالتلى اقلعى الطرحة ورينى شعرك وسألتها ليه، قالتلى عاوزه أشوف شعرك محبتش اكسفها ووريتها شعرى، وفوجئت بيها بتشد شعرى وتشد وتشد، وأنا ميته على نفسى من الضحك وبقولها انتى بتعملى إيه، قالتلى بشوفك قرعه ولا لأ، فأنا قلتلها نعم!! بتشوفينى قرعه ولا لا، نهار ابوكى أسود ياوليه، وقلت لبنتها قومى ياقرعه من هنا، ومن ساعتها معرفش ليه مردوش علينا لحد دلوقتى من سنتين».
جواز القرايب.. «اللى ياخذ من ملته يموت من علته»
للعرسان الأقارب نصيب كبير من قصص النشطاء، فعلى الرغم من صلة القرابة التى جمعت بين العروسة والعريس إلا أن روح «الصالونات» كانت الأغلب على جلساتهم وجاءت قصصهم أيضا طريفة فقالت منة الله هشام: «أنا ابن خالتى اتقدملى وإحنا قاعدين قالى فاكره لما عملتى حمام على رجلى وإحنا صغيرين كله كان بيضحك وأنا كنت فى نص هدومى وفضلت أعيط ورفضته».
ممكن تجوزنى مراتك لو سمحت؟!
من منا لا يتذكر مشهد الفنان الكوميدى «جورج سيدهم» فى فيلم «البحث عن فضيحة» والذى جسد فيه شخصية رجل أعجب بامرأة وقرر تتبعها والارتباط بها دون أن يعرفها فإذا به يطلب يدها من زوجها ويخرج من بيتها ب«علقة السخنة»، وعلى ما يبدو أن هذا المشهد لم يعلم الكثير من الشباب فراحوا يقعون فى نفس الخطأ فقال وائل المصرى «واحد صاحبى حكالى موقف غريب جدا عجبته واحده أووى راح مكلم واحد جاره واتعرف عليه وكان ساكن فى نفس عمارتها ووصفله البنت وحكاله إنه مراقبها من 3 سنين ومشى وراها كام مرة وهيجنن ويكلمها بس هو خجول جدا قاله دى اخت مراتى تعالى زورهم وأنا هاكلمهم لك المهم حددوا ميعاد ودخلت البنت تقدم الحاجة الساقعة وصاحبى انشكح قوى لما شافها فجاره قاله دى مراتى أخت العروسة!!!! صاحبى عرق وبقى فى نص هدومه شوية ودخلت العروسة بالجاتوه وكانت أقل جمالا من أختها فجاره بصله وقالوا نقرا الفاتحة قالوا على مين؟! قصدى، طبعا نقراها وقروا الفاتحة، واتجوزوا وهو عنده منها 3 عيال دلوقتى وبيحبوا بعض جدا».
متعرفش العروسة قبل كده؟!.. يبقى اتفاجئ
ولم تأت جميع المواقف التى تداولها مستخدمو مواقع التواصل الاجتماعى طريفة ومضحكة أو سيئة بل هناك من جاءت قصصهم لتنتهى نهاية سعيدة فشارك محمد فياض بقصة خطوبته لزوجته فقال: «أنا كنت رايح أتقدم لوحده كنت شوفتها فى فرح وحده قريبتى بالصدفة ورحت أتقدملها وقعدت مع أبوها فى بيتهم وقولتله إنى عايز أتقدم لبنته وحكيتله ظروفى والراجل قالى على العموم أنا هاخد رأى بنتى وهسأل عنك الأول وكلمنى وقالى على خيره الله واتفقت انى اجيب اهلى بعدها ب 3 أيام علشان نقرأ الفاتحه وأخدت أبويا وأمى وإخواتى، وبعديها لقيت أمى بتقولى إن العروسة كويسة وربنا يكرمك معاها ويرزقك بالخلف الصالح، طبعا أنا وأبويا وإخواتى الولاد كنا قاعدين مع أبوها وعمامها واتقفنا على الشبكة بعد أسبوع والفرح كمان ست شهور، وبعديها أهلى مشيوا وقعدت أنا وأبو العروسة جابها تقعد معايا شوية، وكااااانت المفاجأة كالتالى، أول ما قعدت بقولها مبروك وان شاء الله ربنا يجمعنا دايما على خير، وكانت الإجابه كالتالى بالأداء والصوت ده: «إياه يبايك فيك وإن شاء اياه أقدى أفيحك وأعمييك ايى انت بتتمناه!!!!».
