حديث المدينة

مفيد فوزى: على فكرة عددالمصريين اللى بلغوا 35 ومتزوجوش الان 8 مليون انسان منهم حوالى 4 ونصف مليون من الاناث الكلام ده بتقرير رسمى حسب الاحصاءات الرسميه لجهاز التعداد عايز اقول ان النظرة التقليدية فى مصروربما العالم العربى البنت لما تعدى سن 26 - 28 حتوصل لمحطة الثلاثين يقولوا عليها عانس بالمناسبة خذوها فولكلور بعض المعلومات للاحاطة من مشاهير العوانس مى زيادة ,الاديبة العربية الكبيرة التى سطع فكرها فى سماء الادب كمان اليزابيث الاولى ملكة انجلترا ابنة الملك هنرى الثامن كمان امينه رزق اللى فى اخر ايامها كنا بنقول عليها الانسة امينه رزق - امينة رزق تزوجت المسرح ولم تتزوج يوسف وهبى كما اشيع وكونداليزا رايس وزيرة خارجية زمان بوش ومن اهم مواهبها على الاقل زى ما نقول كدة يعنى الشئ اللى بتجيدة هو العزف على البيانو وعلى الالام البشر وقد بدأت مدونات النت شاشة النت تفتح صدرها بكل صراحة وكل عانس بتعبر فيها من خلالها عن حياتها النفسية والجنسية وقد انتقدت هذه الصفحات صفحات المدونات من شاشات النت الى شاشات حديث المدينة
فاصل
مفيد فوزى : هبةالقاضى انت عندك كام سنة ?
هبة القاضى: 26سنة
مفيد فوزى :26 ولا 29
هبة القاضى 26
مفيد فوزى : هل انت حاسة انه قطار الزواج فاتك ?
هبة القاضى : هما بيحسسونى بكده الناس اللى حواليا
مفيد فوزى : مين هما
هبة القاضى : الناس اللى حواليا الجيران الصحاب اللى فى السن الصغير دلوقتى اللى كانوا بيتزوجوا فى سن 21 سنة و 18 سنة و19 سنة مش قادرين يفهموا ان الدنيا اتغيرت زمان كان فيه طبعا الماديات دلوقتى لأ فزمان ماكنش فيه تكلفة بتاعت شقة تمليك وفرش كامل وفرح دا اقل فرح دلوقتى ب 10000 جنية وفرح بسيط فكل الناس حواليا بيحسسونى ....
مفيد فوزى : نعم
هبة القاضى :انا خلاص لو وصلت لسن ال 30 ابقى خلاص انا كده عانس يعنى فا رفض كلمة عانس دى ومتهيأ لى ان انا لسة فى رعيان شبابى يعنى دلوقتى فى المجتمع بتاعنا 30 سنة دى ما تعتبرش عانس يعنى انا والدتى لما اتكلمت معاها فى حاجة زى دى قالت لى زمنا غير زمانكم كل زمن ليه متطلبات عن حاجات ثانية يعنى احنا زمان كان عندنا التكاليف قليلة كان الاهل بيساعدوا فيه ناس بتتزمت انا عايزة مثلا شبكة ب 10000 جنية وفرح فى الحتة الفلانيه لأ دا انا قريبتى جابت شبكة ب مش عارفة اية حجرة نوم مش عارفة ب 20000 جنية
مفيد فوزى :هما بيقارنوا بعض?
هبة القاضى : اه
مفيد فوزى : فيه مقارنه?
هبة القاضى : اه اه
مفيد فوزى : تودى فى داهية المقارنه دى
هبة القاضى : مكنش الاهل يقارنوا بعض انا بنت اختى جلها كذا فلازم بنتى يجلها كذا لأ دا انت بنت عمتى جالها
مفيد فوزى : واحيانا يكذبوا
هبة القاضى :اه
مفيد فوزى : ويبالغوا
هبة القاضى : بيبلغوا فى الاسعار جامد يعنى
مفيد فوزى : اه
هبة القاضى : وبعدين مش فى دماغهم ان البنت دى هتتزوج مع رجل هيحفظها ويصونها
مفيد فوزى : قولى انت لما عندك 26 سنة وجدتك بتتفرج عليكى دلوقتى او جده من الجدات تقول عليكى ايه لما انت وصلتى سن 26 وما اتجوزتيش
هبة القاضى :هما بيقولوا كلمة عانس بيقولوا ان احنا خلاص فاتنا قطار الزواج يعنى
مفيد فوزى : اه تفتكر هل دة سببه انك ما لقتيش الراجل المناسب والا الحب المناسب سؤال دقيق جدا هل ما لقتيش الرجل المناسب والا الحب المناسب
هبة القاضى :لأ فى حب مناسب وفيه راجل مناسب بس الشباب مش لاقيه تتزوج لان التكلفة غالية هتزوج واجيب شقة تمليك منين حتى لوجبت ايجاركام سنة طب هجيب عفش منين
مفيد فوزى : في تجربة مباشرة ?
هبة القاضى : اه
مفيد فوزى : هى ايه?
هبة القاضى : انا ارتبط وانا فى الجامعة
مفيد فوزى : كان عندك كام سنة?
هبة القاضى : 20 سنة
مفيد فوزى : وبعدين
هبة القاضى : كنا متفقين على كل حاجة ووالدتى كانت عارفة كل حاجة بس ما حصلش نصيب من الاهل يعنى
مفيد فوزى : انت كلية اية ?
هبة القاضى : كلية اداب
مفيد فوزى : قسم ايه?
هبة القاضى : علم اجتماع
مفيد فوزى : يعنى كنتى قسم اجتماع وهو ايضا قسم اجتماع?
هبة القاضى : لأكان ضابط شرطة
مفيد فوزى : ضابط شرطة?
هبة القاضى : اه شرطة
مفيد فوزى : كان ايامها رتبتة ايه ?
هبة القاضى :لأ كان فى الكلية يعنى كان فى نفس السن بتاعى كان فرق بينى وبينه سنة فى السن كان هو فى رابعة
مفيد فوزى : كنت بتقابلية يوم الخميس لما يخرج?
هبة القاضى :اه هههه
مفيد فوزى : تفتكرى البنت ممكن تتزوج واحد فقير وتعيش معاه على الحصيرة والدقة?
