عروستى

30الأستوديو ليل داخلى
(فوتومونتاج). الدمية على ركبتى يوسف يضع لها ماكياجا ويسرح شعرها. يحملها من مكان لآخر.
يصورها فى زى فلاحة وزى أجنبية بمايوه. بعدة باروكات. يصورها من عدة زوايا زاحفا أرضا وواقفا فوق المائدة.
ودائما ممسكة بزجاجة كبيرة لعطر
( نقاء). فى زى الحجاب يضم يديها لتصبح كمن يدعو الله.
يوسف: الله على جمالك وأنت بتدعى.
بنظارة تقرأ كتابا ويضع يدها تحت ذقنها كأنها تفكر. على كرسى المكتب الدوار يلفه بها. ويصورها يثبت الكاميرا بالمؤقت ويتحرك ليحضنها.
يوسف: ناخد بقى صورة لينا مع بعض؟.
فى الحمام: الدش فوقها ورغاوى الصابون حولها وبيدها زجاجة عطر كبيرة. حجرة النوم: يصورها على الفراش فى أوضاع مختلفة. ثم يضعها على الكرسى. يوسف: كفاية كده النهارده، تلاقيكى تعبتى.
ينهار تعبا على الفراش. ينظر لها ثم ينهض ويحملها إلى جواره. يوسف: مش كده أريح لك؟.
يشرد. ويسمع صوت حنان على المشهد. حنان: يوه يا يوسف أنا بحب أنام الناحية دى.
يوسف للدمية: بس نامى الناحية التانية. كنت دايما أتخانق مع حنان ع الحكاية دى. الدمية: حاضر.
يوسف ينقلها إلى يساره: مبسوطة معايا يا سلوتى؟ الدمية: قوى يا يوسف
يوسف يقبل رأسها: طب تصبحى على خير.
الدمية: وأنت من أهله يا روحى
يعطيها ظهره ثم يطفئ المصباح.
31النادى فوتومونتاج
تراك الجرى حنان وصاحباتها يهرولن .
حنان: لازم أنتقم لكرامتى وأذله عشان يعرف قيمتى.
نجوى: ما أنتى اللى طلبتى الطلاق.
حنان: يقوم يعمل فتك ويطلقنى فى ساعتها؟
مروة: يعنى لو كان أتحايل عليكى كنتى صالحتيه ؟
حنان: لا برضه كنت هصر ع الطلاق.
رانيا: والله زمانه بيضرب نفسه جزم.
حنان: يتحرق بجاز. هو لسه شاف حاجة؟.
نجوى ورانيا يستريحان على دكة.
مروة: برافو كابتن حنان.
لكن حنان تسقط من شدة الإرهاق.
فى الجمانيزيوم. حنان تتدرب على أجهزة رياضية.
مروة: أحسن يا وحش.
حنان: أنا مش عايزه أتجوز عشان أغيظ يوسف. أنا عايزه أحبل.
نجوى: صدقينى مش هتلاقى راجل تحبيه.
حنان: المهم هو يحبنى ويكون محترم ويقدر يحمينى ويصرف عليا.
حنان فوق ميزان قياس الوزن.
رانيا: هايل فاضل لك 5 كيلو وتوصلى للوزن المثالى.
مركز تجميل.. حنان تدخل وتجلس على مقعد.
حنان للخبير: لو سمحت ما عنديش وقت.
الخبير: تحت أمرك. طلباتك.
حنان: نيو لوك.
حنان تنهض تبدو وكأنها صغرت سنوات.
23 الأستوديو فوتو مونتاج
لقطة من أعلى لعشرات من صور كبيرة للدمية تملأ الأرض ويوسف نائم على
ظهره وسطها مبتسما وبيده زجاجة ويسكى. النهار يطلع. الدمية جالسة بركن تفتح عينيها.
الدمية: اصحى يا يوسف.
يوسف جالس إلى اللاب توب وبه صورته مع الدمية.
