"عفيفي" للرئيس القادم: "عيش ندل تفضل رئيس على طول"

قال العقيد عمر عفيفي، ضابط الشرطة السابق، على صفحته بموقع "فيس بوك"، اليوم الأربعاء: مجموعة نصائح هامة من العقيد عمر عفيفي لرئيس مصر المخلوع أو المعزول أو المقتول القادم.. واللي على راسه بطحة يحسس عليها".
وأضاف: "اوعي تزعل منك وزير الدفاع أبدا وتسمع كلامه، اوعي تفكر أو تصرح أنك الرئيس الأعلي للقوات المسلحة أبدا، اوعي تفكر نفسك الرئيس الأعلي للشرطة، حاول يكون حرسك الجمهوري ضباط من دول أجنبية ومن جنسيات متعددة أو تجيب شركة أمن أحسن لك، تروق الحرس بتاعك وتنغنغهم ومتزعلش حد منهم أبدًا".
وتابع: "لو مش واثق في حرسك يبقي تحكم من مغارة في جبل الحلال أو في جبل عتاقة ومحدش يعرف مكانها أبدًا، لو مش قادر تعيش في الجبل يبقي ممكن تحكم من قبرص عن طريق سكايب والفيبر والتانجو من بعيد لبعيد أضمن لك، تضبط لنفسك وولادك ورق اللجوء السياسي لدولة أجنبية من أول يوم للحكم وبعد حلف اليمين مباشرة بدون تأخير وتعمل جواز سفر مضروب للطوارئ".
واستكمل: "اوعي تغرك صناديق الانتخابات ولا الكلام الفارغ ده، اوعي تصدق أوباما لأن البيت الأبيض لن ينفعك في اليوم الأسود، لازم تعمل سرداب للهروب عشان تلحق تخلع بسرعة أول ما تحس أن وزير الدفاع زعلان منك، إوعي تزعل القضاة والنائب العام عشان يخلو بالهم منك لما تتعزل ويكونوا حنينين عليك في الحكم ده لو معرفتش تخلع واتقفشت، متزعلش الإعلام منك وخصوصا اللي عندعم قنوات فضائية وجرايد وتسمع كلامهم".
واستطرد:"عيش ندل تفضل رئيس على طول أحسن ما تبقي المخلوع أو المعزول أو المقتول، ومع أطيب التمنيات القلبية للرئيس القادم بخلع أو عزل أو قتل هادئ وحكم مخفف لو معرفش يخلع واتقفش.. بالمناسبة أنا مش بهزر والله العظيم واللي ميشفش من الغربال يبقي أعمي واللي على راسه بطحه يحسس عليها".