هبة القاضى : ما اعتقدش بس يعنى
مفيد فوزى : ولا ده كلام فارغ اللى انا بقولة
هبة القاضى :مش صعب قوى ممكن تتزوج حد بسيط ويبدأوا حياتهم مع بعض اه
مفيد فوزى :انت ممكن تتزوجى موظف بسيط عادى مرتبة صغير لكن فى واضح الامر انه لن يستطيع انه يكسب اكثر من كده الا اذا اشتغل سواق تاكسى بعد الظهر?
هبة القاضى : وايه المشكلة مفيش مشكلة انا والدى سواق اصلا يعنى انا والدى سواق
مفيد فوزى : سواق تاكسى يعنى ?
هبة القاضى : اه ميكروباس
مفيد فوزى : سواق ميكروباس والدك قال لك ايه لما حصلت التجربة دى ?
هبة القاضى : ما اتكلمش حاجة قالى كل شئ قسمة ونصيب يعنى
مفيد فوزى : هسألك سؤال بس مش سخيف يعنى هل اهل ضابط الشرطة رفضوا يزوجوا بنتهم لابنة سائق ميكروباس?
هبة القاضى :ايوه ايوه اتقالت كده فعلا قالوا بنت خالك اولى بيك احنا ما ناسبش سواق الميكروباس فانا قلت الموضوع خلاص
مفيد فوزى : هل كان يعلم الطالب ضابط الشرطة لما جيتى تتزوجية لما جئتى تحبية وحبيتوا بعض كان عارف انك انت ابوكى وزير النقل ?
هبة القاضى : عارف ان بابا سواق ميكروباس
مفيد فوزى : ومع ذلك
هبة القاضى : وقالى هتزوجك هو بقى والدته ..
مفيد فوزى : كان بيحبك?
هبة القاضى :اه
مفيد فوزى : بس دا كما صغير يا هبه?
هبة القاضى : صغير اه كان عنده
مفيد فوزى : كان كام?
هبة القاضى : بينى وبينه سنة تقريبا
مفيد فوزى : بس ?
هبة القاضى : اه
مفيد فوزى : ماهوبرضه 21 سنة ده افكاره خيالية
هبة القاضى :افكاره كانت خيالية وبعدين ما كنش عنده تجارب فى حياته
مفيد فوزى :عارفة انا بقولك الكلام ده ليه لان فيه مليون بنت زيك فى عمرك لما كانت عندها 20 سنة وقعد معاها على الرملة وجابوا سكينة وحفروا اساميها انت اسمك هبه مش كده
هبة القاضى : ايوه
مفيد فوزى : مش عايز اقول اسمه وليكن r - hوr وحفرتوها على البتاع ولما رحتوا البلاج وعملتوا فى الرملة وانت تتزوجينى اتزوجك ابويا فران وايه يعنى الفران بيعمل عيش خبز خبز الحياة كل الكلام ده بعد قليل يتحول الى بخار
هبة القاضى : زى الرملة كدا
مفيد فوزى : زي الرملة لما
هبة القاضى :شوية بحر تخده
مفيد فوزى : شوية بحر
مفيد فوزى : يعنى ايه سيبها تعنس
هبة القاضى :احنا بنطالب الاهالى الشباب معانا فى الجروب بيطالبوا الاهالى ان يسيبوا بنتهم تعنس يعنى معندنا ش مقدرة ان احنا نجيب شقة تمليك شقة ايجار 3 سنين معندناش مقدرة ان احنا نعمل فرح ب 10000 جنية فانت خلاص احنا مش هنقدر نتزوج خلى بنتك قاعدة جنبك ما هو احنا الشباب لو احنا ما تزوجناش وعملنا مقاطعة هما طالبين شهر فى السنة يعملوا فيه مقاطعة عن الزواج
مفيد فوزى : يعنى واضح ان اللى بتقوليه ترجمته ببساطة صرخة اجتماعية فى وجه الدولة
هبة القاضى : ايوه
مفيد فوزى : انتوا مش قادرين تتزوجوا?
هبة القاضى :احنا مش قادرين نتزوج فعلا
مفيد فوزى : وصلتوا الى حد العنوسة بسبب مطالب الحياة?
هبة القاضى :ايوه
مفيد فوزى : لكن واضح ان تجربتك يا هبه ماكنتش تجربة ناجحة من ناحية المستوى الاجتماعى
هبة القاضى :المستوى الاجتماعى اه
مفيد فوزى :انت مقتنعة ان المستوى الاجتماعى الكلام اللى قالة حقيقى لما اتقال بالحرف الواحد احنا ما نناسبش سائق ميكروباس وهذا ليس عيبا لان العمل قيمة لانه بيكسب وفاتح بيت مش كده انت عندك اخوات
هبة القاضى : ايوه اختى برضه بتدرس بس هى فى ثالثة اداب برضه
مفيد فوزى : يعنى سائق الميكروباس خلى اولاده اتعلموا فى الجامعة
هبة القاضى :ا ه
مفيد فوزى : طيب هل كنتى بتعتقدى ان هو الشاب الطالب ده اللى فيما بعد اصبح ضابط شرطة هل مفروض انه هو كان يتروى ولا يعنى راى الاهل اكثر
هبة القاضى : المفروض كان يتروى طبعا لان دى حياته الخاصة محدش مش اهلة اللى هيعيشوا معايا هو اللى هيعيش معايا دى حياته ومفروض يفكر بعقلة شوية ويدرس الحياة يعنى كان حاول يعمل حاجة يعنى اول ما اتقال له الكلام سابنى
مفيد فوزى : سيبها تعنس فى نهاية الامر هل هى صيحة واقعية ?
هبة القاضى :هى صيحة اه وان شاء ا لله تكون وصلة للناس نحاول يعنى نفسنا ان احنا نوصل لحاجة
مفيد فوزى : تدخلوا
هبة القاضى : نوصل لحاجة نوصل للناس
مفيد فوزى :ايه قولى لى عاوزين توصلوا لايه
هبة القاضى : عايزين ان احنا حد يساعدنا ا ن احنا نتزوج يبقى فى حاجة يقللواالتكاليف يعملوا للشباب يساعدوهم يزوجوا مثلا 5000 شاب كل سنة مش عايزين 20000 او 50000
مفيد فوزى : عايزة تدخل الدولة
هبة القاضى : اه
مفيد فوزى :ما تبقاش الدولة تقف متفرجة
هبة القاضى : اه احنا عايزين حد يساعدنا يعنى يعملوا بنا مشروع يساعدونا فى حاجة يوفروا علينا تكاليف حاجة يعملوا مشروع يشتغل فيه شباب وبنات يعنى مفيش حد بمرتب 500 جنية مش هيقدر يفتح بيت مش هيقدر يجيب شقة مش هيقدر يجيب عفش مش هيقدر يجيب شقة مش هيقدر يعمل فرح بالشئ الفلانى
مفيد فوزى : اه يعنى واضح ان مطالب الحياة كسرت القلوب
هبة القاضى : فعلا
فاصل
مفيد فوزى : محمد انت بتفكر فى الزواج?