يوسف: لا الصور دى خليها لى أنا. شوية خدع بقى عشان تبانى حقيقية.
جرس الباب. يوسف يضعها بالدولاب ويفتح للخادمة.
يوسف: خشى شغلى الغسالة عشان تلحقى تنشرى.
عطيات بدلع: من عينيا.تنظر لصور الدمية بالحق يا بيه الست ما عندهاش غيارات عايزه تغسلها بالمرة؟.
يوسف: لا خلاص مشيت ومش راجعه.
عطيات: طب ما تاخد لى صورة زى دى.
تشير لصورة الدمية معه وتلصق جسدها به.
يوسف مرتبكا: لا دى صورة عشان إعلان عن...
عطيات تجلس على ركبتيه: بس الجيران يشوفونا يا سيدى.
يوسف يضعف لحظة ثم يفيق فيدفعها عنه.
يوسف: بت.خدى حسابك م البواب وغورى
عطيات: عشان يعنى هى أجمل منى؟ مش بالحلاوة. الرك الواحدة تكون نتايه!.
يوسف: اخرسى. ياللا ما شوفش وشك تانى.
عطيات خارجة: طيب ما تزقش. نسوان لها بخت.
يفتح الدولاب فتقع الدمية عليه. بخجل لا ينظر فى عينيها.
يوسف: أنتى زعلتى؟ معقولة تبقى معايا البرنسيسة وأبص لخدامة.
بلاش التهيؤات دى!.
ومع ذلك حقك عليا.أنا بشر والوساخة فى طبعنا.
يوجه الريموت لها فتذرف دمعة.
يوسف: أنا مش بستحمل اشوف دمعتك نازلة!. يقبل رأسها أوعدك مش هعمل كده تانى. قول بقى سامحتك يا يوسف.. ما تقولى. يضغط الريموت.
الدمية: سامحتك يا يوسف.
يوسف: يحضنها. أنا كنت متأكد من طيبة قلبك!
33 محل الملابس نهار داخلى
حنان مع صديقاتها تنظر لمانيكان طفل فى قطعة ملابس.
حنان: الله.. عايزه من ده. تلتفت لفستان زفاف. استنوا الفستان دا جنان.
البائع: دا آخر قطعة وبخمسين ألف بس.
مروة: لا غالى.
حنان: أحجزهولى يومين تلاته بالكتير.
صديقاتها يتبادلن نظرة دهشة.
حنان: العريس السعيد اللى هيدفع تمنه.
البائع: مبروك مقدما يا مدموزيل.
حنان مبتسمة بسعادة: ميرسى.
نجوى: انشكحتى قوى عشان قالك مدموزيل؟
حنان: طب بالمناسبة بقى إيه رأيكم يا ستات لو عملت عملية بالمرة ؟! بتضحكوا؟.
اللى هيتجوزنى هيبقى عارف أنى مدام لكن يجرى إيه لما نعيش اللحظة دى تانى؟
ناظرة فى مرآة. أنا جاهزه. ما فاضلش غير العريس. قولوا لى أصطاد راجل منين؟
رانيا: مرطرطين فى كل حتة يا أختى.
43 الأستوديو غروب داخلى
يوسف بالشرفة ينشر ملابس الدمية. شديد يتلصص من الشيش الموارب!
يوسف شمر البيجاما لينفض الأثاث ويكنس ويمسح الأرض والدمية على
الأريكة واضعة ساقا فوق ساق.
يوسف: أخلص المسح يكون الطبيخ استوى ونتغدا سوا. ماشى؟
الدمية: أنا خدامتك يا يوسف!.
يرفعها ويمشى بها فيدوس على قدمها ويختل توازنها.
يوسف: دوست على رجلك؟سورى يا روحى. ما تمشيش حافية حاجة تخش فى رجلك.
يضع حذاءه فى قدميها ويأخذ بيدها ليسحبها فتقع.
يوسف: دا عيب مصنع.أسندك بطوبة. ياه نسيت اشترى طوبة!. تعالى نعمل الأكل.
