صباح الخير يا سينا.. الجيش العربى فين؟!

تعالي في حضننا الدافي وضمينا وبوسينا يا سينا.. بقلنا تلاتين سنة عمالين نقول لسينا تعالي في حضننا الدافي وهي عمالة تقول: أنا جاية أهو.. أوعوا تمشوا.. الله بقى يا جماعة.. طب ما تيجوا أنتوا.. ولا أنتوا ما بتجوش إلا بالشيكلاتة.. وكأنها عم أيوب في مسرحية الجوكر.. وضاعت سينا لما الجماعة جت..
سنعلن الحرب على الإرهاب واللي خطفوا الجنود المصريين.. أنا هضرب.. والله لأضرب.. خدوا بالكوا أنا قلت هاضرب.. هوب الكهربا قطعت.. ودا طبعا تخطيط استراتيجي لا يفهمه إلا الكبار.. لأنه بالطريقة دي لما نقطع الكهربا مش هيشوفوا تليفزيون ومش هيعرفوا إن أنا جي أضرب أهو ولا يلحقوا يهربوا العساكر ولا حاجة.. والله لأضرب.... متقدرش.
وإهداء مني لكل الجيوش العربية رائعة محمد بهجت وأهي تذكرة لعل وعسى..
الجيش العربى في مصر
ساكن في مدينة نصر
يصحى من النوم العصر
وبيفطر شاي ومنين
واحد اتنين الجيش العربي فين
الجيش العربي في سوريا
حالق ع الموضة كابوريا
وعلى طريقة فيكتوريا
خلى التروماي بدورين
واحد اتنين الجيش العربي فين
الجيش العربي الليبي
زي الفن التكعيبي
كله بتنجان يا حبيبي
والظاهر واخد عين
واحد اتنين الجيش العربي فين
الجيش العربي خليجى
لا فيه حيل لا يروح ولا ييجي
هذا صمت استراتيجى
إيش فيك يا غراب البين
واحد اتنين الجيش العربي فين
الجيش العربى في تونس
أخضر مثل البقدونس
وعزيزة بتعشق يونس
تبقى الحروبات بعدين
واحد اتنين الجيش العربي فين
الجيش العربى سودانى
سامع خطوته بودانى
هوه أنا ههجم فردانى
يلا ارجع يا أبوحسين
واحد اتنين الجيش العربي فين
الجيش العربى اتهان
يوم ما انضربوا الأفغان
وسكت في البوسنة زمان
وقبل يأكل بالدين
واحد اتنين الجيش العربي فين