محمد محمود :اكيد كل شاب فى الدنيا بيفكر فى الزواج
مفيد فوزى : يعنى انت انت مش انت عندك كام سنة?
محمد محمود : 23
مفيد فوزى : تفتكر ده عمر مناسب للزواج?
محمد محمود : والله هو كل حاجة
مفيد فوزى : متخرج منين اولا?
محمد محمود : متخرج من بكالوريوس خدمة اجتماعية
مفيد فوزى : شايف ان ده عمر مناسب ?
محمد محمود : والله هو ده مفروض العمر فى ظل العنوسة دى يبقى ده السن المناسب
مفيد فوزى : يعنى ايه فهمنى يعنى ايه فى ظل العنوسة دى?
محمد محمود :احنا عندنا 9 مليون عانس فى مصر 4 مليون تقريبا بنات و5 مليون شباب احنا المفروض ان احنا نساهم شوية يعنى نقضى على الفراغات اللى ما بين دى اللى هى المغالاه فى المهور لوقضينا على دى متهيأ لى مشكلة العنوسة هتزول
مفيد فوزى : انت ممكن تتزوج بنت انت خرجت معاها ?
محمد محمود : على حسب البنت بس ما اعتقدش
مفيد فوزى : ممكن انك انت يبقى فى بينك وبين بنت علاقة حسية تتزوجها?
محمد محمود : لأ طبعا
مفيد فوزى : لأ طبعا ليه ?
محمد محمود : لأ طبعا
مفيد فوزى : ما هى سلمتك نفسها ?
محمد محمود : ايوه
مفيد فوزى : احتراما لك واحتراما لحبك والا انت عيل?
محمد محمود : والزواج ده ايه لزمتة طب ما كل بنت تسلم
مفيد فوزى : اه ما انا انا نفسى افهم تفكيرالشباب عارف بقول ده ليه علشان البنات اللى قاعدين بيشفوكم
محمد محمود : تمام
مفيد فوزى : يحسوا ان هكذا يفكر الشباب ان لما البنت تسلم نفسها ممكن جدا الشاب اللى زيك لا يتزوجها
مفيد فوزى : لأ انا مش هقول علاقة حسية زى ما حضرتك بتقول احنا هنقول ان مجرد اصلا هى تفكر ان يعنى خروجات مع شاب او الكلام ده الشاب اصلا ايه ضمنه هوده بيكون تفكير معظم الشباب لما بيلاقى حتى بنت
مفيد فوزى : متقوليش افكار عامة حدد على نفسك انت قاعد امامى علشان تفتح قلبك ودماغك وتكلمنى
محمد محمود : انا بالنسبة لى طبعا صعب
مفيد فوزى :صعب ان انت اواى بنت يبقى فى بينك وبينها علاقة اكثر من انها جالسة امامك
محمد محمود : قول العلاقات العادية المعروفه لدى الناس كلها الزمالة الصداقة علاقة عمل كدا يعنى
مفيد فوزى : هقولك على سؤال قد يكون مستهجن انما النا س اما م الشاشات هيتقبلوه ممكن تتزوج بنت انت بستها ?
محمد محمود : لأ لأ طبعا
مفيد فوزى :انا ده ده ده بيهمنى يعنى انا بيهمنى ليه هقولك انا علشان البنات ايضا يعرفوة ايه سبب ان البنات عانس ?
محمد محمود :البنت عايزة الولد الكامل والولد عايز البت الكاملة والكمال لله هما مش فاهمين
مفيد فوزى :انا مش عاوزك تجاوبنى زى منظمة الشباب كان فيه زمان ايام الاتحاد الاشتراكى حاجة اسمها منظمة الشباب
محمد محمود : مااعرفهاش
مفيد فوزى : ما انت ماحضرتهاش ما انت كنت طفل كنت جنين فى بطن امك انما دلوقتى فيه ايضا حاجات كده شباب انه يريد البنت الكاملة والبنت تريد الرجل الكامل كلام كده - همايونى
محمد محمود : مش - همايونى مش - همايونى
مفيد فوزى :السؤال هو البنت عاوزة الولد اللى عند شقة وعربية?
محمد محمود :ما هو الكامل هو اللى عنده شقة وعنده عربية ومعاه فلوس ومتدين وامور وفيه كل المميزات اللى موجوده اى بنت تتمناها هو
مفيد فوزى :البنت ده طلبها
محمد محمود : ده من وجهة نظرى
مفيد فوزى : والولد طلبه ايه?
محمد محمود : بيتهيأ لى او هقول معظم الشباب او انا طلبى البنت المحترمة علشان متقوليش
مفيد فوزى : اشمعنى?
