والد القتيل "بطل وادى دجلة" ل"اليوم السابع": نفسى أشوف المتهمين عشان أشفى غلى فيهم.. القتلة طاردونى عشان يسرقوا العربية ولما حاولت أهرب قتلوا ابنى.. والدة الضحية: "عمرى ما تخيلت أن ابنى هيموت قبلى"

حسبى الله ونعم الوكيل فى اللى قتلوا إبنى "احمد".. أنا مش قادر أصدق اللى حصل لحد دلوقتى، إبنى خلاص مات عشان البلطجة والسرقة لسة منتشرة، وحياة الناس بقت رخصية، مجرمين مستعدين يقتلوا واحد واتنين وعشرة عشان يسرقوا عربية، لكن لو هربوا من عدالة الأرض هيروحوا فين من عدالة السماء، أنا فوضت أمرى لله وهو اللى هيجيبلى حقى".
جاءت تلك الكلمات على لسان "محمد عسكر" والد الطفل "أحمد" البالغ من العمر 11 عاما والذى فارق الحياة نتيجة إصابته بطلق نارى بالرأس خلال قيام 4 مسلحين بالسطو على والده لسرقة سيارته.
وأضاف فى تصريحات ل"اليوم السابع"، بعد القبض على المتهمين: "أنا نفسى أقابل اللى قتلوا ابنى، عايز أشوفهم فى النيابة، عايز أسألهم ليه عملوا كدا، قتلوه ليه، عايز أشفى غلى فيهم، أنا حاسس إنى هموت بحسرتى على إبنى، بسبب المجرمين دول "أحمد" ضاع منى، كان كل حاجة فى حياتى وكنت عايش ليه".
وتابع: "يوم الحادث أنا ركبت عربيتى ورحت نادى وادى دجلة عشان أرجعه البيت، إبنى كان بطل رياضى وله مستقبل كبير، حاصل على بطولات كتيرة فى السباحة وكان عنده مهارة فى كرة القدم، كان منتظره مستقبل كبير، لكن دا قضاء الله وقدره، وصلت النادى ركب معايا العربية، وأنا ماشى فى الطريق الطبيعى اتجاه عودتى لبيتى وقبل دخلة "كارفور" فوجئت بعربية جيب شيروكى سوداء فيها 4 أشخاص قطعوا طريقى وأجبرونى على الوقوف، ولقيت معاهم سلاح، ساعتها قررت إنى أحاول أهرب منهم، ورجعت بالعربية للخلف عشان أغير الطريق وباعد عنهم، لكن فوجئت بإطلاق نار منهم تجاه السيارة، ورصاصة أصابت ابنى أحمد اللى كان راكب جنبى، لقيت الدم نازل منه ومش بيتحرك، حاولت أسعفه لكن كان فارق الحياة، المتهمين هربوا فى وقتها وبلغت شرطة النجدة ودا اللى حصل".
والدة المجنى عليه أكدت، أنها لن تتهاون فى حق ابنها، وقالت: "إبنى مرتكبش أى ذنب عشان دا يحصله، كان عايش حياته زى أى طفل، متفوق فى دراسته وبيمارس رياضة بيحبها ومبدع فيها، عمرى ما كنت أتخيل إنى اليوم دا هييجى، وإن ابنى هيموت قبلى، مفيش حاجة هتعوضنى عنه مهما كان الحكم على المتهمين، وحسبى الله ونعم الوكيل فى اللى كان السبب".
الحادث تم الكشف عنه ببلاغ تلقاه اللواء على الدمرداش مدير أمن القاهرة يفيد بمقتل طفل على يد مجموعة مسلحة بدائرة قسم شرطة البساتين، فوجه رجال المباحث بسرعة الانتقال إلى مكان الحادث وإجراء التحريات.
وتبين للواء محمد قاسم مدير الإدارة العامة لمباحث القاهرة، أنه أثناء استقلال "محمد عسكر" صاحب شركة لسيارته ماركة هيواندى وبصحبته ابنه "أحمد" البالغ من العمر 11 عاما بمنطقة كارفور، قام 4 أشخاص ملثمين بحوزتهم أسلحة نارية بمطاردته فى محاولة للاستيلاء على سيارته، وأثناء محاولته الهرب أطلق أحدهم عيارا ناريا تجاه سيارته اخترق الزجاج الأمامى وأصاب نجله بطلق نارى بالرأس وتوفى فى الحال.
وعلى الفور تم تشكيل فريق بحث جنائى حيث تم التوصل لهوية الجناة وهم كل من "علاء الدين.س" و"تاج الدين.ع" وعلاء.ع" و"محمد.س"، وتبين أنهم يختبئون لدى أحد أصدقائهم ببولاق الدكرور يدعى "عمرو.م".
وبإعداد كمين لهم بالتنسيق مع ضباط مباحث الجيزة بمشاركة ضباط العمليات الخاصة تبادل المتهمون إطلاق الرصاص مع الشرطة وتم ضبط المتهم "عمرو.م" صاحب المنزل الذى يختبئ به المتهمون وبحوزته سلاح نارى وعدد من الطلقات، كما تم ضبط "محمد.ش" قائد السيارة التى كان يستقلها المتهمون الذين تمكنوا من الهرب.
وفى وقت لاحق وردت معلومات تفيد تواجد المتهمين بمنطقة المعصرة، حيث تم إعداد كمين لهم وضبط المتهم الأول والثانى وبحوزتهما السيارة رقم ط ف ف 821 ماركة جيب شروكى سوداء اللون والمستخدمة فى ارتكاب جريمة قتل الطفل وتبين أنها مسروقة.
بتكثيف الجهود أمكن التوصل إلى اختباء الثالث والرابع بمنطقة الصف بالجيزة، وبإعداد كمين لهما وفور وصول القوات، قام المتهمان بإطلاق أعيرة نارية مما دعا القوة إلى إطلاق النيران ليسفر عن مقتل المتهم الثالث، وعثر بجوار الجثة على فرد خرطوش عيار 12مم وطلقات، وتمكن المتهم الرابع من الهرب. وبمواجهة المتهمين اعترفوا باشتراكهم فى تكوين تشكيل عصابى تخصص نشاطه الإجرامى فى سرقات السيارات كرها عن قائديها تحت الأسلحة النارية، وارتكابهم عدة جرائم سرقة بالإكراه، وتمت إحالتهم إلى النيابة للتحقيق.
المجنى عليه
المجنى عليه
المتهمان الأول والثانى
المتهم الثالث عقب مصرعه وبجواره السلاح الذى كان بحوزته
والدة المجنى عليه
بطولات وشهادات حصل عليه المجنى عليه فى الرياضة
موضوعات متعلقة:
تفاصيل التحقيق فى حادث مقتل طفل "بطل سباحة" بالمعادى.. التقرير الطبى يثبت وفاته بطلق نارى فى الرأس.. والنيابة ترسل سلاح الجريمة للطب الشرعى لتحديد الجانى.. وتقرر حبس المتهمين 4 أيام على ذمة القضية