طبعا أنا سمعت الكلام مكدبش عليكم اتصدمت وبلعت ريقى واتكسفت جدا من الموقف وبعدين اتكلمت معاها عادى جدا فى مواقف ومواضيع كتير وعجبنى أسلوبها وتفكيرها طبعا أنا مشيت من عندهم على قد ما كنت بموت من كتر الضحك من الموقف اللى حصلى ده إلا إنى كنت شايفها بصراحة زوجه مثالية بغض النظر عن اللدغة بتاعتها، لأنى كان ممكن أكون مكانها فى يوم من الأيام وفرحت أكتر إن أمى كمان كانت سمعت اللدغه اللى فى لسانها وحتى معلقتش عليها لأنها برضه اعتبرتها بنتها، وروحت البيت وأمى كانت مبسوطة بيها جدا هيا وأختى والحمد لله اتجوزنا وربنا رزقنا ببنت سمناها «جودى» وهيا أحلى حاجة فى حياتنا.
بنات الفيس بوك يرفعن شعار «عانس وأفتخر».. ويعلقن: شغلى اللى بحبه ب«100 راجل»
إذا حالفك الحظ وعشت قليلاً فى إحدى الدول الأوروبية لن تسمع هناك هذه الكلمة ذات المضمون الفارغة «عانس»، لكن فى مجتماعتنا هذا المصطلح شبح يطارد الفتيات فقط ويمحو أى إنجاز لها إذا لم تتزوج.
وقد تسببت حملة «عانس وأفتخر والعمل أولا» على الفيس بوك، فى جدال حاد، بدأ بإنشاء الصفحة لمحاربة كلمة العنوسة واقترانها بالفتيات فقط دون الرجال، حيث رأت الفتيات أنها مشكلة اجتماعية تخص الطرفين وتساءلن لماذا نحمل مسؤولية العنوسة للفتيات فقط؟ رافعين شعار «عانس وأفتخر والعمل أولا»، لرفضهم ما يشعرن به من قهر وظلم فى المجتمع.
وكانت أبرز التعليقات لسيدة مطلقة قالت: «المجتمع لن يقبل بأى شكل من الأشكال المرأة سواء عانس أو مطلقة.. وكان خوفى من الالتحاق بهذا اللقب هو سبب طلاقى الآن، مثلى مثل أى فتاة قررت أهرب من لقب عانس واتجوزت فور استكمال دراستى وكان نتيجة تفكيرى السىء للتخلص من لقب عانس هو الطلاق، وأنا متأكدة إن مرارة كلمة الطلاق هى الأصعب من كلمة «عانس».
وقالت أخرى كلمة عانس كلمة مخيفة بيدبح بيها المجتمع الفتاة لأن المرأة العانس تعيش عمرها وهى مطاردة بالشعور بأنها امرأة غير مرغوب فيها من الجنس الآخر، ومحرومة من الرباط المقدس الذى أحله الله، وتعانى من نظرة المجتمع لها ومن الحرمان من الشعور بالاستقرار وهذا مفهوم خطأ.
وقالت أخرى كلمة «عانس» ليست فقط هى العبارة المشينة فى حقنا هناك عبارات تستاهل أن تمحو، فمثلا تعبير «قطار الزواج فاتها»، وهذا تشبيه زواج المرأة بالقطار الذى يتجاوزها فى عمر معين، وكأننا نجعل الفتاة سلعة محددة بوقت معين لزواجها إذا لم تتزوج فيه فقد انتهت صلاحيتها، أما الرجل فهو القطار الذى يتجاوز كل القوانين، وهذا التعبير على نفس وزن تعبير «ستبقى كالبيت الوقف إذا لم تتزوج»، وكل هذه التعبيرات لم يندرج تحتها الرجل، فهو قادر على الزواج متى ما سنحت له الفرصة، ولا يشعره المجتمع بأى نقص أو عيب فيما لو تأخر زواجه ولم يأت نصيبه بعد، فهو فى نظر المجتمع رجل لا يعيبه شىء.
وعلقت أخرى: «على الرغم من الكم الهائل من الانفتاح الذى نعيشه وتوعية الدين بدور المرأة والموروث الثقافى الذى يعمل على منع ظهور هذه الظاهرة، لكن هناك بعض العادات الغريبة فى مجتمعاتنا، تجعل الفتاه التى لم تتزوج تتحول إلى «أسطورة» مخيفة يقذفها المجتمع بأبشع الألقاب والتعبيرات، وكأن المجتمع لن يراها إلا بوجود رجل، وأغلب أهالينا ماشين بمبدأ «ظل رجل ولا ظل حيطة».
البنات والأولاد يرصدون أبرز نقاط ضعف كل منهم بطريقة ساخرة.. الراجل عاوز عروسة «بزراير».. والست عاوزاك تعرف هى عايزة إيه من غير ما تنطق
رغم حاجة كل منهما للآخر فإن الصراع بين الأولاد والبنات لا يتوقف والمعركة محتدمة دائما، فقد قام كل فريق برصد أشهر القواعد والمظاهر السلبية للآخر.