محمد محمود : علشان بس ميتقاليش دى حاجة مقتصرة على نفسى
مفيد فوزى : متقولكش انت
محمد محمود : حاجةعلى نفسى
مفيد فوزى : بنت بتتعامل معاك فى الشغل طبعا مفيش اى علاقات انابكلمك بقى انت البنت تتعامل مع كل الشباب بصيغة واحد تتزوجها
محمد محمود : بتتعامل مع كل الشباب بصيغة واحدة اتزوجها لان كده مفيش حد يعنى طبعا بتتعامل مع كله بصفة اللى هى الصفة العادية جدا يبقى معنى كده ان هى مفيش عليها غبار يعنى مفيش عليها عيب
مفيد فوزى : هل ممكن انك انت بنت رقيقة مهذبة جميلة سكرتيرة لمديروالمدير باستمرار يعنى بيعطف عليها ويديها من حين لاخرهدايا انت حبتها وعجبك شكلها ممكن تتزوجها
محمد محمود :ما هو هو مدير ok مفيش مشكلة هو ده ترجع لها انها تختارما بينى وما بين الشغل ده وانا مش عايزها تشتغل الشغلانه دى تشتغل فى اى حتة ثانية
مفيد فوزى : اه انت مش عايزها انت مش عايزها تشتغل سكرتيرة المدير ؟
محمد محمود : بلاش الشغلانة دى بناقص
مفيد فوزى : اه اههههههه
محمد محمود : بلاش الشغلانه
مفيد فوزى :تقدر تعيشها ماهى بتكسب خذ بالك هى كفأ فبتأخذ بونص من المدير وانت خايف بقى
محمد محمود : يعنى هو انا متزوجها طمعان فيهاهو انا ببص للمرتب هو انا مستنى هو انا متزوجها علشان هى سكرتيرة المدير انا عايز زوجة
مفيد فوزى : انت مش عايزسكرتيرة المدير
محمد محمود : انا عايز زوجة عايز زوجة تربى اولادى
مفيد فوزى : ما يهمكش حتى لو كانت زوجة وسكرتيرة المدير سكرتيرة المدير دى مخوفاك
محمد محمود : مش سكرتيرة المدير مخوفانى سكرتيرة المديرللعمل مفيش اى مشكلة انما فى هدايا طب ليه الهدايا باى مناسبة
مفيد فوزى : الراجل يعنى مبسوط منها انت متضايق من الهدايا ?
محمد محمود : مش متضايق من الهدايا بس هى ملهاش اى صفة رسمية
مفيد فوزى : يعنى ايه صفة رسمية ?
محمد محمود : الهدايا ان هى تكون عملت حاجة كويسة قوى فى الشغل
مفيد فوزى : عيد ميلادها يا سيدى عيد ميلادها
محمد محمود :هو مالة بعيد ميلادها ما يعمل لها فى عيد زواجها يعنى لو هو مصمم يعنى بيجيب لها هدايا فى كل حاجة يبقى فى عيد زواجى يجيب لها وبس
مفيد فوزى : سيبها تعنس انت اشتركت فى هذه المدونه بهدف ايه ?
محمد محمود :انا المؤسس
مفيد فوزى : انت ايه?
محمد محمود : انا المؤسس
مفيد فوزى : انت المؤسس اه اللى هى سيبها تعنس ليه اختارت الاسم ده
محمد محمود :انا اختارت الاسم بسبب المغالاة فى المهوريعنى كل اب دلوقتى عاوز ولد وبنت الولد عايز يروح يخطب له عروسة واهل العروسة ما يطلبوش منه حاجة فى مقابل ان هو لما يجى يزوج بنتة يطلب من العريس ده كل اللى نفسه فيه فوق طاقتة فى طاقتة هو مش هامه لأ انا عايز شقة قد كده شبكة قد كده
مفيد فوزى : قولى ليه الشباب لما بيتزوج مبكرا زى حضرتك ليه بيحصل طلاق بعد ثلاث شهوروتكون البنت ا للى بتطلب الطلاق ?
محمد محمود : ده لما يكون مبكرا قوى اولا الطلاق ملهوش سبب ثابت يعنى هو الطلاق
مفيد فوزى : ليه ليه الطلاق ؟
مد محمود :مبكر لان هما بيكونوا اساسا فى فترة مراهقة هما فرحانين بدبلة وخطوبة وهنقعد فى كوشا ونتزوج مش عارفين يعنى اية مسئولية مش عارفين يعنى اية زواج ومش عارفين يعنى ايه المهم اللى جاى بعد كده
فاصل
مفيد فوزى : هنادى انت ليه منضمة على النت المدونة بتاعت بتاعت ايه?
هنادى ابراهيم : عايز ة اتجوز
مفيد فوزى :انت عندك كام سنة?
هنادى ابراهيم: 26
مفيد فوزى : تعتبر 26 سنة ده يعنى يعنى عدى سن الزواج?
هنادى ابراهيم : هو معداش سن الزواج بس دلوقتى بقى مشكلة البنت اول ما تعدى العشرين يبتدوا يفكرواهتتجوز مش هتتجوز هب العريس اللىجالها دلوقتى طب يالا بسرعه قبل ما قبل ما يعديها قطر الزواج 25 بقى مشكلة دا وصلت 25 وما تزوجتش فا بالنسبة لنا دلوقتى بقت مشكلة للناس اللى حوالينا مش لينا احنا المشكلة للناس اللى حوالينا ديت انها عاوزه نتزوج باى طريقة وباى شكل واى حد المهم ان احنا منعديش السن من 25 الى 30 سنة
مفيد فوزى : تعتقدى انه هدف المدونه دى اللى على النت اللى بتقول عاوز اتجوزالهدف بتاعها ايه مشاركه فيها ليه ?
هنادى ابراهيم : مشاركها فيها لان ده طلب اى بنت فى الدنيا بتطلبه اول ماتحس انها بنت وحاسة بأنوثتها وعاوزة تشوف ا يه الجديد وعاوزة تبقى مسئولة من بيت واطفال اى بنت فى الدنيابتبقى عايزة تتزوج بس الفرق بيننا وبين البنات دى ان احنا قلنا احنا عايزين نتزوج لكن هما ما بيقولوش بيستنوا لما يبقوا يتزوجوا
مفيد فوزى : هل لما بتقولى عاوزة اتزوج ده هيجيب لك عريس على النت انت ممكن تتزوجى من النت?
هنادى ابراهيم :لأ انا مش ممكن اتزوج من النت احنا بنقول عاوزين نتزوج للناس اللى حوالينا للناس اللى فاهمة ان احنا موقفين الزواج دوت والحاجة دى بأدينا وان عايزة اتجوز دى احتجاج للناس اللى حوالينا مش لينا احنا بس
مفيد فوزى : فهمينى ايه ا لناس اللى حواليكم هل هم الاهل?
هنادى ابراهيم : الاهل بيحسسوك ان انت عبئ عليهم فى وقت من الاوقات اه تحس تدخل كده فجأة تحس ان انت بقيت ثقيل على الناس دى يعنى تحس ان انت ثقيل على امك ثقيل على ابوك فا حاسس ان انت حاجة عبئ عايزين يالا مع السلامه يالا اتزوج يعنى طب انت رفضتى ده ليه عملتى ده ليه اللى هو عايزنا نتزوج
مفيد فوزى :على المستوى الشخصى هل انت ليكى اخوات بنات?