فى المطبخ يضعها فوق البوتاجاز بعيدا عن النار.
يوسف: أخش الحمام دقيقة وراجع لك.
يخرج فتقع فوق الحلة المفتوحة. يوسف يعود ويحملها.
يوسف: يا حبيبتى شعرك كان هيتحرق. طب أندهى عليا.
جرس الباب يدق.
يوسف: بدهشة مين؟
زهير: من الخارج. إحنا أصحابك اللى نسيتهم يا وغد.
يوسف: يضعها بالدولاب ما تطلعيش حس. دول رجالة طفسين لو شافوكى مش، هيعتقوكى.
يفتح فيدفعوه ويدخلون. يظهر شديد ونعيمة على باب شقتهما ينظران فيغلقه.
زهير: اعترف أحسن لك وسلم المزه اللى عندك.
وحيد: المادة 13 من قانون الهلس تمنعك تمارس الرذيلة لوحدك.
محسن: فى الجو رائحة امرأة. شامين ؟ .
يوسف: دا ريحة البارفان بتاع الإعلان.
وحيد: ولو لنا حق التفتيش والضبطية القضائية.
كل منهم يدخل مكانا ويخرج بيده قطعة ملابس حريمى ويصفرون بنغمة مارش.
وجدى يشم كمبليزون: الله..
يوسف يخطفه منه بغضب: أنا ما أسمحلكش.
وجدى بدهشة: مالك؟ إحنا بنهزر.
يوسف: ما فيش هزار فى الحاجات دى! وما يصحش تيجوا من غير ميعاد.
محسن: أحنا آسفين. بينا يا جماعة.
زهير: أنا عايزه فى كلمة بخصوص الشغل.الكل يخرج. ما دام تحب بتنكر ليه؟.
يوسف: يعنى.. ابتدينا نتعلق ببعض.
زهير: عشان كده. دى ساحره لك بقى وربطتك جنبها. أمسك الحشيشة دى أكيد هتحتاجها.
طبعا حصل بينكم. سيكو. سيكو.
يوسف: إطلاقا.. أصلها..
زهير: ساخرا.أصلها إيه؟ لسه بنوته؟.
يوسف: هه؟ أيوه.
زهير: وبتعترف بخيبتك يا منيل؟.
يوسف: أصلها مش بنى آدمة. قصدى رقيقة زى الملاك.
زهير: أنت اللى مغفل . بكرة تزهق منك وتفرقعك وتشوف غيرك.
يوسف: مستحيل أصلك ما تعرفش سلوى.
الدمية من الدولاب: أنا بحبك قوى يا يوسف.
زهير يتلفت حوله ليرى مصدر الصوت.
يوسف: هوينى بقى. يدفعه للباب ويفتح الدولاب ويخرج الدمية.
يوسف: أل يا سلوى ممكن تضايقى وتفرقعينى؟ لا مش ممكن. أنتى غير بقية الستات!.
مش أبيحه وقليلة الأدب زيهم!.
53 النادى فوتومونتاج
رانيا تتحدث مع عريس لحنان فى سنها.
رانيا: دى طلبات حنان بخصوص الشبكة والمهر والمؤخر.
عريس1: أنا تحت أمرها وليا طلب واحد بس.
حنان: إيه هو؟.
عريس2: تتنقبى.
حنان: ناهضة محبطة. بعد ما عملت النيو لوك؟ يفتح الله.
حنان مرتدية الحجاب وعريس أكبر منها.
عريس2: أنا مستعد أعمل لك أكتر من كل اللى بتحلمى بيه.
رانيا: يبقى على خيرة الله.
عريس2: بس اسمحى لى الحجاب دا يعنى..
حنان: مقاطعة. بص أنا مش مستعدة أتنقب.
عريس2: أنا قصدى تقلعى الحجاب خالص.
حنان: طيب أجل الموضوع دا بعدين.
عريس2: ناهضا متأسف دى مسألة مبدأ. عن إذنك.
