كنباوية تزغرد فرحة وهي تتابع الأخبار على شاشة التليفزيون يسمعها كنباوي فيذهب لها مسرعا مستفسرا. كنباوي: خير ياكنباوية؟ ماتفرحينا معاكي كنباوية: الخير على قدوم الواردين، الخير جة على قدوم السيسي ووشه الحلو. كنباوي: ماتقولي ياكنباوية، فرحي قلبي. كنباوية: السعودية بعتت لمصر ب 5 مليارات دولار براميل نفط وفلوس نقدي منحة لا ترد ووديعة بدون فوايد كمان الإمارات بعتت 3 مليارات دولار لمصر والكويت حتبعت 7 مليارات دولار منحة لا ترد شوفت الخير ياكنباوى؟ كنباوي: دة كدة 15 مليار دولار إية الخير ده كله وإيه الرضا ده؟ كنباوية: ده الرضا اللي حصل بعد ما الإخوان غاروا في داهية كانوا مزعلين البلاد العربية كلها منهم بتصرفاتهم وأقوالهم الحمقاء وده كله تعبير البلاد العربية عن شعورها وفرحتها بزوال حكم الإخوان. كنباوي: ياساتر يارب ده الإخوان ماكّرّهوش المصريين بس فيهم دول كمان كّرّهوا الدول العربية كنباوية: دول عندهم استعداد يكّرّهوا الشيطان في نفسه. كنباوي: عندك حق همه اللي هزموا نفسهم إنتي عارفة فيه شعوب كتير بتكره رؤسائها وحكامها بس مش قادرة تعمل لهم حاجة عارفة ليه؟ كنباوية: ليه ياكنباوي فهمني كنباوي: لأن الحكام دول أو الرؤساء دول ماحاربوش مؤسسات الدولة ولا كرهوها فيهم خلوا الود قائم بينهم وبين مؤسسات الدولة لكن غلطة مرسي والإخوان انهم حاربوا الشعب ومؤسسات الدولة كلها وعلى رأسها القضاء والإعلام وده كان الجنون والانتحار بالنسبة ليهم . كنباوية: قول ده الغباء السياسي وعدم الفهم همة من امته كانوا بيفهموا في السياسة؟ دول كبيرهم يفهموا في الاغتيالات والاجتماعات السرية والشغل المتداري والمستخبي والدسائس والفتن ونظام نافق لأجل مصلحتك واكدب وزيف الحقائق علشان ينولوا غرضهم همه غلبوا نفسهم محدش غلبهم جنت على نفسها الإخوان. كنباوي: على الباغي تدور الدوائر ياكنباوية وهمة بغوا وطغوا كنباوية؟ دول ماينفعش معاهم مصالحة وطنية إلا لما يثبتوا بالدليل القاطع إنهم اهتدوا واعتدلوا وقبلوا بالأمر الواقع وسلموا بالهزيمة الساحقة. كنباوي: دة مش حيحصل إلا لما يقبضوا على رؤس الفتنة أمثال بديع والبلتاجي والعريان وعصام سلطان وحجازي المزعج الملعون اللي بيقوم المصريين على بعض. كنباوية: لازم الأخوة الأفاضل اللي عمالين يقولوا إن الحل هو التصالح يفهموا أن الإخوان مش حيرضوا بأي تصالح لأنهم عاوزين مرسي يرجع القصر ولأن ده مش حيحصل يبقي الإخوة الأفاضل اللي بينادوا بالصلح لازم يعرفوا أن الصلح حيخلي القوة السياسية تقدم تنازلات ومصر ماينفعش تقدم تنازلات علشان ترضي فصيلا ولا يصح غير الصحيح لازم يكون فيه موقف علشان موضوع الحرس الجمهوري مايتكررش بشكل تاني. كنباوي: أنتي عايزة السيسي يضرب بإيد من حديد على متظاهري الإخوان؟ كنباوية: أيوة ده اللي لازم يحصل لأنهم معاهم سلاح يعني مفيش سلمية لازم السيسي يضيق عليهم الخناق علشان كل واحد فيهم يعرف أنه مفيش فايدة من قعدته كده في رابعة لو حتي قعد عمره كله هناك. كنباوي: والست أمريكا وعم عصام الحداد اللي بيقولوا إنه عن طريقه يقوم الإخوان بشراء مساحات إعلانية في القنوات الفضائية الأجنبية علشان يشوهوا فيها صورة الجيش المصري والسيسي. كنباوية: طظ في أي ست وطظ في أي حداد اللي يقول يقول البرادعي حيوضح الصورة للعالم كله بعد ما أصبح نائب الرئيس للشئون الخارجية. كنباوي: اهة دي حتموت الإخوان لأنهم مش بيحبوا البرادعي. كنباوية: همة من امتة كانوا بيحبوا أي حد غير نفسهم؟ كنباوي: عندك حق الإخوان مابتحبش غير نفسها قومي حضري لنا لقمة ناكلها. كنباوية: من عنيا ياكنباوي كنباوي: تسلم ليا عنيكي ياكنباوية!
