افرض جدلًا !!

إن واحد صاحبك داخل على جوازة حاولت انك تفهمه أن المتجوز مفقود والعازب مولود، وهو أبدًا على نفس واحد أنا هتجوز يعنى هتجوز، ويعلن العصيان على العزوبية ويدخل القفص النكدى تحاول معاه لكنه مُصر.
فتقدم له هدية الجواز عبارة عن دورة فى كيفية القيام بالمهام الزوجية من مسح وكنيس وتسييق، وكل ما يستلزم حتى تنال رضا الست الهانم ولو فكرت تقول" بم" تلاقى اللسان خرج 7 متر وتقولك مش الحياة تعاون، ولو الموضوع مش لذيذ كلم صاحبك عبد العزيز اللى بيرضع العيال هتلاقيه زى الفل شغال، تلاقى صاحبك مستغرب كأنه جاى من كوكب تانى تستحمل وتكمل معاه عليك دائما نعم وبعدها مباشرة حاضر، ولو فى يوم جات الساعة 3 الصبح وفى أحلى نومة وقالتك إنها عطشانة وخايفة تروح المطبخ تقوم جرى على المطبخ تجيب المية الساقعة وتبتسم ابتسامة رضا وتقول لها اتفضلى يا أغلى الحبايب.
ولو فى يوم قالتك انها تعبانة والشقة كلها زبالة على طول تمسك زى ما علمك الأستاذ الممسحة وتمسح الكلام الحب والعشق اللى قولته زمان وتبص على اليمين تلاقى مكان مخصص للطلم تلطم لما وشك يولع من الضرب، وتلوم نفسك انا ليه ما سمعتش الكلام، وتكمل وصاحبك يصدرلك ابتسامة سخرية، تكمل ولورجعت من الشغل وسمعت معملتش أكل عادى تصدر لها ابتسامة الهبل، وتقرب منها وفى حضنك وتاخدها وقلم محترم على وش سيادتك.
وتحاول من دلوقتى تعتمد على نفسك وتنسى دلع الست الوالدة تكوى وتغسل وتطبخ وعلى طول مبتسم، وتلاقيه يصرخ أمال أنا متجوز ليه.
تلاقى نفسك تضحك وتقع على الارض من الضحك وترد بعنف ما انت متجوز عشان تغسل وتمسح وتربى العيال، يبص لك مش أنا عنتر تستحمل تانى، وتقول له التاريخ بيقول ان المرحوم عنتر كان أسد على كل البشر إلاعبلة، كان قطة لطيفة حلوة ويسمع الكلام وكان يكنس ويمسح الخيمة كمان.
وبعد كده تسأله لسة عايز تتجوز تلاقيه يقولك طبعا.. لو انت مكانى تعمل إيه ؟.