حنان تخلع الحجاب فورا.
رانيا: بدهشة. طب كنتى أقلعيه قدامه.
حنان: أنا مش عايزه راجل يتحكم فيا.
رانيا وحنان وعريس ثالث تيب مختلف.
عريس3: ما تقدريش تتصورى سعادتى قد إيه.
رانيا: أظن إحنا اتفقنا على كل حاجة.
عريس3 إن شاء الله: بالحق أنتى بتشتغلى؟.
حنان: حاليا فى إجازة بدون مرتب.
عريس3: أهو دا عيبه. وما عندكيش أى دخل؟
حنان: وأنت دخل أهلك إيه؟
ص3: باين عليكى بتحبى الأطفال.
رانيا: قوى بتموت فيهم.
عريس3: ولا يهمك أنا عندى تلات عيال.
63 نوم حنان ليل داخلى
حنان وصديقاتها ينزعن الشعر من سيقانهن.
حنان: ما أنا هتجوز يعنى هتجوز.
مروة: حد بيتجوز عند ؟
حنان: ما أنا لازم أتجوز. هو مش من حقى أتباس؟
مروة تحضنها: بس كده؟ تعالى يا روحى.
حنان: مش أنتى.أنا عايزه راجل.
مروة: نأبك على شونة طب والله ما بيعرفوا يبوسوا. بس يتحكم فيكى ويبقى وصى عليكى ودا لو لاقيتى.
حنان: يا سلام؟ دا كل راجل يعرف أنى اتطلقت بيعاكسنى.
نجوى: دول نيتهم وسخة وأول ما تقولى جواز يخلعوا.
بمناسبة البوس قولى لى اتفقتى مع طليقك على نفقة متعة ؟
حنان: نفقة متعة؟
رانيا: يعنى حق ما الراجل بيتمتع بمراته.
حنان: عندك حق. أحسن من عينه.
نجوى: شوفى لك محامى شاطر يرفع لك عليه قضية.
رانيا: بس أحسن من بهدلة المحاكم كلمى يوسف وحاولى تتفقى معاه ودى فى الأول.
73 نوم يوسف ليل داخلى
يوسف يدخن جوزة وبجواره الدمية. صوت حنان من الاسبيكر.
حنان: يا تدفع لى نفقة متعة يا أرفع عليك قضية. عايز تحلها ودى شوف لك محامى..
ونتقابل مع المحامى بتاعى.
يوسف ضاحكا: بتتمحك واخدة بالك يا سلوى؟
حنان: رد ردت الميه فى زورك.
يوسف: ردى أنتى عليها يا سلوى.
الدمية: أنا بحبك قوى يا يوسف.
حنان بغيظ: حبك برص اللى خدته أم شعر. صوت وضع السماعة .
يوسف ضاحكا: سمعتك ماتت م الغيرة.أمال لو شافتك تعمل إيه؟ تنتحر؟
يضعها بالسرير. تصبحى على خير يا حبى.
الدمية بصوت ممطوط: وأنت من أهله.. يا يو.. يو.. يو
يوسف: يوه.نسيت أحطك فى الشاحن.
يوصل الفيشه بجسمها للشاحن فتتوهج عينيها بلون أحمر.
يوسف يتناول قرصا: وكنت هنسى آخد المهدئ.
نائم وظهره لها.يتقلب فتصبح فى حضنه.
يوسف شبه نائم يغمغم: أنتى دافيه والجو برد.. دفينى. يفتح عينه فيجد ساقيها عاريتين فيستثار: إيه اللى جابك فى حضنى؟ وسخنه كده ليه؟. قصدك إيه يا قليلة الأدب؟
يعطيها ظهره. نرى ذراعها وقد وضع على صدره. كل جنسكم ملاعين الظاهر.