هنادى ابراهيم : لأ مليش اخوات بنات
مفيد فوزى :انت وحيده ؟
هنادى ابراهيم :انا بنت وحيده
مفيد فوزى :هل عفوا سؤال شخصى هل تقدم ليكى شباب للزواج?
هنادى ابراهيم : تقدم بس ملقتش اللى انا عايزة ملقتش اللى انا بحلم بيه فى حياتى ده البنى ادم اللى انا ممكن اكمل حياتى معاه
مفيد فوزى : هل كانت تجربة حب عاطفى قاد الى الزواج?
هنادى ابراهيم :هو كان فيه تجربة بس ما قدتش للزواج
مفيد فوزى : قادت الى ايه?
هنادى ابراهيم : قادت الى فشل
مفيد فوزى :ايه سبب الفشل ده كلام يفيد البنات?
هنادى ابراهيم: الفشل ان حبينا واحنا صغيرين مش هقول لحضرتك ان احنا يعنى فى الكلية ايام الكلية كنا 19 سنة 20 فا مفهمناش يعنى ايه نحب فحبينا غلط
مفيد فوزى :اسمحيلى برضه لان البنات اللى بيسمعوكى بيقولوا لى ايه ياريتك كنت سالتها معرفناش يعنى ايه نحب يعنى ايه تحبى ?
هنادى ابراهيم :احب افهم البنى ا دم اللى امامى كويس وافهم ان هو هيقدر يعيشنى مش فى مستوى كويس او فى مستوى عالى بس هو
هنادى ابراهيم : طب ما هو كطالب زيك غلبان
مفيد فوزى : ماهو استنى بقى ماهو غلبان وعدمان
هنادى ابراهيم :وعدمان هى دى ماهواحنا بقينا كلنا عدمانين مش الصبيان بس او البنات بس احنا كلنا فى حالة او فى وضع مينفعش اننا نحب اسلوب اللى هو احبك وامسك ايدك وتعالى نخرج انهاردة وتعالى نتقابل لأ دلوقتى الحب بقى حاجة ثانية ان انهاردة البنى ادم ده هقدر اكمل معاه واشارك معاة وان احنا نبنى حياتنا مع بعض اللى ادام مش شرط ان انا اخذ واحد علشان ظروفه او علشان كذا
مفيد فوزى :انت وصلتى سن 26 هل عندك ملامح عامة حقيقة لهذا الزواج مين الشاب اللى ممكن انك انت تبتدى تسمعية تبتدى تهتمى بيه ؟
هنادى ابراهيم : الشاب اللى ا بتدى اسمعة الشاب اللى احس ناحيتة بمجرد مشاعر الراحة الراحة فى الكلام والراحة فى الاسلوب وفى نفس الوقت الشاب اللى يتحمل مسئولية
مفيد فوزى : ادينى تجارب البنات الاخريات من على النت زميلك فى الجروب ?
هنادى ابراهيم : فى كثير فى واحد تزوجت واحد اكبر شوية علشان مرتاح مديا وكذا علشان بس عايزة تتزوج ماهو عايزة تتزوج حد يريحها نفسيا يريحها ماديا يبسطها مش شرط بقى هى مرتاحة معاه بس اهم حاجة معاة فلوس
فاصل
مفيد فوزى : الكلام ده للبنات لو خرج معاكى كثير وعارفك كويس وعدى وقت طويل وبرضه ما بينطقش ولا بيجيب سيرة ارتباط او زواج وانت مربوطة جانبة وعندك امل فتحتية انت فى الموضوع واتقدمى واى رد تاخذية غيرميعاد مع بباكى يبقى رفض لكى حتى الصمت وجملة مش عارف اقولك ايه ده بيتسلى يا حبيبتى وكان مستغل كسوفك اكسرى وراه زير مش قلة الكلام ده كلام للبنات كلام لازم كل البنات تعرفة بتقولة امل محمود تجربه انسانية بعنوان علشان ا لسنارة تغمز امل ايه هدفك من هذا الكتاب ?
امل محمود : هو عدة اهداف طبعا هو هدفى الاول الكتاب مش دعوى للزواج على اد ماهو رحلة للبحث عن الذات ان الانسان لازم يفهم نفسه كويس ولازم يستوعب هو عايز ايه من الحياة وعايز ايه من الدنيا وعايز ايه من الطرف الاخروبالتالى يفهم الطرف الاخر وبالتالى يفهم موضوع الزواج ده بعد كده هو هدفى الاول انى اقول للبنت ان الحياة مش زواج وما تقعديش جانب الحائط مستنية العريس لما يجى يتقدم وهو ده اقصى طموحك لأ اشتغلى ونمى فى شخصيتك وذكرى واجتهدى واخرج واتفسحى واتبسطى مع نفسك ما تبنيش سعادتك على طرف ثانى
مفيد فوزى : ما تبنيش سعادتك على طرف ثانى
امل محمود :ما تبنيش سعادتك على طرف ثانى
مفيد فوزى : قولى لى يا امل هو انت بتحذرى البنات من عبد الحليم فى الوساده الخالية ?
امل محمود :هههههه هو مش تحذير من عبد الحليم فى الوسادة الخاليةعلى اد ما هو تحذير من فكرة الحب الاول او انا ضد اى شئ
مفيد فوزى :انت عندك كام سنة سؤال سخيف?
امل محمود : لأ ابدا 38
مفيد فوزى 38: تزوجتى يا امل ?
امل محمود : اه
مفيد فوزى :تزوجتى تزوجتى وانت عندك كام سنة?
امل محمود : 33
مفيد فوزى : الله يعنى ما همكيش انك انت ..
امل محمود : لأ خالص مهمنيش لا كلام نا س ولا ضغوطات اجتماعية انا كنت بفتخر لما حد يقولى متزوجتيش لسة اقول له اه متزوجتش لأ
مفيد فوزى : بتقولى يا امل علشان السنارة تخمز صح يبقى لازم الاول تخلصى من القصة التعيسة القصة التعيسة دى اللى هى قبل كدة
امل محمود : ايه اه اللى هى اى قصة هى زنقة نفسها فيها
مفيد فوزى :اللى انت عايشة فيها وممتعلقيش فى حبال ديبة واقلبى الصفحة بقى ايه الهدف من كده
امل محمود :الهدف من كده انه فى بنات كثير اللى من اسباب تأخر سن الزواج انها ارتبطت بانسان وحبته طلع لاى سبب من الاسباب مش كويس وسابها بتفضل عايشة فى الاطلال وبكائيات بقى وتضيع سنين من عمرها مستنياه يمكن يرجع يمكن يتكلم بتليفون الحاجات اللى بتقابل الشباب كل يوم واللى بيبعتوها لى كمان
مفيد فوزى : انت عايشة ليه لسن 33 بدون زواج?
