الشارع فيه سم قاتل

عم شحاتة ماشي في الشارع غصب عنه، أصله نفسه هفته علي شقة فول زي كل يوم قام اتصل بنمرة موبايل صاحب قدرة الفول اللي علي ناصية الشارع وطلب يبعت له شقة فول دليفري. صاحب القدرة رد عليه قال: لسه ما عنديش الخدمة دي اصبر كمان شهرين. عم شحاتة نزل اشتري شقة الفول. وهو راجع لشقته كانت ماشية قدامه عربية قطاع عام جديدة عماله تبخ عادم من الشكمان ريحته وحشة. بس دخانها ما كنش باين وسط السحابة السودا. عم شحاتة نفسه أتكرش وقعد يكح وفجأة داخ وطب وقع من طوله.
في أقل من ثانية خلق ياما اتلمت عليه. مين اللي مد إيده ولطش منه شقة الفول ما حدش عرف من الزحمة. واحد قال لهم: أقروا الفاتحة معايا علي روحه يا جماعة. تبعه بعضهم وطلب منهم أن يرددوا خلفه دعاء الموت والاستغفار من الذنوب. وبعدها ابتدا يغني بصوت عالٍ: الله واحد هو الواحد.. ولا واحد غير الله. واحد تاني قال: لا حول ولا قوة إلا بالله. تسمح يا أخ الجرنان اللي معاك نغطي بيه جتة الراجل؟ صاحب الجرنان رد: إنه لسه شاريه وما قريتش صفحة الرياضة، الأولاني خطف منه الجرنان وسأله: بالحق مين اللي كسب أولة امبارح الأهلي ولا الزمالك؟ قال له: دا بترول أسيوط اللي كان بيلاعب بترول الزقازيق. بس الشرطة هي اللي كسبت.
راجل واقف وابنه الصغير عمال يزن عليه: عايز اتفرج ع الميت يا بابا. أبوه يقول له: بس.. عيب ما تعيطش يا حبيبي الميت يقلق. الواد يصرخ ويرفص برجليه: لا ماليش دعوة. فرجني ع الميت لحسن والله أقول لماما. الأب سمع الواد بيهدده وقدام الناس اتحمق وراح شاخط في الناس: لو سمحتم شوية ذوق.
الواد عايز يشوف ميت من نفسه. والأطفال أحباب الله. لقي ما حدش عبره راح شايل الواد علي كتافه وسأله: هيه شفت الميت يا حبيبي؟ الواد قال: آه اشتري لي واحد زيه. واحد قصير واقف وراهم احتج: نزل الواد من علي كتافك مش عارفين نتفرج منه. واحد شهم من البداية ما كانش ساكت فضل كل شوية يزعق: حرام عليكم. حد يطلب الإسعاف يا ناس يمكن الر اجل لسه فيه النفس. واحد قال له: ما تطلب أنت يا شهم. رد الشهم: أنا الكارت بتاعي قرب يخلص وعندي مكالمة مهمة مع الجو بتاعي. ما فيش حد فيكم عنده إنسانية؟.
بعد نص ساعة.. قول ساعة جت الإسعاف. نزل المسعف قرفان ولاوي بوزه احتياطي: إوعوا يكون مات وفطس وجبتونا بس ع الفاضي. فجأة عم شحاتة فاق وفتح عينيه وقال له: أنا الحالة يا باشا بس بقيت كويس والحمد لله. بتاع الإسعاف قال للناس وهو هيطق: مين فيكم بقي اللي طلبنا وأزعجنا؟ الكل قال له: معلش. حصل خير. وفي ثانية مشيوا. عم شحاتة حب يجامل المسعف ويطيب خاطره قام نام علي محفة الإسعاف.
وقال له: بس أنا مش كويس قوي. خدوني اكشفوا عليا. قاله: فز قوم شوف لك دكتور يعالجك. رد عم شحاتة قال له: شوية ذوق. بلاش ذوق.. شوية رحمة. وخد بعضه وراح لدكتور وهو بياخد نفسه بالعافية وعمال يكح. الدكتور قال له: خد نفس.. قاله: مش قادر. الدكتور: قول آه.
شحاتة: الراجل ما يقولش آه.
الدكتور: طب كح.
شحاتة: ما أنا جاي لك عشان بكح يا دكتور.
الدكتور: كح بلاش لماضة.
عم شحاتة قعد يكح بزيادة.
الدكتور: أنت بتكح كتير كده ليه؟
شحاتة: مش حضرتك اللي بتقولي؟
الدكتور: بس أنت بتكح بجد قوي.
شحاتة: طب كنت قولي وانا اكح هزار.
الدكتور: لازم تبطل السجاير فورًا وإلا فيه خطر علي حياتك. السجاير سم قاتل
. شحاتة: بس أنا عمري ما شربت سجاير.
الدكتور: فهمت بتدخن الشيشة ويمكن بحشيش.
شحاتة: أنا معاشي كله ما يجيبش نص قرش.
الدكتور: فهمت.. بتقعد مع مدخنين. آثار التدخين السلبي باينة في الأشعة كإنك عايش في غرزة. شحاتة: أنا مش بطيق ريحة الدخان أصلاً.
الدكتور: غريبة. أمال تفتكر إيه السبب؟
شحاتة: أخطف رجلي أخش كلية الطب 7 سنين وارجع أقول لك.
الدكتور: أسمع.. تكونش - بتمشي في الشارع؟
شحاتة: لا أنا بمشي فوق السطوح.
الدكتور: اشمعني؟
شحاتة: أصل عندي طيارة خاصة بتنزل ع السطوح وتنقلني بدل بهدلة المواصلات. الدكتور: أنت بتهزر؟!
شحاتة: وهو حضرتك بتتكلم جد؟ خلاص من هنا ورايح أمشي في الصحرا.
الدكتور: عادم العربيات بيسبب تخلف عقلي وعته للعيال والأبحاث أثبتت دا من سنين. أنت ما بتقراش جرايد؟
شحاتة: دكتور حذرني أقرا جرايد لأنها بتجيب لي اكتئاب. دكتور تاني قالي أمشي كتير عشان عندي سكر.
الدكتور: أنا بحذرك لو مشيت في الشارع فيه خطر مميت علي صحتك. دا غير إنه يضعف قواك الجنسية.
شحاتة: يا نهار اسود. لا خلاص أمري لله. كفاية أمشي في جنينة الفيلا وحضرتك تبقي تيجي تعالجني في البيت.
الدكتور: قوي بس الكشف الخارجي 400 جنيه. شحاتة: شوية ذوق. شوية رحمة. بلاش ذوق ولا رحمة.. شوية نباهة.
الدكتور: أدوية النباهة غالية جدًا لأن كلها مستوردة من بره. أنا شخصيًا عمري ما بشتريها.