أحدُ أحد.. هو أنا كده مسلم؟!

والله العظيم أقول الحق أنا مسلم وموحد بالله، فى شهادة الميلاد مسلم، فى خانة الديانة فى البطاقة الشخصية مسلم، بصلى فى البيت مش فى الجامع وصلاة العشاء بصليها دايماً قضى، لما برجع البيت وبزكى عن صحتى ومالى رغم أن جاى رايح بشرب سجائر مدخن يعنى على التليفزيون مسلسلات وأفلام - مش ثقافية، الثقافية اتفرجت عليها زمان وأنا صغير - وبتفرج على أفلام عربى من بتاعة عمرو سعد وآسر ياسين ومحمد رجب وأحمدعز وخالد الصاوى ومنة شلبى وبسمة وهند صبرى، وبسمع أغانى أم كلثوم ونجاة ووردة وشيرين عبدالوهاب وإليسا ووائل جسار وحسين الجسمى وخالد سليم وبحب اتفرج على دينا وهى بترقص على أنغام أم كلثوم وما بشربش خمور منكر.. لا بشرب شاى وعصير قصب وبشرب المشروب اللى بتاخد له نفس وتكتم – لأ فكركم ما يروحش بعيد مش الحشيش اللى يخلى بطرس بقلظ الحشيش أنا ما أحبوش ما أشربهوش،أنا أقصد المشروب التانى اللى لازم وأنت بتشربه من مرارته تقول له هوب علشان الهوب ما بتخليش الدمعة تفط «بيريل»، ما بغضش بصرى بس ما بتحرش بحد وما بأذيش حد وبحب الخير لكل الناس وما بعرفش أكره حد حتى لوكان الحد ده بيكرهنى ليه شنب ومش ملتحى يعنى مش بدقن ومليش فى لبس الجلباب لا قصير ولا طويل ما بلبسهوش لا فى البيت ولا فى الغيط ولا فى الجامع، بلبس «كاجوال» وبوكسرات من بتاعة من جيل لجيل وما بستعملش سواك بستعمل فرشة أسنان ومعجون أسنان، ما بزورش الأولياء لأن مفيش فرق عندى بين مسجد السيدة زينب وجامع عمرو والسيدة نفيسة وزاوية الشيخ جعفر - وما حدش يسألنى مين الشيخ جعفر ده؟
علشان أنا ما أعرفهوش ..أهو أى جعفر والسلام لأنى مؤمن وعن قناعة إن ربنا بيتقبل الصلاة فى أى مكان وكلها مساجد ربنا.
ليه أصحاب أقباط باكل وأشرب معاهم وعمرنا ما اتكلمنا فى الدين.
مش إخوانى ولا سلفى رغم أن القرآن والحديث هما مرجعى بس أنا برفض المسميات ولا عضو فى أى جماعة إسلامية ولا منتمى لأى حزب لعدم قناعتى بمصداقيتها أو تأثيرها، ولا أميل إلى النخبة لما استشعره فيها من عدم إدراك الحقيقة وهى من يكسب الشارع يكسب المعركة ويكسب كل شىء، وهم يبعدون كل البعد عن الشارع ولا أنتمى لأى تيار فكرى رغم أنى أشعر أنى كارف على ليبرالى أو فيه ليبرالى كارف عليا، قناعتى بأن الدين لله والوطن للجميع، والدين عدل ومساواة وحرية ويسر وليس عسراً، ولا إكراه فى الدين وخير أمور الدنيا أوسطها ومش يسارى ولا علمانى، إيه رأيكم بقى! يبقى أنا كده مسلم ولا مش مسلم؟ افتونا يا أهل الخبرة والدنيا مع إنى بخاف من الفتاوى اللى من نوعية حرمانية أكل الفسيخ والسجائر لا تفطر الصائم فى رمضان والقبلة حلال وإرضاع الكبير رغم أنى محتاج رضاعة وربنا يستر.
وما تطلعش فتوى تحرم أكل الفجل والجرجير لأنه محرض جنسى .. افتونا هو أنا كده مسلم.