افرض جدلا!

إنك قاعد كده واخد راحتك على الآخر الساعة 2 بعد نص الليل، وقلت لنفسك ما تشوف حكاية الفيس بوك، وتعمل كام علاقة كدة مع البنات اللي زي العسل بتوع الفيس.
يمكن يصادفك الحظ وأخوك قنديل ياخدك في التشكيل الجديد اللي احتمال يكون بعد شهرين.
وحبيت تعمل زى المفضوح علي عينه عبده وقلت لنفسك خد بالك من المفاعيص بتوع الفيس أحسن يكونوا شايفينك.
المهم ركزت قوى وخدك الفيس علي بحر الهوي وصفحة تحطك وصفحة تاخدك.
لحد ماوصلت لصفحة اللى يروح ما يرجعش صفحة العشاق، وعشان ما تغلطش غلطة اللى ما يتسمي أبو فضيحة الفيوس قلت إن اسمك علاء وعندك فراغ وأعزب وسنك 22 وبصراحة لاقيت الفييسة مرحبين بيك قوي عشان اسمك علاء على اسم الغالي.
وانسجمت قوي مع واحدة شعرها أصفر وعيونها خضرة لكنها طلعت ناصحة.
وطلبت منك العهد وحلفتك بالغالية الست الوالدة إنك لو بقيت وزير ثقافة ما تنسي أنها وش الخير عليك.
طبعا أقسمت بكل طيبة قلب وتواضع وهات يادردشة حلوة وناعمة.
وكل شوية تفتكر عبده وكل ما الكلام يسخن تضحك وتقول يارب ابقي وزير قريب .
مع سخونة الكلام ما تحس إلا بقفاك مولع نار وباقى جسمك عادى وقلت لنفسك يمكن السخونة تيجى من فوق لتحت.
لكن السخونة بتزيد وقفت التفييس وقلت يمكن جاية من التفييس، وتبص وراك وتلاقى المدام تقولك حلو الفيس يا أبوالعيال.
تلاقي مرض التهتهة جالك ولسانك جاله خرس سريع. وتضحك بصوت عالى تقول لها انتي مش فاهمة.
أهم شروط الوزير فى زمن هشام قنديل إنك تجيب الدرجات النهائية فى الفيس وتكون صاحب علاقات نسائية علي الفيس، يعنى كلها مصوغات تعيين وما تسمع إلا صرخة تبص تلاقى فى بيتك الجيران وكل واحد جايب سكين وشومة، لو أنت مكاني تعمل إيه؟