وكانت أول قاعدة ساخرة وهى البنت دايمًا صح وأنت غلط.. مش فاهم ليه لسه فيه رجالة بتقاوح فى الموضوع.
2 - إياك تسأل أى بنت مالك؟ لو لقيتها قاعدة متضايقة.. البنات بصفة عامة بيحبوا يقعدوا متضايقين وغالبًا ده ليه علاقة بالجينات الوراثية ولو ردت هتقولك: شوف أنت عملت إيه وأنت تعرف!
3 - أى أكل بتعمله مراتك هو الصحى والطريقة الصح.. المشكلة إنك أنت اللى خدت على أكل مامتك.
4 - أى بنت فى الدنيا مبتحبش تشترى لبس منتشر.. وده معناه إنك لو فكرت تشتريلها لبس هدية روح اشترى درع رومانى عتيق بس يبقى بنك.
5 - إياك تقعد ساكت قدامها وإلا هتسألك بتفكر فيه إيه ومهما حاولت تقول الصراحة مش هتصدق وهتفرض إنك بتفكر فى واحدة تانية ومخبى بس باين عليك وهى عارفة وساكتة بمزاجه.
6 - البنت بتفهم فى الديكور وأنت لأ عشان دى حاجات بناتى.
7 - عايزاك تعرف هى عايزة إيه ومن غير ما تقوله.
8 - البنت بتقعد وقت طويل فى الحمام لأسباب ملهاش أى علاقة بالحاجات اللى بتدخلك أنت الحمام علشانها.. غالبًا هما بيدخلوا يبدأوا حياة جديدة.
9 - شعرها مهم جدًا ولازم تلاحظه وتاخد بالك من أى تسريحة جديدة عملتها حتى لو منكوش.. المهم إنك تتبهر وإياك تقول رأيك بأمانة.
10 - بتتكلم عشان ربنا خلق لها لسان مش أكتر.
11 - على طول زهقانة حتى لو خدتها فى جولة حول العالم.
12: البنت بتتعامل مع الطقم الصينى على إنه آثار نادرة لا يصح المساس بها.
13 - علاقة البنت بالتليفون هى نفس علاقتك بالكورة.. متحاولش تفهمها.
14 - أى حلم بتحلمه له دلالة ودايمًا التفسير.. يا أنت ماشى مع واحدة تانية.. يا واحدة تانية ماشية معاك.
ولم تقف البنات مكتوفات الأيدى أمام هذا الكلام وقمن برصد القواعد الخاصة بالرجال، ردا على «قواعد البنات التى تم رصدها» التى تناولت جوانب حياتهن بشكل ساخر.
1 - مين قالك إن الراجل بيحب التحكم، هو بس فكرك عروسه بزراير يتك عليها تنور يضغط عليها تصفر معلش عنده نقص من وهو صغير أهله مش بيوده السيرك.
2 - الراجل بطبيعته رغاى، بس زى ما تقولى بعد سن الجواز بيطلعله فقافيق فى بوقه.
وشددت الفتيات على أهم قاعدة وهى ال3 وهى: لو شعرك لونه أسود وعملتيه أخضر فسفورى مش هياخد باله وده عادى هيركز بس مع اللى بره وأى تغيير يحصل فى صحبتك أو جارتك.
4 - سياسى محنك معه خبرة سنتين من الفرجة على بوستات الفيس وخصوصا بوستات سوسو الحيرانة وليلى السهرانة.
5 - صاحب الريموت الأول والأخير.
6 - هو دايما الصح حتى لو هو غلطان، ولو انت اللى زعلانة بردو أنتى اللى تصالحيه، أنت اللى عيانة بردو أنت اللى خدى بالك منه، مخنوقة بردو أنت اللى تفتحى الكلام، وأنتى اللى تقوليله: قولى كلمة حلوة بقى عشان تصالحى بيها نفسك.
7 - طلباتك فى فترة الخطوبة أوامر بعد الجواز نواهى.
8 - لما يقولك فى عز الخناقة متعليش صوتك أنا بقولك أهوو أنا راجل وأنتى بنت رغم ده مايزعلكيش.
9 - بيتعب أى والله بيروح الشغل محسسنى إنه بيشتغل فى وكالة ناسا، يرجع ينام ويتفرج على التليفزيون وينزل لصحابه! إنما أعمالك فى نظره تتوقف على قاعدة فى البيت معززة مكرمة، بتتكلمى فى التليفون، وتعملى شوبنج، على أساس إن البيت ده تومتيكى.