زهير كان عنده حق. ينظر خلفه. الدمية وذراعها بجانبها. ينهض ويحمل مخدة
وملاءة وينام على الأرض بجوار السرير. ما يكونش أنا اللى اتهيألى وظلمتها؟
أيوه سلوى ما تعملش كده. يغمض عينيه وبعد لحظة يجدها نائمة فوقه فيعيدها للسرير. لا باين عليكى ناويه تجننينى.
83 قاعة بالشركة نهار داخلى
شاشة تعرض كليبا لصور الدمية تبدو كأمرأة حقيقية. العاملون يتفرجون. المدير: بس الموديل شكلها رومانسى قوى.
يوسف: ده إعلان بارفان واسمه نقاء يبقى غلط نجيب له واحدة تعمل إغراء.
المدير: وإمتى تدينا نسخة الفيلم النهائية نفرجها للمعلن؟
يوسف: أسبوع .لسه فى دماغى أفكار تانية.
سوزان: أنت ليه ما بتصورش هنا مع أن الإمكانيات بتاعتنا هايلة؟
يوسف: برتاح أكتر فى الاستوديو بتاعى.
المدير: بالحق لقيت الموديل دى فين؟
يوسف: لا دا سر المهنة.المهم تكون عجبتك.
سوزان: سر إيه؟ ما هى لازم تيجى الشركة تمضى عقد معانا.
المدير: سوزان بتتكلم صح. يتحرك خارجا
سوزان خارجة خلفه: تجيبها بكره ومعاها البطاقة الضريبية.
يوسف: البت دى وحنان كرهونى فى النسوان.
زهير: بالحق أنا كلمت وحيد عشان يمسك لك قضية نفقة المتعة.
يوسف: أنا غيرت رأيى لا يفل النسوان إلا النسوان. أنا هدى القضية لمحامية كنت مرافقها زمان عشان أذل الست حنان.
93 الاستوديو ليل داخلى
يوسف: يقبل الدمية. مبروك. عجبتيهم يا سلوى.
الدمية: أنا بحبك قوى يا يوسف.
يفتح زجاجة ويسكى ويصب كأسين ويسقيها معه.
يوسف: فى صحتك.
الدمية: فى صحتك.
يراقصها على موسيقى ونراها كأنها تشاركه الرقص.
يوسف بدهشة: أنتى بترقصى ولا أنا اللى بتطوح؟ أقولك كفاية خمرة ما تشربيش تانى.
يوسف يدخن جوزة. ثم بتفكير: بس عايزين يعملوا لك عقد. أتصرف ازاى؟
ما تفكرى معايا. ثم يغفو.
الدمية: أنت فنان يا يوسف مش مصوراتى. أرسمنى يا يوسف.
يوسف يغمغم وهو نائم: دى فكرة كويسه.
ثم يفتح عينيه ويراها جالسة على الكرسى يهتز بها.
يوسف بدهشة: أنتى قولتى ارسمنى ولا اتهيألى؟ ردى يا سلوى.
الدمية: أنا بحبك قوى يا يوسف.
يوسف: يمكن كنت بحلم؟ ينهض متخذا القرار. هعمل الإعلان رسم بدل الصور.
إزاى ما فكرتش أرسمك م الأول؟.
وقد انتقل للمرسم يشغل جهاز التسجيل.
يوسف: تسمعى موسيقى كلاسيك ؟
يبدأ الرسم ببطء ثم يضرب بالفرشاة بسرعة.
يوسف: الصور بتدينا فكرة عن الواقع لكن الرسم بيدينا الحقيقة فاهمانى؟.
جرس تليفون ثم الأنسر ماشين وصوت سوزان.
سوزان: أنا سوزان. الأستاذ مفيد متضايق جدا وبيسأل فين الشغل.
يوسف يرد من مكانه: أنا غير موجود حاليا. من فضلك لا تحاولى الاتصال فى وقت آخر.
المكان معبأ بالدخان.لوحة لسلوى لم تكتمل تشبه فتاة الحلم.
يوسف: أول مرة جيتى لى فى أحلام اليقظة كان عندى 14 سنة. لما قابلت حنان افتكرتها أنتى ولما اكتشفت أنها مش هى غالطت نفسى عشان الحياة تستمر لكن..