امل محمود :علشان مكنتش لاقيه الراجل اللى يرضينى مناسب اللى شايفة ان ده ينفع اكمل معاه حياتى
مفيد فوزى : مش ده برضه يعتبر من احد اسباب الخيال للبنت فبيضطر او بتضطر تفضل سنة ورا سنة ورا سنة لغاية ما تكبر
امل محمود : لأ ده مش خيال لانه انى اصطدم بعقليات انا بحب شغلى مثلا اصطدم بعقلية النموذج اللى هو اللى فاهم الرجولة غلط هوعايز يقعدنى فى البيت او يلبسنى بطريقة معينة على مزاجة او سيبى شغلك لأ ما تنزليش دلوقتى لأ ما تعمليش كذا انى ما لقيش عقلية قدامى ما لقيش انسان مش مثقف مش واعى ان انا اقعد مع احد راجل احس ان انا عارفة اكثر منه دا دى كلها كانت حاجات مفرملانى بصراحة
مفيد فوزى : الراجل اللى ممكن تقابلية فى حياتك وتحبية ممكن يبقى مرجعية عقاب بالنسبة لك ?
امل محمود : مرجعية عقاب بمعنى
مفيد فوزى : بمعنى انه يقولك لأ دا غلط هتقولى له لأ ده صح
امل محمود : لو انا شيفاه صح هقوله لأ ده صح
مفيد فوزى :امال مين فى الحياة اللى ممكن انت تقولى له فعلا ده غلط وانا هغيره؟
امل محمود : لو شفت انه غلط فعلا يعنى لو حقيقى يعنى لو سواء زوجى او غيره او اى انسان فى ا لدنيا لوقالى ده غلط وانا لمست او اقنعى اوادانى المنطق اللى اثبت لى انه فعلا انا رأيى غلط
مفيد فوزى : اسمحى لى اقولك انطباع معين عارفة انت ليه وصلتى سن ال 33 وما كنتيش اتزوجتى بسبب العناد الاسود
امل محمود :انا عنادية فعلا انا معترفة ما اقدرش اضحك على حضرتك
مفيد فوزى : امال ليه بتقولى للبنات هل العند يوصل لنتائج جيده?
امل محمود : اه لانه انا الحمد لله انا فضلت منتظرة الى ان لقيت الانسان اللى فعلا يعنى حسسنى ان انا ..
مفيد فوزى : معلش انت بالنسبة لك سيناريوهات سماوية القطر مشى وقفتى دخلتى لقيتى كرسى فاضى قعدتى فى بنات كثير بسبب العناد ده..
امل محمود : دا في كثير كراسى فاضية على فكرة بس ا نا مرضتش اقعد لان الكراسى غير مناسبة ليا
مفيد فوزى :اه انت مقتنعة انك انت يعنى بدى امل للبنات انت اسمك امل مش كدة
امل محمود : اه
مفيد فوزى : بتدى امل للبنات ان السنارة تغمز امتى
امل محمود :فى اى وقت وهى عندها 60 سنة وهى عندها 70 سنة مش المهم امتى المهم ازاى الخوف من كلمة عانس هى خايفة لو لقيته ما تلاقيش ثانى يعنى ساعات يجيلى مشاكل بنات فى علاقات بشعة جدا ونماذج رجالة واضحة يعنى فى رجالة تجتهد علشان تعرف عيوبه فى راجل واضح طب انت ليه انت تعيسة وبتعيطى والعلاقة باينه من اولها انه فيه مشاكل وخلافات كثيرفا تقولى ما انا خايفة ما القيش واحد ثانى اهو ده مضمون ابن ناس ظروفة كويسة هتتنازل عن الانسان نفسة لانها خائفة من العنوسة
فاصل
مفيد فوزى : دكتورة ايمان صبرى بشكل محددالعنوسة هل هى ثمرة خيال البنات ام ثمرة مشاكل المجتمع الضارية ماديا ام ثمرة تعنت الاباء والامهات لتزويج البنات ?
د/ ايمان صبرى : هو اعتقد ان حضرتك قلت الثلاث اسباب الاساسية للعنوسة يعنى انت جمعت الثلاث اسباب بشكل بليغ جدا
مفيد فوزى :انت تميلى الى ايه من دول
د/ ايمان صبرى : هو انا اميل الى مشكلات نفسية واجتماعية فى المجتمع بتحول دون الزواج فى السن المناسب مع وجود ظروف اسرية تفضل مستوى معين للبنت انها تتزوج فيه مع وجود برضه خيال انا عندى فارس احلام معين نفسى فيه ما بلقهاوش بستنى شوية لحد لما الاقيه فخلاص هيأس بقى اضطر اخذ اى حاجة الحق القطار قبل ان يمشى
مفيد فوزى :النجاح عند البنت اكثر اهمية والا الزواج بالامانة البالغة من وجةة نظر اكاديمية مصرية
د/ ايمان صبرى : من وجهة نظر اكاديمية مصرية حسب المستوى والهدف فى حياتها يعنى لو هدفى فى حياتى ان انا اكون ناجحة يبقى الزواج ا لمرحلى الثانية او الثالثة
مفيد فوزى : ايوه لكن يعنى عند البنت المصرية
د/ ايمان صبرى : عند البنت المصرية دلوقتى هيبقى الزواج
مفيد فوزى :الزواج ايوه كده هى دى الاجابة الصح الزواج هو الهدف رقم واحد
د/ ايمان صبرى : عند البنت المصرية دلوقتى ا ه
مفيد فوزى :النجاح رقم كام ؟
د/ ايمان صبرى : النجاح ممكن يكون رقم 3 او 4 او 5 حسب
مفيد فوزى : امال اثنين ايه ?
