أحلام بكار .. حلقة رقم (39) .. قلعة صلاح الدين الأيوبى وشفيق ياراجل !

التقى بكار وحمزاوى بعد عودة حمزاوى من السفر فى خان الخليلى بناء على رغبه بكار وسارا بين البازارات ومحال الانتيكات يتبادلون أطراف الحديث.
بكار : حمد الله ع السلامة ياجاى من السفر وشك ولا القمر.
حمزاوى : ( فى ابتسام ) ايه الروقان ده يا بكار.
بكار : ليك وحشه ياراجل، وحشتنى فعلا، صداقتك لها معنى كبير اوى فى حياتى.
حمزاوى : وانت كمان يا بكار وربنا عالم باللى فى القلوب.
بكار : ربنا يديم المحبة والمعرفة بينا.
حمزاوى : أمين يارب العالمين.
بكار : أمين يا رب.
حمزاوى : ليه اخترت الخان وانتم مش بتحبوا الآثار وبتقولوا إنها حرام ؟
بكار : مش احنا اللى بنقول الله سبحانه وتعالى هو اللى بيقول.
حمزاوى : التماثيل حرام لو كان الغرض منها العباده لكن لما يكون الغرض منها الاستدلال على حقبة من الحقب والتاريخ مش حرام يا بكار ده تراث أجيال.
بكار : مش ده موضوعنا دلوقتى يا حمزاوى.
حمزاوى : ده معنى كلامك إن فيه موضوع مهم أنت عاوزنى فيه !
بكار : أكيد الآثار بتتسرق وتتباع.
حمزاوى : ماهو ده مش شيء جديد طول عمرها الآثار بتتسرق وتتباع.
بكار : اللى بيتسرق ممكن يرجع لكن اللى بيتهد مش ممكن يتبنى من تانى.
حمزاوى : أنت كده قلقتنى يابكار، فيه أيه اتهد ؟
بكار : هو ما اتهدش لسه بس فى طريقه للهد والانهيار.
حمزاوى : اتكلم يابكار ماتقلقنيش اكتر من كده.
بكار : قلعه صلاح الدين الأيوبى حتقع.
حمزاوى : انت متأكد من الكلام ده ؟
بكار : ايوه متأكد الإهمال يعمل أكتر من كده القلعة بتنهار والمسئولين نايمين فى العسل والوزير ولا هو هنا قمة الاستهتار واللامبالاة يا حمزاوى
حمزاوى : دى تراث وتاريخ هو الإخوان فاضيين لحاجة زى كده همه كل همهم إنهم يكوشوا على البلد والحكم وفى داهية البلد وآثارها واللى فيها
بكار : احنا لازم نصعد الأمر ونطالب المسئولين بسرعة التصرف لازم ياحمزاوى لازم.
حمزاوى : حاضر يا بكار أنا حتصرف ما تقلقش وقولى إيه أخر اخبارك ؟
بكار : بيهاجمونا علشان قعدنا مع شفيق.
حمزاوى : طيب ما الإخوان قعدوا قبل كده مع عمر سليمان حلو ليهم ووحش لغيرهم ؟
بكار : تقول إيه بقى فى النفوس الخربانة ؟
حمزاوى : ربنا يكفينا شر المنافقين الكدابين عملتوا ايه مع بعثه صندوق النقد ؟
بكار : كانوا عاوزين يطمنوا بالتزام المصريين فى حال سقوط مرسى ونظامه إن فيه نيه للسداد ولا مفيش واحنا قلنا إننا حندرس عواقب القرض ومدى صلاحيته للمصريين ومدى إمكانية سداده.
حمزاوى : الأجانب كل حاجه عندهم مدروسة وبحساب مش زينا كل حاجة عندنا بالسبهللة وجهجهونى.
بكار : عندك حق احنا بنبص تحت رجلينا وهمه بيبصوا دايما لقدام وده سر نجاحهم .
حمزاوى : يلا يا بكار عاوز أنام.
بكار : يلا يا حمزاوى أنا كمان تعبت من اللف فى الخان محتاج اريح رجليا شوية.
حمزاوى : يلا يا صاحبى.