زجاجة الويسكى فارغة ويوسف نائم. يد الدمية تربت عليه.
الدمية: أنت تعبت.. قوم نام يا حبيبى.
يوسف: أنتى قولتى إيه ؟ أنا حفظتك الجملة دى؟ ردى عليا.
ثم لنفسه: أنت لسعت يا يوسف؟ آه الظاهر لسعت!. لازم أشوف لى دكتور.
40 عيادة نفسية ليل داخلى
يوسف أمام الدكتور نبيل الذى يبدو عليه الوقار.
يوسف: أنا ما جيتلكش بصفتك دكتور نفسى وبس لكن لأنك ابن عمى وأقدر أكشف لك سرى.
الطبيب: والعروسه دى شكلها إيه؟.
يوسف يناوله صورة للدمية فينظر ويكتم ضحكة
يوسف: بتضحك على إيه؟ مش حلوه؟
الطبيب: حلوه. بس..
يوسف: برتاح معاها. بحس إنها بتحبنى زى ما بدأت أحبها.
الطبيب: تحبها مفهومه شويه.لكن هى جماد يبقى تحبك إزاى؟
يوسف: من كلامها معايا.
الطبيب: هى بتقولك الكلام اللى أنت برمجتها عشان تقولهولك. فى الواقع أنت بتكلم نفسك.
يوسف: لكن ساعات بتقولى كلام مش فاكر إنى خليتها تحفظه.
الطبيب: أديك قلت مش فاكر. أكيد بتلقنها الكلام دا وأنت شارب ومسطول وتصبح ناسى يوسف: وأوقات بتتحرك لوحدها زى البنى آدمين.
الطبيب: تهيوءات. وحدتك والخمره والحشيش بيخلقوا لك وهم أنها إنسانة لأنك من جواك بتتمنى ده.
يوسف: وإزاى أتأكد؟.
الطبيب: بسيطة أطلب منها تخيط لك زرار القميص وشوف.
يوسف: أفرض أنه وهم لكن بيريحنى. يبقى إيه المشكلة؟ .
الطبيب: لو ما فيش مشكلة ما كنتش جيت لى.واجه نفسك.اللى بتعمله دا مش أكتر من عادة سرية. وبعدين حرام تحب صنم.
يوسف: طب تنصحنى أعمل إيه؟ .
الطبيب: تعيش فى الواقع.أنا متجوز من 25 سنة وعانيت مشاكل كتيرة مع مراتى لكن الحياة لازم تستمر.أنا مستعد أكلم حنان وأصالحكم.
يوسف: مستحيل أرجع لها أو أتخلى عن سلوى.
الطبيب: سلوى مين؟. أنت صنعت بخيالك ست مثالية تعوض بيها صدمتك فى حنان، والحل تبعد عنها شويه هتتعود وتلاقيه أمر طبيعى.
41 نوم يوسف ليل داخلى
يوسف يسكر. يسمع صوت حنان من الإسبيكر.
حنان: أنا اتفقت مع المحامى نتقابل بكره الساعة سبعة عندى. لو موافق قول موافق.
يوسف: بس كده؟ حاضر.
الخط يغلق. ينظر للدمية بأسى.
يوسف: أنا آسف لازم نبعد عن بعض شويه. أعذرينى يا سلوى.
الدمية: أنا بحبك قوى يا يوسف.
يوسف: معلش. سامحينى.
يضعها فى ضلفة دولاب ويغلقها ويلقى بنفسه على الفراش.يسمع طرق
خفيف يلتفت للدولاب ويجلس بقلق.
يوسف: لحسن تتخنق. بصوت عال: ما تخافيش يا سلوى.
الدمية: من الدولاب بصوت باكى. أنا بحبك قوى يا يوسف
يوسف بتأثر: ساعدنى يا رب!
الطرق يتكرر فيغطى وجهه بالوسادة فلا يسمع.