د/ ايمان صبرى : وجود ظروف مالية كويسة تعيشنى مرتاحة واللى انا عاوزه اجيبة
مفيد فوزى : تعتقدى لو ان البنت انا سألت شاب ناشئ فى الحياة قلت له تتزوج بنت بتشتغل سكرتيرة مدير اتعصب عليا وقال لى لأ ما تزوجهاش قلت له ده بيديها بونص ومكافأت قالى وانا مالى قلت له دا بيجيب لها هدية فى عيد ميلادها ما يبجبلها هدية فى عيد زواجها تحليلك النفسى للكلام ده ايه ?
د/ ايمان صبرى : هو هقول لحضرتك حاجة
مفيد فوزى :هو كلام انا بأعتقد انه كان معى امينا للغاية بل صادقا لانه محاولش يلف ويدور
د/ ايمان صبرى : يلف ويدور
مفيد فوزى : اه
د/ ايمان صبرى : هقول لحضرتك حاجة هو دلوقتى الشباب كذا مستوى يعنى ايه فيه شباب ممكن زيه يقولك انا ما اقبلش اناممكن اخذ واحدة فقيرة ونكبر مع بعض سوا وفى واحد يقولك لأ انا اخذ واحدة ممكن توفر لى حاجات كثيرة جدا وتساعدنى فى الحياه فى شباب من ده وفى شباب من ده يعنى فى النوعين انا اعرف حالات
مفيد فوزى : ادينى تجربة
د/ ايمان صبرى : هو انا تجربتى انا عندى طالبة جت حكت لى فى الترم الاولانى كان والدها شخصية كبيرة يعنى شخصية كبيرة غنية فكان فى مفهومه فى مجتمع الفيوم كان عايز يزوجها هى كان عندها 18 سنة فزوجها لابن عمها وتكفل بكل الاشياء
مفيد فوزى : تكفل بالاثنين ?
د/ ايمان صبرى : تكفل بالشقة
مفيد فوزى : يعنى بالزيجة?
د/ ايمان صبرى : بالزيجة وعلى هذا الاساس ابن عمها وافق على الزواج فى نهاية الترم
مفيد فوزى : ابن اخوه
د/ ايمان صبرى :اه ابن اخوه فى نهاية الترم الثانى لقيت البنت جاية تقولى معلش انا تعبانة ياريت تشرحى لى فى الموا د اللى وقعت منى فقلت لها ليه فقالت لى اصل انا اطلقت ما بين التيرم الاول والتيرم الثانى مدة قليلة جدا
مفيد فوزى : اد ايه ?
د/ ايمان صبرى : يعنى مكملش حوالى ست شهور
مفيد فوزى : دا كثير قوى
د/ ايمان صبرى : فا انا قعدت اتكلم فوجئت ان هو توقع ان الاب البنت دى اللى هو عمه سوف يكون خزينة دائمه ومتجددة تحت الطلب
مفيد فوزى : ثم
د/ ايمان صبرى : ثم عندما اصبح غير ذلك ابتدى يضرب البنت ويزعق لها ويحرمها من الجامعة
مفيد فوزى : وغيرذلك ليه هو حصل ا يه فى حياته
د/ ايمان صبرى : لأ يعنى هو كان مفترض الولد
مفيد فوزى : كان بيضارب فى البورصة
د/ ايمان صبرى :هو مفترض الولد كان بيشتغل
مفيد فوزى : اه
د/ ايمان صبرى : فجاء بقى بعد ما اتزوج وبعد الامكانيات اللى اداها ابو البنت ابتدى بقى مش عاوز يروح الشغل بتاعة وعاوز وعاوز وعاوز وعاوز عربية
د/ ايمان صبرى : عنده كام سنة الولد ده كان عندة 25 البنت عندها 18
مفيد فوزى : وفقد الخزانة بتاعت الوالد الاب مرداش يدى زوج بنته
د/ ايمان صبرى : مش مرداش هى البنت هى اللى رفضت هى قالت انا عاوزة اشعر انى متزوجة راجل فابتدت الامور تسوء بينما الاب كان عنده استعداد ان هو يدفع ويدى بس علشان بنته ما تحملش لقب مطلقة
مفيد فوزى : قولى لى المدونات اللى بتطلع على النت انا فى تقديرى انها تعبير حقيقى
د/ ايمان صبرى : عن مشاعرالشباب
مفيد فوزى : صامت عن مشاعرالشباب
د/ ايمان صبرى : ده صح
مفيد فوزى : تقولى له ايه?
د/ ايمان صبرى :هو حضرتك ساعات الواحد نتيجة لظروف معينة مش قادر يقول رأية لاولى الامر مباشرة يعنى مش قادرة اقول رأيى لابويا ما اقدرش اقول لابويا مثلا انت سبب عثره فى حياتى انك انت كل عريس يجى لى انا شيفاه مناسب انت شايفه مش مناسب علشان النواحى المادية الخوف الخجل الاحترام بيخلينى مش قادرة اتكلم لازم اتكلم يا اما هيجى لى انفجار دلوقتى فى اسر تقول لك هات لى بس اربع حيطان وانا موافقة على الزواج
فاصل
مفيد فوزى : الاستاذ الدكتور محمد ممتازعاوزاكون معاك شديد الصراحة علميا ما مضار تأخير سن الزواج للبنات انت تخاطب البيت المصرى مش بتخاطبنى
د/محمد ممتاز: اولا انا برحب بحضرتك وبرنامج حديث المدينة ثانيا حضرتك ان معجب جدا بلفظ تأخر سن الزواج لانه حضرتك تأخر سن الزواج ظاهرة عالمية يعنى موجود فى العالم كله
مفيد فوزى : مش فى مصر بس?
د/محمد ممتاز: لأ طبعا نقطة مهمة جدا ان حضرتك متوسط سن الزواج فى بلد زى امريكا وصل 30 فى اوروبا برضه 29 او 30 الفرق الرئيسى حضرتك بين اوروبا وامريكا ومصر ان تاخر سن الزواج له اسبابه الرئيسية هى رغبة البنت فى تأخير الزواج
مفيد فوزى : فى تأخير الزواج؟
د/محمد ممتاز: تأخيرالزواج
مفيد فوزى : ليه عايز تقول انه فى العالم الاول البنت بتبقى هى ارادتها تحكمها
د/محمد ممتاز:بالضبط كده وبتأخرسن الزواج علشان هى عايزة تحقق لنفسها الاهداف اللى هى عايزاها من التعليم من العمل من تحقيق الذات يعنى
مفيد فوزى : يعنى حتى البنات اللى اتعلموا فى امريكا او اوروبا ورجعوا مصر
د/محمد ممتاز:عندهم احنا عندنا فى مصرتأخير سن الزواج بس للاسف ان مش سببها البنت يعنى هنا البنت طبعا بتبقى رغبتها ان هى تتزوج بدرى والاهل بتبقى رغبتهم انها تتزوج
مفيد فوزى : الاهل اكثر?
د/محمد ممتاز: طبعا طبعا مفيهاش كلام حضرتك تاخر سن الزواج فى حد ذاته مهواش مشكلة طبية هى المشاكل بتيجى من تأخر الحمل ودى نقطة مهمة جدا وبتأرق ستات كثيرة جدا وبنات كثيرة جدا
مفيد فوزى : بمعنى ايه ?
د/محمد ممتاز:بمعنى ان هما بيتهيا لهم ان هى لو ما تزوجتش فى سن صغير 20 -21 - 22فرصتها فى الحمل بعد الزواج لما تتزوج فى سن الثلاثين او ما بعد ذلك حتقل جدا
مفيد فوزى : الحقيقة
د/محمد ممتاز: الحقيقة لأ حضرتك هو فى سن الثلاثين فرصة الحمل لازالت تعتبر فرصة كويسة جدا فرصة الحمل بتقل يعنى بنسبة قوية جدا بعد سن الاربعين ده حقيقى ما بين ال35 وال40 نسبة بسيطة ليه البنات فى سن ال28 - 30 - 31 بتحصل احيانا قيصرية
د/محمد ممتاز: حضرتك المشاكل الطبية نرجع لسؤال حضرتك المشاكل الطبية بتعود من تأخر سن الزواج اللى هى ظهور بعض المشاكل الطبية اللى بتظهر فى سن الثلاثينات لما تظهر فى واحدة متزوجة وهى عندها 22 - 23 سنة وتزوجت وخلفت مرة واثنين مفهاش مشكلة لما تظهر لها هذه المشاكل زى الاورام الليفى زى اكياس المبايض هى ALL READY عندها اطفال بيظهر لها مشكلة زى دى بتروح تعمل لها الجراحة ان العلاج المطلوب لو اتأخرت عن الحمل الاولانى بعد سن الثلاثين وعرض على نفسها ان ظهر لها هذه المشاكل ا لطبية قبل حدوث الحمل الاول فطبعا هى دى اللى تسبب بعض المشاكل الحمل نفسه اذا حصل فى سن الثلاثين 31 - 32 مش مشكلة قوى حضرتك الخطورة على الحمل نفسة مش عالى بعد سن 35 فى بعض المضاعفات البسيطة اللى
مفيد فوزى : بعد ال 35
د/محمد ممتاز: بعد ال 35 مش ال30 بالتالى حضرتك احنا بنشوف ستات كثيرة جدا وبنات كثيرة جدا 28- 29 عند البنات اللى ما تزوجتش بتعتبر سن ال 30 ده حاجز فيه حاجز من كده نفس موجود عندهم ان هى لو عدته ومتزوجتش فرصة الحمل هتقل جدا جدا ولو حملت فرصة الولادة عموما ان طفل سليم او صحى هتقل جدا مضاعفات الحمل والولادة هتزيد جدا وده مش صحيح يعنى انا دائما باقول للستات اللى بيجولى ان 28 - 29 -30-31 ده سن مشابهة لبعضها طبعا الخصوبة بتبقى عالية جدا فى سن 21 22 تقل شوية بعد الثلاثين وتقل شوية بعد 35 و تقل
مفيد فوزى :الخصوبة
د/محمد ممتاز:الخصوبة دى نقطة مهمة طبعا
مفيد فوزى : الطلاق المبكر عند الشباب حكوا لى عن تجربة زواج فى سن 22 - 22 ونصف حصل الطلاق
د/محمد ممتاز: دا كثير جدا حضرتك انا بشوف بقى
مفيد فوزى : سببه ايه ?
د/محمد ممتاز: انا هقول لحضرتك انا بشوف امثلة كثيرة جدا فى البنت بتجيلى وهى حامل فى شهرين متزوجة بقالها ست شهورعقبال لما تيجى تولد حضرتك بتكون طلقت يعنى انا بشوف فى الوقت ده البنت حامل فى شهرين هى وزوجها
مفيد فوزى : طبيب النساء دائما بيبقى ملجأ للاسرار انا مش عاوز تقول لى عن اسماء انما تقول لى ليه ليه بيحصل طلاق مبكر
د/محمد ممتاز:معظم الامثلة اللى شفتها حضرتك بيبقى زواج مرتب بين العائلات والاقارب
مفيد فوزى : مفهوش حب?
د/محمد ممتاز: مفهوش حب
مفيد فوزى : وبالتالى مفهوش نفس طويل?
د/محمد ممتاز: مفهوش نفس طويل الحاجة الثانية بيبقى حضرتك فى سن صغير بالنسبة للرجل يعنى انا معظم حالات الطلاق اللى شفتها الراجل 23 سنة 24 سنة حضرتك اللى انا بحاول اعمله دلوقتى ان انا انصح الامهات اللى عندهم بنات فى سن الزواج انهم يعملوا اللى احنا بنسميةBREMARETER COUNCE اللى هو استشارة ما قبل الزواج بيبقى كثير من المشاكل حضرتك بعد الزواج بقى بيجى الشاب والشابة فيه مشكلة فى العلاقات الزوجية مش قادرين يقوموا بيها بصورة سليمة بعد شهر واثنين وثلاثة من الزواج دول لو جم وحاولنا ان احنا نساعدهم بنتفادى كثيرمن المشاكل اللى بتؤدى الى الطلاق الناس بيتكسفوا بيقولوا لأ مش هنروح للدكتور احنا كويسين احنا معندنا ش مشاكل ويفضلوا يستمروا فى المشكلة دى للاسف هى المشكلة فى العلاقة الجنسية بتنعكس على العلاقة الاجتماعية هما مش حاسين بيها هما شكلهم ان هما بيتخنقوا الصبح علشان هما مختلفين بس هو جزء كبير من الخناقة او المشكلة سببها اليوم اللى قبله